; Mrḳ. 2:23-28)
; Mrk'. 2:23-28)
Sa Šamaṭ ġine Isus taxəli äkini aranexun č̣ovakaṭan, Iz šagirdxon burṭunqi sünbülxo čuki ičoġoy mä͑xine śarpi uksa. *
Fariseyxoy bäziṭoġon piṭun: "Vä͑n heṭaynaḳnan Šamaṭ ġine q̇adaġan baki äšurxo biq̇sa?"
Isusen šoṭoġo ǯoġabe tadi: "Daviden q̇a iz ṭo͑ġo͑l bakiṭoġon busa bakaṭan ḳä bsuna ḳaltenanpe?
Šo Buxaʒ́uġoy ḳoyane baci; be͑yinśxoxun bašq̇a šuḳḳali uksuna iǯaza nu bakala Q̣onʒ́uġo häsrbaki śumurxo exṭi käye, iz ṭo͑ġo͑l bakalṭoġoval tanedi". *
Oša pine: "Amdari Ġar Šamaṭ ġineyal q̇onʒ́uxe".
; Mrḳ. 3:1-6)
; Mrk'. 3:1-6)
Q̣eräz sa Šamaṭ ġine Isus ṗurumal sinagoga baci zomebsay. Ṭeṭiya yön kul ṗaralič baki sa amdare buy.
Ḳanun zombalxon q̇a fariseyxon Isusa taxsərkär č̣evkseynaḳ määnäṭun qä͑vesay, Šoṭoṭun fikir tasṭay ki, be͑yn Šamaṭ ġine azarina q̇olaybala yoxsa tää.
Ama Isusen šoṭoġoy ḳä fikirbsuna avaney, šoṭaynaḳal kul ṗaralič baki išq̇ara pine: "Turel hayza, bə͑yex č̣eki!" Ṭe amdaral hayzeri bə͑yexe \ č̣eri.
Oša Isusen šoṭoġo pine: "Vä͑xun xavarez haq̇sa, maṭuva iǯaza bu: Šamaṭ ġine šaaṭluġ bsuna, yoxsa pisluġ bsuna? Šinesa elmoġo čarḳesṭuna, yoxsa šoṭo äfčibsuna?"
Isusen ṭiya bakalṭoġoy bitoṭay loxol be͑ġi ṭe amdara pine: "Vi kula boxoda!" Šoṭin boxonedi, iz kulal q̇olayebaki.
Ḳanun zombalxo q̇a fariseyxo isä gele äǯuġläyinšäki "Isusa ḳä besyan bakon?" pi, maslaatbsaṭun burqi.
; Mrḳ. 3:13-19)
; Mrk'. 3:13-19)
Ṭe ġimxosṭa Isus buruġone laci ki, afərəḳane. Šoṭin dirisṭ üšena Buxaʒ́uġo afərəpsunene č̣ovakesṭi.
Käybakaṭan isä Iz šagirdxo Iz ṭo͑ġo͑l ḳalpi šoṭoġoxun ṗac̣c̣e tana č̣äḳṗi aṗosṭol c̣ine tadi:
morox P̣eṭer c̣i tadi Simon, šoṭay viči Andrey, Iaḳov, Ioan, Filiṗ, Varfolomey,
Maṭfey, Ṭomas, Halfay ġar Iaḳov, Känanči * Simon,
Iaḳovi ġar Iuda saal oša xäyanätbi Iuda Isḳarioṭ.
; Mrḳ. 3:7-12)
; Mrk'. 3:7-12)
Isus šoṭoġoxun sagala buruġoxun ciri, düzänluġa čurepi. Ṭeṭiya Iz bać̣anexun taġala šagirdxoxun bašq̇a, Iudeyinaxun, Yerusalimaxun \ saal Sur q̇a Sidona ə͑śa bakala oćalxoxun hari gele amdarxone buy.
Šorox Isusa u͑mu͑xlaxsa hamal ičoġoy azarxoxun q̇olaybaksaṭun harey. Memiya ičoġosṭa murdar uruf bakaloroxal q̇olayṭunbaksay.
Amdarxoy bitoṭin Isusa lafsṭunaṭun čaləšaksay, šoṭaynaḳ ki, Šoṭoxun č̣eġala zoren bütümä q̇olayebsay
Isusen isä Iz šagirdxoy loxol be͑ġi pine:
He bäxṭävärnan, ay häysä busa bakalorox!
Amdari Ġara görä amdarxon vä͑x nifrätbaṭan, vä͑x ičoġoy aranexun šäṗeci tähḳirbaṭan, ef c̣iya biyaburbaṭan, he bäxṭävärnan! *
Ṭe ġi mu͑qbakanan, mu͑qexun ǯupi-bitanan! Šoṭaynaḳ ki, göynul ef mükäfät kalane. Axəri ṭe amdarxoy bavoġonal xavarečalxoxun hametärṭun häräkätbe. *
Ama vay ef hala, ay varluyorox!
Vay ef hala, ay häysä boš bakalorox!
Amdarxoy bitoṭin ef barada šaaṭ šeymux uḳaṭan, vay ef hala! Axəri šoṭoġoy bavaġonal äfči xavarečalxoxun metärṭun häräkätbe.
Isä vä͑x nexzu, ay Za ibakalxo: ef düšmänxo čurekinan, vä͑x nifrätbalṭoġo šaaṭluġbanan,
vä͑x q̇arġəšbalṭoġo xeyir-bäräkät tadanan, vä͑x inǯiṭmišalṭoġoynaḳ afərəpanan.
Vi sa ćoyel sillä duġiṭaynaḳ ṭə͑yä͑min ćoyal fərəda, vi alin paltara exṭalṭu guraṭal tada.
Šiin vaxun ḳänesa čureġayin tada, vi mala exṭalṭuxunal šoṭo qaydi ma čureki.
Amdarxon vä͑xun mani yöndä räfṭärbsuna čurnansasa, vä͑nal šoṭoġoxun ṭetär räfṭärbanan. *
Ägär sayǯä vä͑x čureġalṭoġonan čuresasa, avuzin ḳä binan baksa ki? Šoṭaynaḳ ki, günaxkärxonal ičoġo čureġalṭoġo čurṭunsa.
Ägär sayǯä vä͑ynaḳ šaaṭluġbalṭoġonan šaaṭluġ bsasa, avuzin ḳä binan baksa ki? Axəri günaxkärxonal ketärṭun bsa.
Ägär tänginä qaydi qoš exṭes bakala \ amdaranan borǯ tasṭasa, avuzin ḳä binan baksa ki? Axəri günaxkärxonal suna tänginä tam qaydi qoš exṭalṭun pi borǯ tasṭa.
Ama vä͑n ef düšmänxo čurekinan, šoṭoġo šaaṭluġ banan, borǯa qaydi qoš haq̇suni umuden ma tadanan. Ṭe vädä ef mükäfät kala bakale, vä͑nal Bitova-Bašarbalṭay ġarmux hesabbakalnan, axəri, Šoṭin sayǯä šaaṭṭoġoynaḳ tää, ama šaaṭluġ nu q̇amišakalṭoġoynaḳ q̇a pisṭoġoynaḳal üḳe boḳospsa.
Ef Bava üḳ boḳosṗal bakalṭullariḳ, vä͑nal üḳ boḳosṗal bakanan.
Divan mabanan ki, vä͑nal divan nu bakanan. Q̣inäyinšmabanan ki, vä͑xal q̇inäyinšmaq̇aṭun bi. Ṭə͑yämiṭoġo baġəšlayinšanan ki, vä͑xal baġəšlayinšeq̇aṭun.
Tadanan - vä͑xal tadeġale. Ṭaṗḳa, źə͑ḳeci, ćaxḳa-ćaxḳa źomol ciriḳ buy sa usḳunen vä͑x tadeġale. Šoṭaynaḳ ki, mani usḳunen usḳalnansa, haṭe usḳunenal vä͑ynaḳ usḳalṭun".
Isusen šoṭoġoynaḳ ṗurumal sa mäsäläne ečeri: "Sa ḳać̣inen ṭə͑yä͑mi ḳać̣ina tašes banekon? P̣o͑ġä͑l kurnu tene bafṭon ki? *
Šagird määlimäxun ala tene, ama tam zombakiṭuxun oša här šagird iz määlim ḳinäḳ bakale. *
Hun \ heṭaynaḳ ṭə͑yä͑minṭay piyel bakala čöpä anksa, ama vi piyel bakala maqa ten aksa?
Vi piyel bakala maqa nu aḳi vičä hetären pes bakon: "Ay viči! Barta vi piyel bakala čöpä č̣evḳaz!" Ay ṗä͑ćolo, süfṭä vi piyel bakala maqa č̣evḳa ki, vi vičey piyel bakala čöpä č̣evḳes bakavax".
; 12:33-35)
; 12:33-35)
"Šaaṭ xoden pis bar tene ečon, pis xodenal šaaṭ bar tene ečon.
Metärluġen, här xod iz baraxune čalxesa. Axəri q̇aratikänäxun inǯil hä͑vteṭunq̇o, cacluġaxunal ṭul teṭun hä͑vq̇on.
Šaaṭ amdaren iz üḳe bakala šaaṭ šeymoġoxune ćoyel č̣evḳon, pis amdaren isä iz üḳe bakala pis šeymoġoxun. Šoṭaynaḳ ki, üḳe ḳä bunesa źomoxun šone č̣eysa.
; 24-27)
; 24-27)
Heṭaynaḳnan Za "ay Q̣onʒ́ux, ay Q̣onʒ́ux" pi ḳale, ama Bez piṭoġo bex tenan ṗaṗespsa?
Bez ṭo͑ġo͑l hari, Bez äyitmoġo ibaki šoṭoġo ämälbala amdar avanan šuva ošq̇arsṭa?
Šo oćala bä͑ġä͑loy kaśṗi ḳoža źe͑ne binorin loxol laxala amdarane ošq̇ar. Selen ćaxḳaṭanal ḳoža zor bineton, ama šoṭo carpes tene bakon, šoṭaynaḳ ki, ḳožin binora źe͑ne loxole laxece.
Ama Bez \ äyitmoġo ibaki šoṭoġo nu ämälbala amdar oćali loxol binorasuz ḳož biq̇ala amdarane ošq̇ar. Selen ṭe ḳoža ćaxeḳon, ḳožal haṭe saad baredon. Ṭe ḳože bisṭun här šeyi axəre bakon".
