TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 69

Book: Jo.

Chapter: 1

Buxaʒ́uġoy Äyit Amdare baksa
Buxačuğoy Əyit Amdare baksa

Verse: 1

Burqesunasṭa Äyit buney. Äyit Buxaʒ́uġoxun sagalaney, Äyit Buxaʒ́uxey.
Burqesunast'a Əyit buney. Əyit Buxačuğoxun sagalaney, Əyit Buxačuxey.

Verse: 2

Šo burqesunasṭa Buxaʒ́uġoxun sagalaney.
Şo burqesunast'a Buxačuğoxun sagalaney.

Verse: 3

Här šeya Šoṭine yaratmiši, yaranmišaki šeyurxoxun sal soġo Šosuz tene yaranmišaki.
Hər şeya Şot'ine yaratmişi, yaranmişaki şeyurxoxun sal soğo Şosuz tene yaranmişaki.

Verse: 4

Šo yäšäyinši orayiney, me yäšäyinšal amdarxoy išiġey.
Şo yəşəyinşi orayiney, me yəşəyinşal amdarxoy işiğey.

Verse: 5

Išiġen bayinq̇luġa c̣alesṭa, bayinq̇luġen šoṭo bäč̣ürpes tene baki.
İşiğen bayinq'luğa s'alest'a, bayinq'luğen şot'o bəc'ürpes tene baki.

Verse: 6

Buxaʒ́uġoy täräfäxun yaq̇abaki sa amdare hari, šoṭay c̣i Ioaney. ^*
Buxačuğoy tərəfəxun yaq'abaki sa amdare hari, şot'ay s'i İoaney. ^*

Verse: 7

Šo šahidluġbseynaḳe harey ki, išiġi barada šahidluġbane, bütüm amdarxonal me šahidluġa ibaki ve͑ bakaṭun.
Şo şahidluğbseynak'e harey ki, işiği barada şahidluğbane, bütüm amdarxonal me şahidluğa ibaki vě bakat'un.

Verse: 8

Šo ič išiġ teney, ama išiġi barada šahidluġbseynaḳe harey.
Şo iç işiğ teney, ama işiği barada şahidluğbseynak'e harey.

Verse: 9

Ṭe išiġ seri išiġey, šo dünyäne \ hariṭoġoy här sunṭu išiġlune bsay.
T'e işiğ seri işiğey, şo dünyəne \ harit'oğoy hər sunt'u işiğlune bsay.

Verse: 10

Šo dünyäneney, dünyänä Šoṭine yaratmiši, ama dünyänen Šoṭo tene čalxi.
Şo dünyəneney, dünyənə Şot'ine yaratmişi, ama dünyənen Şot'o tene çalxi.

Verse: 11

Šo Izṭoġoy ṭo͑ġo͑le hari, ama Izṭoġon Iču teṭun q̇abulbi.
Şo İzt'oğoy t'ǒğǒle hari, ama İzt'oğon İçu tet'un q'abulbi.

Verse: 12

Ama Šoṭin Iču q̇abulbi Iz c̣iya ve͑bakiṭoġo bitova Buxaʒ́uġoy äylux baksuni exṭiyäre tadi.
Ama Şot'in İçu q'abulbi İz s'iya věbakit'oğo bitova Buxačuğoy əylux baksuni ext'iyəre tadi.

Verse: 13

Šorox nä sa amdari äsiläxun, nä bädäni nääl insani čuresunen teṭun baki, ama Buxaʒ́uġoxunṭun baki.
Şorox nə sa amdari əsiləxun, nə bədəni nəəl insani çuresunen tet'un baki, ama Buxačuğoxunt'un baki.

Verse: 14

Äyit Amdar baki beš aranene yäšäyinši. Yan Šoṭay kalaluġa q̇a zora ayanḳi. Šoṭin moṭoġo Iz Bavaxun Šoṭay täk sa Ġar baksunene haq̇i. Izi eysunen Šoṭin yax üḳ boḳospsuni q̇a heṭay seri baksunane aḳesṭi.
Əyit Amdar baki beş aranene yəşəyinşi. Yan Şot'ay kalaluğa q'a zora ayank'i. Şot'in mot'oğo İz Bavaxun Şot'ay tək sa Ğar baksunene haq'i. İzi eysunen Şot'in yax ük' bok'ospsuni q'a het'ay seri baksunane ak'est'i.

Verse: 15

Ioanen Šoṭay barada šahidluġbi osṭaar pine: "Zaxun oša Eġalo zaxun üsṭüne, šoṭaynaḳ ki, zaxun be͑ś buney" pi, Iz barada bez exlätṗi Amdar mone".
İoanen Şot'ay barada şahidluğbi ost'aar pine: "Zaxun oşa Eğalo zaxun üst'üne, şot'aynak' ki, zaxun běš buney" pi, İz barada bez exlətp'i Amdar mone".

Verse: 16

Yan bitoṭin Šoṭay bakalṭuxun hayanq̇i, Šoṭin Iz üḳ \ boḳospsunen yax bol xeyir-bäräkäte tadi.
Yan bitot'in Şot'ay bakalt'uxun hayanq'i, Şot'in İz ük' \ bok'ospsunen yax bol xeyir-bərəkəte tadi.

Verse: 17

Buxaʒ́uġon Iz ḳanuna Moiseyaxune avabakesṭi, üḳ boḳospsuna q̇a seri bakala yaq̇a aḳesṭuna isä Isus *Xrisṭosane tapšurbi.
Buxačuğon İz k'anuna Moiseyaxune avabakest'i, ük' bok'ospsuna q'a seri bakala yaq'a ak'est'una isə İsus *Xrist'osane tapşurbi.

Verse: 18

Buxaʒ́uġo šuḳḳalen sal sa vädä tene aḳe, ama Bavay ṭo͑ġo͑l bakala täk sa Ġaren Buxaʒ́uġo yax čalxesedi
Buxačuğo şuk'k'alen sal sa vədə tene ak'e, ama Bavay t'ǒğǒl bakala tək sa Ğaren Buxačuğo yax çalxesedi

Ioan Xrisṭos tene
İoan Xrist'os tene

(Maṭ. 3:1-12

; Mrḳ. 1:1-8

; Luḳ. 3:1-18

)
(Mat'. 3:1-12

; Mrk'. 1:1-8

; Luk'. 3:1-18

)

Verse: 19

Iudeyxoy kalaṭoġon Ioanaxun "hun šunu?" pi xavar haq̇seynaḳ Yerusalimaxun be͑yinśxo q̇a leviġo šoṭay ṭo͑ġo͑lṭun yaq̇abi. Ṭe vädä Ioanen šahidluġbi
İudeyxoy kalat'oğon İoanaxun "hun şunu?" pi xavar haq'seynak' Yerusalimaxun běyinšxo q'a leviğo şot'ay t'ǒğǒlt'un yaq'abi. T'e vədə İoanen şahidluğbi

Verse: 20

düzä pi č̣aṗtenebi, šoṭin qay pine: "Zu Xrisṭos tezu".
düzə pi c'ap'tenebi, şot'in qay pine: "Zu Xrist'os tezu".

Verse: 21

Šoṭoġon Ioanaxun xavarṭun haq̇i: "P̣oy hun šunu? Ilyanu?" Ioanen "tää, šo tezu" pine. Ṭe vädä šoṭoġon xavarṭun haq̇i: "Bärkä yan yaq̇be͑ġala *xavarečalnu?" Ioanen "tää" ǯoġabe tadi. ^*
Şot'oğon İoanaxun xavart'un haq'i: "P'oy hun şunu? İlyanu?" İoanen "təə, şo tezu" pine. T'e vədə şot'oğon xavart'un haq'i: "Bərkə yan yaq'běğala *xavareçalnu?" İoanen "təə" coğabe tadi. ^*

Verse: 22

Šoṭoxun saal xavarṭun haq̇i: "P̣oy hun šunu? Yax yaq̇abiṭoġo ḳä ǯoġab taden? Vi barada ḳän pes bakon?"
Şot'oxun saal xavart'un haq'i: "P'oy hun şunu? Yax yaq'abit'oğo k'ə coğab taden? Vi barada k'ən pes bakon?"

Verse: 23

Ioanen Isaya *xavarečali pi äyitmoġone ǯoġab tadi: \ "*Q̣onʒ́uġoy yaq̇a düzbanan" pi \ amc̣i oćala bayanbalṭay säszu". ^*
İoanen İsaya *xavareçali pi əyitmoğone coğab tadi: \ "*Q'ončuğoy yaq'a düzbanan" pi \ ams'i oç̌ala bayanbalt'ay səszu". ^*

Verse: 24

Ṭe vädä bäzi yaq̇abaki *fariseyxon
T'e vədə bəzi yaq'abaki *fariseyxon

Verse: 25

Ioanaxun xavarṭun \ haq̇i: "P̣oy hun *Xrisṭos, Ilya nääl yan yaq̇be͑ġala xavarečal tenusa, heṭaynaḳen xena badi ḳunuḳbsa?"
İoanaxun xavart'un \ haq'i: "P'oy hun *Xrist'os, İlya nəəl yan yaq'běğala xavareçal tenusa, het'aynak'en xena badi k'unuk'bsa?"

Verse: 26

Ioanen šoṭoġo ǯoġabe tadi: "Zu xenenez *ḳunuḳbsa, ama ef arane vä͑n nu čalxala sa Tano.
İoanen şot'oğo coğabe tadi: "Zu xenenez *k'unuk'bsa, ama ef arane və̌n nu çalxala sa Tano.

Verse: 27

Šo zaxun oša eġale. Zu Šoṭay sal toroḳali baġa šadbsunal tez lafsṭa".
Şo zaxun oşa eğale. Zu Şot'ay sal torok'ali bağa şadbsunal tez lafst'a".

Verse: 28

Me äšurxo Iordan oqe ṭe soġo täräf - Beṭanyina, Ioanen xena badi *ḳunuḳbala galane bakey.
Me əşurxo İordan oqe t'e soğo tərəf - Bet'anyina, İoanen xena badi *k'unuk'bala galane bakey.

Ḳunuḳbal Ioani šahidluġbsun
K'unuk'bal İoani şahidluğbsun

Verse: 29

Äyč̣indäri Ioanen Isusi šoṭay ṭo͑ġo͑l eysuna aḳi pine: "Dünyäni günaxa Iz loxol exṭala Buxaʒ́uġoy Q̣uzi mone!
Əyc'indəri İoanen İsusi şot'ay t'ǒğǒl eysuna ak'i pine: "Dünyəni günaxa İz loxol ext'ala Buxačuğoy Q'uzi mone!

Verse: 30

"Zaxun oša Eġalo zaxun üsṭüne, šoṭaynaḳ ki, zaxun be͑ś buney" pi Iz barada bez exlätṗi Amdar mone.
"Zaxun oşa Eğalo zaxun üst'üne, şot'aynak' ki, zaxun běš buney" pi İz barada bez exlətp'i Amdar mone.

Verse: 31

Zu Šoṭo tez čalxsay, ama Šoṭo Israila čalxesṭeynaḳez xenen *ḳunuḳbsa hari".
Zu Şot'o tez çalxsay, ama Şot'o İsraila çalxest'eynak'ez xenen *k'unuk'bsa hari".

Verse: 32

Ioanen šahidluġbi pine: "Azḳi ki, Uruf göynuxun göyärčin ḳinäḳ ciri Šoṭay loxole čurpi.
İoanen şahidluğbi pine: "Azk'i ki, Uruf göynuxun göyərçin k'inək' śiri Şot'ay loxole çurpi.

Verse: 33

Zu Šoṭo tez čalxsay, ama xenen *ḳunuḳbseynaḳ za Yaq̇abiṭin Ičin za peney: "Uruf ši loxol ciri mansṭuna aḳayin, ω͑vel Urufen *ḳunuḳbalo ^* Šone".
Zu Şot'o tez çalxsay, ama xenen *k'unuk'bseynak' za Yaq'abit'in İçin za peney: "Uruf şi loxol śiri manst'una ak'ayin, Ǐvel Urufen *k'unuk'balo ^* Şone".

Verse: 34

Zuval moṭo aḳi šahidluġezbsa ki, "Buxaʒ́uġoy Ġar mone".
Zuval mot'o ak'i şahidluğezbsa ki, "Buxačuğoy Ğar mone".

Isusi samǯi šagirdxo
İsusi samci şagirdxo

Verse: 35

Äyč̣indäri Ioan iz šagirdxoxun ṗo͑ġo͑ iz ṭo͑ġo͑l ṗurum ṭeṭiya \ čurpeney.
Əyc'indəri İoan iz şagirdxoxun p'ǒğǒ iz t'ǒğǒl p'urum t'et'iya \ çurpeney.

Verse: 36

Šoṭin ičoġoy ṭo͑ġo͑lxun č̣ovakala Isusa aḳi pine: "Be͑ġanan, Buxaʒ́uġoy Q̣uzi mone!"
Şot'in içoğoy t'ǒğǒlxun c'ovakala İsusa ak'i pine: "Běğanan, Buxačuğoy Q'uzi mone!"

Verse: 37

Me ṗä͑ šagirdal šoṭay äyitä ibaki Isusi bać̣anexunṭun taci.
Me p'ə̌ şagirdal şot'ay əyitə ibaki İsusi bač'anexunt'un taśi.

Verse: 38

Isusen fərəpi Iz bać̣anexun eġalṭoġo aḳi šoṭoġo pine: "Vä͑x ḳä lazəm?" Šoṭoġon Isusa piṭun: "Ravvi, Hun mayan mansṭa?" ("Ravvi" "Määlim" upsune.)
İsusen fırıpi İz bač'anexun eğalt'oğo ak'i şot'oğo pine: "Və̌x k'ə lazım?" Şot'oğon İsusa pit'un: "Ravvi, Hun mayan manst'a?" ("Ravvi" "Məəlim" upsune.)

Verse: 39

Isusen šoṭoġo pine: "Zaxun ekinan, aḳalnan". Šoroxal taci Isusi maya mansṭuna aṭunḳi, ṭe ġi vic̣imǯi saadal ciriḳäl ^* Šoṭoxunṭun baki.
İsusen şot'oğo pine: "Zaxun ekinan, ak'alnan". Şoroxal taśi İsusi maya manst'una at'unk'i, t'e ği vis'imci saadal śirik'əl ^* Şot'oxunt'un baki.

Verse: 40

Ioanaxun ibaki Isusi bać̣anexun taci ṗä͑ tanaxun soġo Simon P̣eṭeri viči Andreyey.
İoanaxun ibaki İsusi bač'anexun taśi p'ə̌ tanaxun soğo Simon P'et'eri viçi Andreyey.

Verse: 41

Šoṭin süfṭä taci iz viči Simona bä͑ġä͑bi šoṭo pine: "Yan *Xrisṭosa bä͑ġä͑yanbi!" ("Xrisṭos" "lä͑ä͑meci, yäni č̣äḳeci amdar" upsune.)
Şot'in süft'ə taśi iz viçi Simona bə̌ğə̌bi şot'o pine: "Yan *Xrist'osa bə̌ğə̌yanbi!" ("Xrist'os" "lə̌ə̌meśi, yəni c'ək'eśi amdar" upsune.)

Verse: 42

Andreyen šoṭo Isusi ṭo͑ġo͑le tašeri. Isusen Simoni loxol be͑ġi pine: "Hun Ioani ġar Simonnu, ama Ḳefa ḳaleġalnu". (Ḳefa isä greḳi muzin P̣eṭer, yäni źe upsune.)
Andreyen şot'o İsusi t'ǒğǒle taşeri. İsusen Simoni loxol běği pine: "Hun İoani ğar Simonnu, ama K'efa k'aleğalnu". (K'efa isə grek'i muzin P'et'er, yəni ǰe upsune.)

Verse: 43

Äyč̣indäri Isus Galileyina taysune čureci. Šoṭin Filiṗa bä͑ġä͑bi šoṭo pine: "Bezi bać̣anexun eki".
Əyc'indəri İsus Galileyina taysune çureśi. Şot'in Filip'a bə̌ğə̌bi şot'o pine: "Bezi bač'anexun eki".

Verse: 44

Filiṗal, Andrey q̇a P̣eṭer ḳinäḳ Beṭsayda šähärexuney.
Filip'al, Andrey q'a P'et'er k'inək' Bet'sayda şəhərexuney.

Verse: 45

Filiṗen Naṭanaila bä͑ġä͑bi šoṭo pine: "Moiseyi ḳanuna cameci, *xavarečalxonal pi Amdara bä͑ġä͑yanbi. Mo nazareṭlu Iosifi ġar \ Isuse".
Filip'en Nat'anaila bə̌ğə̌bi şot'o pine: "Moiseyi k'anuna śameśi, *xavareçalxonal pi Amdara bə̌ğə̌yanbi. Mo nazaret'lu İosifi ğar \ İsuse".

Verse: 46

Naṭanailen šoṭo pine: "Nazareṭaxun šaaṭ sa šey č̣eneġon ki?" Filiṗen isä "eki, hunǯä aḳalnu" pine.
Nat'anailen şot'o pine: "Nazaret'axun şaat' sa şey c'eneğon ki?" Filip'en isə "eki, huncə ak'alnu" pine.

Verse: 47

Isusen Naṭanaili Ičuč eysuna aḳi šoṭay barada metäre pi: "Mo iz üḳe bič̣luġ nu bakala äsil sa israillune".
İsusen Nat'anaili İçuç eysuna ak'i şot'ay barada metəre pi: "Mo iz ük'e bic'luğ nu bakala əsil sa israillune".

Verse: 48

Naṭanailen "Hun za ḳän čalxsa?" pi Šoṭoxun xavare haq̇i. Isusen šoṭo ǯoġabe tadi: "Filiṗen va ḳalḳalṭuxun be͑ś va inǯilnä xodin oq̇a aḳezuy".
Nat'anailen "Hun za k'ən çalxsa?" pi Şot'oxun xavare haq'i. İsusen şot'o coğabe tadi: "Filip'en va k'alk'alt'uxun běš va incilnə xodin oq'a ak'ezuy".

Verse: 49

Naṭanailen Šoṭo pine: "Ravvi, Buxaʒ́uġoy Ġar Hunnu, Israili padčaġ Hunnu!"
Nat'anailen Şot'o pine: "Ravvi, Buxačuğoy Ğar Hunnu, İsraili padçağ Hunnu!"

Verse: 50

Isusen pine: "Bezi va inǯilnä xodin oq̇a azḳi upsuna görän Za ve͑ baki? Hun koṭoxunal kala šeyurxo aḳalnu".
İsusen pine: "Bezi va incilnə xodin oq'a azk'i upsuna görən Za vě baki? Hun kot'oxunal kala şeyurxo ak'alnu".

Verse: 51

Oša ṗurum šoṭo pine: "Serina, serinaz vä͑x nex: göye qayesuna saal Buxaʒ́uġoy angelxo *Amdari Ġare ṭo͑ġo͑l laci-ciysuna aḳalnan". ^*
Oşa p'urum şot'o pine: "Serina, serinaz və̌x nex: göye qayesuna saal Buxačuğoy angelxo *Amdari Ğare t'ǒğǒl laśi-śiysuna ak'alnan". ^*

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.