)
)
Bütüm naloggirbalxo q̇a günaxkärxo Isusa u͑mu͑xlaxseynaḳ Iz ṭo͑ġo͑lṭun eysay.
Fariseyxon q̇a ḳanun zombalxon isä "me amdaren günaxkärxone q̇abulbsa, šoṭoġoxun śume uksa" pi ṭoṭoṭunney. *
Ṭe vädä Isusen šoṭoġoynaḳ me mäsälinäne ečeri:
"Sa amdari sabać eġele bu, sa ġiyal šoṭoġoy sunṭu aćesebsa. Ef zänden, šoṭin doxsan vuy eġela čöle barti, ṭe aći eġela bä͑ġä͑bamin šoṭo qä͑vteneġon ki?
Bä͑ġä͑biyal šoṭo mu͑q-mu͑q iz ä͑mna bel laxi,
ḳoya hari isä iz dosṭurxo, q̇onšiġo ḳalpi tene uḳon ki, "ekinan, bezi mu͑qluġa šärik bakanan, aćesṗi bez eġela bä͑ġä͑bezu"?
Isä avabakanan ki, göynulal sa toobabi günaxkärä görä doxsan vuy toobina ehṭiyäǯ nu bakala düzgün amdara görä mu͑qbaksunaxun gele mu͑qbakalṭun.
Isä vä͑ynaḳ sa mäsäläl exlätṗaz. Sa čuġoy vic̣ draxmane * bu, sa ġiyal šoṭin šoṭoġoy sunṭu aćesebsa. Ef zänden, šoṭin ṭe sa draxmina bä͑ġä͑bamin šama bäč̣üḳṭi ḳožin biṗ dönbinä śampi šoṭo tene qä͑veġon ki?
Bä͑ġä͑biyal iz ə͑śaṭoġo, q̇onšiġo ḳalpi tene uḳon ki, "ekinan, bezi mu͑qluġa šärik bakanan, aćesṗi tänginä bä͑ġä͑bezu"?
Isä avabakanan ki, Buxaʒ́uġoy angelxoval toobabi sa günaxkärä görä mu͑qṭunbaksa".
Isusen moṭoval exlätebi: "Sa amdari ṗä͑ ġare bu.
Sa ġi ġarmoġoy mic̣iḳṭin iz bava nexe: "Ay bava, vi var-dövlätäxun bez paynu kofṭalṭu za tada". Bavanal iz var-dövlätä iz ṗä͑ ġare arane ǯöyebsa.
Sa hema ġi oša mic̣iḳ ġaren iz bakalṭu girbi ä͑xil sa oćala yaq̇ane bafsṭa. Šoṭin ṭiya ṗaṗiṭuxun oša pozġun yäšäyinš č̣ovakesṭi iz var-dövlätä čarḳesesṭa.
Ġaren iz bakala här šeya xašlayinšebsa. \ Samal oša, ṭe ölkinä kala sa busaluġe baksa. Šoṭin čätinluġ aksane burqsa.
Moṭaynaḳal ġaren ṭe ölkin amdarxoy sunṭay ṭo͑ġo͑l äšbalane baksa. Ṭe amdaren šoṭo iz oćalxo bo͑q̇ be͑ġsane yaq̇absa.
Šo ṭema busane mansṭa ki, bo͑q̇urxon ukala yemenal tapana boševksuna iräzine baksa, ama hašoṭoval tadal tene baksa.
Ġaren iz taxsəra q̇amišakaṭan isä nexe: "Bez bavay heq̇ädär tänginen äyiteci äšṗale bu, bitoṭayal bošamin ukala śume bu. Zu isä memiya busa bisaz!
Hayzeri bavay ṭo͑ġo͑l taci \ šoṭo uḳoz: "Ay bava, zu göye * q̇a vi be͑ś günaxezbe.
Zu ene vi ġar ḳalesuna layiġ tezu. Za tänginen äyitṗi sa äšṗal ḳinäḳ hesabba".
Metärluġen, ġar hayzeri iz bavay ṭo͑ġo͑le taysa. Šo hälä ä͑xil amaq̇un iz bavan šoṭo aḳi goroxe eysa. Iz ġare be͑ś ṭiṭeri šoṭo q̇užbi mučene.
Ġaren nexe: "Ay bava, zu göye q̇a vi be͑ś günaxezbi. Zu ene vi ġar ḳalesuna layiġ tezu."
Bavan isä iz nökärxo nexe: "Usum bakanan, än gözäl xälät ečeri šoṭo lapesṭanan. Iz ḳäšine boġoćal lavḳanan, iz turel toroḳal lapesṭanan.
Kökbi mozinal ečeri śampanan. Ekinan uken-u͑ġe͑n mu͑qluġben!
Šoṭaynaḳ ki, bezi me ġar ṗureney - qayebaki, aćeney - bä͑ġä͑neci". Metärluġen, me mu͑qluġa č̣ovakesṭaṭun burqsa.
Bavay kala ġar isä čölöney. Šo ḳoya qaybakaṭan fare, äčin säsurxo ibaki
nökärxoy sunṭu iz ṭo͑ġo͑l ḳalpi xavare haq̇sa: "Mo hiḳä?"
Nökären šoṭo nexe: "Vi vičine qaybake. Vi bavanal šoṭay salamat qaybaksuna görä kökbaki mozinane śampe".
Kala ġar ṭeq̇ädär äǯuġläyinšebaksa ki, bona baysunal tene čuresa. Bavan isä č̣öš č̣eri šoṭo xoyinśebsa.
Ama ġaren iz bava metäre ǯoġab tasṭa: "Be͑ġa, hema usene ki, vaynaḳ nökär ḳinäḳ äšezbsa. Sal sa vädäl vi äyitäxun tez č̣ere. Ama zaynaḳ sa kečin balal ten q̇iymiši ki, bez dosṭurxoxun \ käyi-u͑ġä͑z.
Me vi ġaren isä vi bütüm var-dövlätä taraḳala čupuxxoynaḳ xašlayinši čarḳesedi. Ama šo qaybakaṭan hun ičeynaḳ kökbi mozinan śame".
Bavan šoṭo nexe: "Ay bez ġar, axəri hun hämišä zaxunnu, bez bakaloval bito vine.
Ama yan häysä mu͑q bakalayan, mu͑qluġ č̣ovakesṭalayan! Axəri, vi me viči ṗureney - qayebaki, šo aćeney - bä͑ġä͑neci!".
