Hörmätlü Ṭeofil, geleṭine beš arane baki äšurxoxun camsuna čaləšake.
Ṭe belxun häysäṭinäl ciriḳ Mu͑q Xavara ičoġoy piin aḳi šoṭo q̇ulluġbiṭoġon me äšurxo yax exlätṗi ḳinäḳ
zuval ṭe belxun bitova yönbäri fikir tadi moṭoġo vaynaḳ belxun ośel camsuna lazəmez avabaki.
Metär ki, hun vi zombakiṭoġoy düz baksuna tam ve͑bakan.
Iudeyin padčaġ Irodi vädinesṭa Avia däsṭinäxun * bakala Zäkäriyä \ c̣iyen sa be͑yinśe buy, iz čuuxal Aaroni näsiläxuney, šoṭay c̣i Elizabeṭey.
Šorox ṗo͑ġä͑l Buxaʒ́uġoy piyes düzgün amdarxoney, Buxaʒ́uġon laxi buyruġxo q̇a q̇aydoġo bitova äyitsuz bex ṗaṗesṭunbsay.
Ama Elizabeṭ ärämiḳ * baksuna görä ičoġoy äyel tene buy. Šoṭoġoy ṗrannayal yäš geleney.
Sa ġi Zäkäriyän iz däsṭin navadasṭa Buxaʒ́uġoy be͑ś be͑yinśluġi q̇ulluġane tašṭay.
Xrama baci šaaṭ adeġala buxur boḳospsunal me dönüš ičune kofṭey (be͑yinśxoy ädäten moṭaynaḳ čöpṭun bosṭay). Zäkäriyä xramane baci,
amdarxon isä me vädine xrame määlne čurpi afərəṭunney.
Me vädä q̇urban ečala gane yön täräf Zäkäriyäynaḳ Buxaʒ́uġoy sa angele aḳeci.
Zäkäriyän šoṭo aḳi q̇ə͑nebi, iču aćesebi.
Angelen isä šoṭo pine: "Ma q̇ə͑ba, Zäkäriyä! Buxaʒ́uġon vi afərəna inebaki. Vi čuux Elizabeṭen vaynaḳ sa ġar ečale. Hunal iz c̣iya Ioan * laxa.
Šoṭin vaynaḳ mu͑qluġ ečale, vi üḳ mu͑qluġen buy bakale. Amdarxoy geloval šoṭay dünyäne eysuna görä mu͑q bakale,
šoṭaynaḳ ki, šo Q̣onʒ́uġoy piyes kala aḳeġale. Šoṭin sal sa vädä nä fi, nääl q̇eräz finaġoybala u͑ġu͑nxo tene u͑ġä͑l, hälä nanay tapane amaq̇un ω͑vel Urufen buy bakale. *
Šoṭin israilluġoy geleṭu Q̣onʒ́uġoč, ičoġoy Buxaʒ́uġoč qaydale.
Šo xavarečal Ilyay urufen q̇a zoren Q̣onʒ́uġoy be͑ś taġale, bavoġo ičoġoy äyloġoč, tärsṭoġo düzgün yaq̇ač yönbi, azuḳa Šoṭay eyseynaḳ häzirbale. *
Zäkäriyän angela pine: "P̣oy zu moṭoġoy bex ṗaṗsuna hetärez avabakon? Axəri zuval gele q̇ožazu, bez čuġoyal ene yäš č̣ovakene".
Angelen šoṭo ǯoġabe tadi: "Zu Buxaʒ́uġoy be͑ś čurḳala Gavriilzu, me mu͑q xavaral va upseynaḳez yaq̇abake. *
Häysä isä, hun bezi piṭoġo nu ve͑baksuna görä, me \ äyitmux bex ṗaṗala ġinal ciriḳ äyitṗes ten bakal, lal bakalnu".
Qavuna čurpi amdarxon isä Zäkäriyäy yaq̇aṭun be͑ġsay, šoṭay xramaxun heṭu görä metär č̣äyi č̣eysuna teṭun q̇amišaksay.
Šo xramaxun č̣ere, ama amdarxoxun äyitṗes tene baki. Amdarxonal q̇amišṭunbaki ki, šoṭo xrama hiḳänesa aḳecene. Šoṭin amdarxoxun kiin-biine äyitey, šoṭaynaḳ ki, laley.
Zäkäriyäy q̇ulluġi vaxṭ čarḳaṭan šo iz ḳoyane qaybaki.
Samal oša isä iz čuux Elizabeṭ äyeläne mandi, qo xašal iz ḳoyaxun tene č̣eri.
Šoṭin nexey: "Moṭo zaynaḳ Q̣onʒ́uġone bi. Šoṭin za eyex badi amdarxoy arane ćomä͑yin mansṭaxun čarḳesedi". *
Elizabeṭ u͑q xašin bə͑hi bakaṭan Buxaʒ́uġon angel Gavriila Galileyina bakala Nazareṭ šähäre,
iz c̣i Mariya bakala ärgän sa xuyäri ṭo͑ġo͑le yaq̇abi. Me xuyär Davidi näsiläxun bakala Iosif c̣iyen sa amdaraxun niśanluney. *
Angelen šoṭay ṭo͑ġo͑l hari pine: "Xeyirq̇an baki, ay Buxaʒ́uġoy piyes šaaṭ aḳeġalo! Q̣onʒ́ux vaxune".
Mariya me äyitmoġon čäšṭirišebi, me äyitmoġoy ḳä upsuni baradane fikirbsa burqi.
Angelen isä šoṭo pine: "Ma q̇ə͑ba, Mariya, šoṭaynaḳ ki, hun Buxaʒ́uġoy piyes šaaṭen aḳece.
Hun bə͑hi baki sa ġar ečalnu. Šoṭay c̣iya Isus laxalnu. *
Šo kala Amdar bakale, Ala Arciṭay Ġar ḳaleġale. Q̣onʒ́ux Buxaʒ́uġon Šoṭo Iz bava Davidi taxṭa tadale.
Šo Iaḳovi näsili loxol hämišäluġ padčaġ bakale. Iz padčaġluġiyal axər tene bakal". *
Mariyan angela pine: "Mo hetäre bakes bakon? Axəri zu hälä išq̇ara tezu".
Angelen ǯoġab tadi šoṭo pine: "ω͑vel Uruf vi loxol ciġale, Ala Arciṭay kala zoren vi loxol xoži sakale. Koṭaynaḳal vaxun bakala Äyel Buxaʒ́uġoy Ġar ḳaleġale, Šo ə͑vel bakale.
Be͑ġa, vi q̇oom Elizabeṭal iz yäšlu vädine ġar äyeläne mande. Šoṭo ärämiḳṭun * nexey, ama šo ene u͑qxašin bə͑hine.
Šoṭaynaḳ ki, Buxaʒ́uġoynaḳ mümkün nu bakala šey tene bu". *
Ṭe vädä Mariyan pine: "Zu Q̣onʒ́uġoy nökärzu, barta za vi pi ḳinäḳq̇an baki". \ Angelenal šoṭo barti taneci
Ṭe vädä Mariya hayzeri kap \ Iudeyani burux ganxo bakala sa šähärene yaq̇a bafṭi.
Šo Zäkäriyäy ḳoyane hari. Baci Elizabeṭa "Xeyirq̇an baki!" pine.
Elizabeṭen Mariyay äyitä ibakaṭan, ičusṭa bakala körpä mu͑q baki galepi. Elizabeṭal ω͑vel Urufen buybaki
alloy säsen harayepi: "Hun čupuġoy boš xeyir-bäräkät haq̇iyonu, vasṭa bakala äyeläl xeyir-bäräkät haq̇iyone.
Mo hetäre bakes bakon? Bez Q̣onʒ́uġoy Nana bez ṭo͑ġo͑le hare!
Be͑ġa, vi äyitä ibakaṭan zasṭa bakala äyeläl mu͑qluġaxun galepi.
Q̣onʒ́uġon iču pi äyitmoġoy bex ṗaṗsuna ve͑bakala čuux he bäxṭävärä!"
Mariyan isä pine:
"Bez üḳen Q̣onʒ́uġoy c̣iyane alabsa, \ Bez elmuxal za Čarḳesṭala Buxaʒ́uġo görä mu͑qebaksa,
Šoṭaynaḳ ki, Šoṭin Izi me gorox ḳulane aḳi. \ Isääl bütüm näsilxon za bäxṭävär hesabbale,
Šoṭaynaḳ ki, Bitova Bašarbalen zaynaḳ kala sa äše biq̇i, \ Šoṭay c̣i ə͑vele!
Šoṭay yaq̇en taġalṭoġoynaḳal \ Iz üḳ boḳospsun näsiläxun-näsiläne č̣ovakon.
Šoṭin Iz zorba kiin gele kala äšurxone biq̇i, \ Ičoġo ala efalṭoġo oq̇ane saki.
Kalaluġbalxo taxṭaxune civḳi, \ Goroxṭoġo isä alanebi.
Busaṭoġo neymäṭxon boševḳi, \ Varluṭoġo isä kul amc̣ine yaq̇abadi.
Q̣onʒ́uġon Avrahama q̇a šoṭay näsilä
Mariya Elizabeṭi ṭo͑ġo͑l xib xaša ə͑śa mandiṭuxun oša iz ḳoyane qaybaki.
Elizabeṭi vaxṭ hari ṗaneṗi, šoṭin sa ġare ečeri.
Šoṭay q̇oom-q̇onšiġon Q̣onʒ́uġoy šoṭaynaḳ me kala üḳ boḳospsuna aḳi, ičuxun sagala mu͑qṭun baksay.
Muġumǯi ġine körpä sünnätbsaṭun hari. Šoṭay c̣iya iz bava ḳinäḳ Zäkäriyäṭun laxsun čuresay. *
Äylin nanan isä pine: "Tää, koṭay c̣i Ioan bakale".
Šoṭo piṭun: "Axəri vi q̇oomxoy arane metär c̣i bakala sa amdar tene bu".
Ṭe vädä kiin-biin q̇andriši äylin bavaxunṭun šoṭin iz ġare c̣iya ḳä laxsun čuresuna xavar haq̇i.
Zäkäriyänäl sa daxṭaḳi ḳoṭor čureci iz loxol camepi: "Koṭay c̣i Ioane".
Haṭe saad šoṭay muz qayeci, šoṭinal Buxaʒ́uġo alxəšpsane burqi.
Ṭiya bakala q̇onšiġo isä kala qə͑yene haq̇i, me baki äšurxoy barada exlätxoval Iudeyani bito burux ganxo yäymišebaki.
Ibakalṭoġonal "axəri me äyel kala baki šu bakala?" pi fikiräṭun taysay. Šoṭaynaḳ ki, Q̣onʒ́uġoy kul šoṭay loxoley.
Äylin bava Zäkäriyäy loxol ω͑vel Urufe ciri, šoṭinal metäre xavarečalluġbi:
"Alxəšq̇an baki Israili Buxaʒ́ux Q̣onʒ́uġo! \ Šoṭaynaḳ ki, Iz azuḳa eyex badi šoṭo čarḳesedi,
Šoṭin Iz nökär Davidi näsiläxun \ Yaynaḳ zorba Čarḳesṭale ṗaṗesṗi.
Gele vaxṭ moṭoxun be͑ś Iz ə͑vel xavarečalxoxun avabakesṭi ḳinäḳ
Beš düšmänxoy q̇a yax aksun nu čureġalṭoy kiyexune čarḳesṭi.
Hametär beš bavoġo üḳ boḳospsuna aḳesṭi \ Iz ə͑vel iräzuluġane eyex badi.
Hetäre beš bava Avrahama elasṗi äyit tadey ki,
Yan beš düšmänxoy kiyexun čarḳeci
Hun isä, ay bez bala, Ala Arciṭin yaq̇abi xavarečal ḳaleġalnu,
Šoṭay azuḳa ičoġoy günaxxo baġəšlayinšaksunen
Axəri beš Buxaʒ́ux üḳ boḳosṗale,
Bisuni xožina saal bayinq̇luġa arcalṭoġoy ćoyel išiġ sakane, \ Beš turmoġo šiṗluġi yaq̇a yönbane". *
Körpäl kalabaksunen iz uruf zorbane baksay. Šo israilluġoy be͑ś č̣eġala ġinal ciriḳ čölöne mansṭay.
