; 11:21-24; Mrḳ. 6:7-13; Luḳ. 9:1-6)
; 11:21-24; Mrk'. 6:7-13; Luk'. 9:1-6)
Moṭoxun oša Q̣onʒ́uġon q̇eräz sa yetmiš tan č̣äḳṗi, šoṭoġoval ṗä͑ tan-ṗä͑ tan Iz taġala šähärmoġo q̇a ayizmoġone yaq̇abi.
Šoṭoġo pine: "Mähsul gelene, äšṗal isä mal, šoṭaynaḳal mähsuli Q̣onʒ́uġo xoyinśbanan ki, Iz mähsula girbseynaḳ äšṗalxoq̇an yaq̇abi. *
Takinan! Zu vä͑x q̇uziġo ǯanavarxoy boš yaq̇abala ḳinäḳez yaq̇absa. *
Vä͑xun nä toray ma exṭanan, nä zänbil, nääl ki toroḳal. Yaq̇al šuḳḳalaxun savaxeyir-aabatxeyir ma banan.
Šinesa ḳoya baġaṭan süfṭä "vä͑ynaḳ xeyirq̇an baki!" upanan.
Ṭeṭiya xeyir-bäräkätä layiġ sa amdar bakayin, efi šoṭaynaḳ čureci xeyir-bäräkät šoṭay loxol bakale. Nu bakayin isä šo vä͑ynaḳ qaybakale.
Ef baci ḳoyal mandanan, vä͑x tadalṭuxun ukanan-u͑ġä͑nan, šoṭaynaḳ ki, äšṗal iz haq̇q̇a layiġe. Ḳoyaxun ḳoya ma č̣ovakanan.
Maninesa sa šähäre baġaṭan vä͑x q̇abulṭunbsasa, ef be͑ś laxalṭu ukanan.
Ṭiya bakala azariġoval q̇olaybanan, šoṭoġo "Buxaʒ́uġoy \ padčaġluġ vä͑x ene ə͑śalayinšakene" upanan.
Ama maninesa šähäre vä͑x nu q̇abulbayṭun, ṭe šähäri küčämoġo č̣ekinan, metär upanan:
"Ef šähäre beš turmoġo arci tozal caṗṭi vä͑xyan qaysṭa, ama moṭoval avabakanan ki, Buxaʒ́uġoy padčaġluġ ene ə͑śabakene."
Vä͑x nexzu, axərənǯi ġine ṭe šähäri hal Sodomaxun betär bakale.
Vay vi hala, ay Xorazin, vay vi hala, ay Beṭsayda! Vä͑sṭa baki möǯüzoox Sur q̇a Sidona bakiniy, šoṭoġon gele vaxṭaxun čul lapi ičoġoy bel žeq̇ cipi * toobabeṭuniy.
Šoṭaynaḳal, axərənǯi ġine ef hal Sur q̇a Sidonaxun betär bakale.
P̣oy hun, ay Ḳefernaum? Fikirenbsa ki, va göynul e͑qevḳalṭun? Tää! Vi bula oćala badalṭun!
Metärluġen, vä͑x u͑mu͑xlaxalo Za u͑mu͑xlaxine baksa, vä͑x ṭo͑o͑xbalo za ṭo͑o͑xbine baksa. Za ṭo͑o͑xbalo isä Za Yaq̇abiṭune ṭo͑o͑xbi baksa". * \ Yetmiš šagirdi qaybaksun
Yetmiš šagird mu͑q-mu͑q qaybaki, piṭun: "Ay Q̣onʒ́ux! Vi c̣iyen ämirbaṭan murdar urufxoval yax tabiṭun baksa!"
Isusen šoṭoġo metäre ǯoġab tadi: "Zu Šeytani c̣ä͑q̇ ḳinäḳ göynuxun \ bisṭuna aḳezu.
Mone, Zu vä͑x diziḳxo q̇a sḳarṗionxo, düšmäni ḳä zor bunesa vä͑n zäräl zapinuṭ turin oq̇a laxi ćaxćuxpsuna exṭiyärez tadi. *
Ama urufxoy vä͑x tabi baksuna tää, ef c̣iyurxoy göynul camesuna mu͑q bakanan".
Metär upsun q̇a ω͑vel Urufi mu͑qluġ Isusi loxol ciysun sane baki, Šoval mu͑qluġen buybaki pine: "Ay göye q̇a oćali Q̣onʒ́ux bakala Bava! He šaaṭa ki, moṭo ičoġo haq̇ullu, kamallu hesabbalṭoġoxun č̣aṗbi xuri äyloġoynaḳen qaypi! Hoo, ay Bava, mo Vi šaaṭ niyätey.
Bez Bavay täräfäxun här šey Zane tadece. Ġare Šu baksuna Iz Bavaxun bašq̇a šuḳḳalen tene ava. Bavay Šu baksunal Iz Ġaraxun q̇a Iz Ġaren avabakesṭun čureġala amdarxoxun bašq̇a šuḳḳalen tene ava". *
Oša Isus šagirdxoč fərəpi šoṭoġo ǯöyǯä pine: "He bäxṭäväre ṭe pulmux ki, ef aḳalṭoġone aksa!
Vä͑x nexzu: xavarečalxoy q̇a padčaġxoy geleṭine ef aḳalṭoġo aksun čureci, ama teṭun aḳi, ef ibakalṭoġoval ibaksun čurṭunci, ama teṭun ibaki".
Sa ḳanun zombalen Isusa \ sinäyinšbseynaḳ hayzeri pine: "Määlim, zu ḳä šaaṭluġ baz ki, hämišäluġ yäšäyinšä haq̇az?"
Isusenal šoṭoxun xavare haq̇i: "Ḳanuni boš ḳä camece? Ḳalpi hetären q̇amišaksa?"
Šoṭin ǯoġabe tadi: "Q̣onʒ́uġo, Vi Buxaʒ́uġo vi bütüm üḳen, vi bütüm elmuġen, vi bütüm zoren, saal vi bütüm haq̇əlen čureki". Saal "vi ə͑śaṭu hun va čureġalṭullariḳ čureki".
Isusen šoṭo pine: "Hun düz ǯoġaben tadi. Haketäräl ba - yäšäyinšalnu". *
Ama ḳanun zombalen iču tämizä č̣evkseynaḳ ṗurum Isusaxun xavare haq̇i: "P̣oy bez iśoo šuva?"
Isusen metäre ǯoġab tadi: \ "Sa amdar Yerusalimaxun Yerixoya taġala yaq̇e loxol amdar fu͑q̇ḳalxoy kiyene kofsṭa. Fu͑q̇ḳalxon šoṭay paltara č̣eq̇i, šoṭo ṭapi, oša isä elmoġoy loxol barti taṭunsa.
Ṭetäre baksa ki, ṭe yaq̇en sa be͑yinśe č̣ovaksa. Šoṭin me amdara aḳaṭan č̣ovaki yaq̇e ṭe soġo täräfene taysa.
Sa leviluyal ṭeṭiya ə͑śalayinšakaṭan ṭe amdara aḳi č̣ovaki yaq̇e ṭe soġo täräfene taysa.
Samal oša isä haṭe yaq̇en sa samariyalune č̣ovaksa. Šoṭin me amdara aḳaṭan šoṭo iz goroxe eysa,
šoṭay yaroġo č̣äyinen q̇a finen oc̣ḳi ġaćene. Oša me amdara iz elema arcevḳi q̇onaġxo mandala galane ešṭa, šoṭay q̇ulluġene čure.
Äyč̣indäri šoṭin q̇onaġ mandala ḳožin kalaṭu č̣evḳi ṗä͑ dinar * tadi nexe: "Me amdara šaaṭ be͑ġa, ägär moṭoxunal gele vi xarǯ č̣eġayin, zu qoš qaybakaṭan va tadoz."
Vi zänden, me xib tanaxun fu͑q̇ḳalxoy kiyel bafṭi amdari iśoo manuva?"
Ḳanun zombalen ǯoġabe tadi: "Šoṭaynaḳ üḳ boḳosṗiyo". Isusenal šoṭo pine: "Ṭe vädä taki, hunal haketär ba".
Isus Iz šagirdxoxun yaq̇ taġaṭan šorox yaq̇e loxol bakala sa ayizeṭun baci. Memiya Marṭa c̣iyen sa čuġon Šoṭo iz ḳoyane ḳalpi.
Šoṭay Mariya c̣iyen sa xunčine buy. Šo Q̣onʒ́uġoy turmoġosṭa arci Šoṭay äyitmoġone u͑mu͑xlaxsay. *
Marṭay isä bul äšlä gärgürey. Šo Isusa ə͑śalayinšaki pine: "Ay Q̣onʒ́ux! Ten aksa ki, bez xunčen äšurxo bütümä bez loxole bose? Koṭo upa ki, za kömäybeq̇an!"
Q̣onʒ́uġon isä šoṭo metäre ǯoġab tadi: "Marṭa, Marṭa, hun gele šeyaxunen fikirbi naraat baksa,
ama lazəm bakalo täk sa šeye. Mariyan hägigi lazəm bakalṭune ičeynaḳ č̣äḳṗe. Moval iz kiyexun tene haq̇eġal".
