; Mrḳ. 6:7-13)
; Mrk'. 6:7-13)
Isusen Iz ṗac̣c̣e šagirdä Iz ṭo͑ġo͑l ḳalpi šoṭoġo bito murdar urufxo č̣evkseynaḳ saal azarxo q̇olaybseynaḳ zor q̇a exṭiyäre tadi.
Oša šoṭoġo Buxaʒ́uġoy padčaġluġi barada karoozbsa, azariġo q̇olaybsane yaq̇abi.
Šoṭoġo metäre pi: "Yaq̇eynaḳ hiḳḳal - nä čombaġ, nä toray, nä śum, nä tängä, nääl ki badalbseynaḳ guraṭ ma exṭanan.
Mani ḳoya baġaynan, ṭeṭiya mandanan, ṭeṭiinal yaq̇a bafṭanan.
Ama maya ki vä͑x nu q̇abulbayṭun, ṭe šähärexun č̣eġaṭan ef turmoġoy tozal caṗṭanan. Barta mo šoṭoġoynaḳ sa niśanq̇an baki". *
Metärluġen, šorox yaq̇a bafṭi här gala Mu͑q Xavara yäymišbsun saal azarxo q̇olaybsun ayizba-ayiz taraṭunpi.
; Mrḳ. 6:14-16)
; Mrk'. 6:14-16)
Bütüm me exlätxo hari ṭeṭrarx * Irodiyal u͑mu͑ġo ṗaneṗi, šoṭinal tene avay ki, ḳäq̇an fikirbi. Šoṭaynaḳ ki, bäziṭoġon "mo Ioane ṗuri ganuxun be͑yinbake",
bäziṭoġon "Ilyane hare", bäziṭoġon "mo damna xavarečalxoxun soġone be͑yinbake" nexṭuniy. *
Iroden isä nexey: "Ioani bula boṭesṭezu, ṗoy iz barada me exlätxo taġala amdar šuva baki?" Šo Isusa aḳseynaḳ bisaney.
; Mrḳ. 6:30-44)
; Mrk'. 6:30-44)
Aṗosṭolxon * Isusi ṭo͑ġo͑l qaybaki ičoġoy biq̇i äšurxoy barada Šoṭo exlätṭunbi. Oša Isusen šoṭoġo Ičuxun Beṭsayda uḳala sa šähärene tašeri.
Ama ǯamaaten me barada avabaki Šoṭay qošṭane bafṭi. Isusen šoṭoġo \ šaaṭe q̇abulbi, šoṭoġoynaḳ Buxaʒ́uġoy padčaġluġaxune exlätṗi, q̇olaybaksuna ehṭiyäǯ bakalṭoġoval q̇olayebi.
Ene be͑ġ bateksay. P̣ac̣c̣e šagirdal Isusi ṭo͑ġo͑l hari Šoṭo piṭun: "Ǯamaata tärba, barta härrämoġo bakala ganxo q̇a ayizmoġo taci ičoġoy baskseynaḳ gaq̇aṭun bä͑ġä͑bi, hamal sa šey haq̇i käyeq̇aṭun. Axəri yan miya čöl ganuyan".
Ama Isusen šoṭoġo pine: "Koṭoġo ukun vä͑n tadanan". Šagirdxon piṭun: "Yasṭa qo śumaxun q̇a ṗä͑ čälinäxun bašq̇a hiḳḳal buteyax. Sayǯä taci mema amdareynaḳ ukun haq̇alane mande!"
Ṭeṭiya isä qo hazara ə͑śa išq̇are buy. Ama Isusen Iz šagirdxo pine: "Šoṭoġo däsṭä-däsṭä, älli-älli arcevḳanan".
Šagirdxonal ičoġo pi ḳinäḳ arcevṭunḳi.
Isusen qo śuma q̇a ṗä͑ čälinä exṭi göynul be͑ġi šükürbala afərənane pi. Oša šoṭoġo ǯöybi Iz šagirxone tadi ki, ǯamaata paybeq̇aṭun.
Bito käyi-boṭunši, avuzin mandala ḳoṭorxoxun isä ṗac̣c̣e zänbile gireci.
; Mrḳ. 8:27-30)
; Mrk'. 8:27-30)
Sa ġi Isusen täk afərənney. Šagirdxo Šoṭo ə͑śalayinšṭunbaki. Isusen šoṭoġoxun xavare haq̇i: "Ǯamaaten ḳä nexe? Zu šuzu?"
Šoṭoġon metärṭun ǯoġab tadi: "Bäziṭoġon Ḳunuḳbal Ioan, bäziṭoġon - Ilya, bäziṭoġon isä nexṭun ki, damna xavarečalxoxun soġone be͑yinbake". *
Ṭe vädä Isusen xavare haq̇i: "P̣oy vä͑n Za šunan hesabbsa?" P̣eṭeren ǯoġabe tadi: "Hun Buxaʒ́uġoy Xrisṭosnu". *
Ama Isusen Iz šagirdxo tapšurebi ki, me barada šuḳḳala maq̇aṭun pi.
; Mrḳ. 8:31-9:1)
; Mrk'. 8:31-9:1)
Oša Šoṭin pine: "Amdari Ġara aġsaq̇q̇alxon, samǯi be͑yinśxon q̇a ḳanun zombalxon gele äzyät tadalṭun, Šoṭoxun ćo taradalṭun, Šoṭo bespalṭun. Ama ṗuriṭay xibimǯi ġine Šo be͑yinbakale".
Oša bitoṭu pine: "Ägär šunesa Bez bać̣anexun eysun čuresasa, ičuxun kul haq̇eq̇an, här ġiyal Bez bać̣anexun iz xača exṭiq̇an hari. *
Šoṭaynaḳ ki, šiin iz elmoġo efsun čureġayin, aćesṗale, ama šiin iz elmoġo zaynaḳ aćesṗi bakayin, šoṭo efale. *
Axəri bito dünyänä q̇azayinši häläl vi elmoġo aćespsaxun nääl ki äfčibaksaxun ten čarḳeġalsa, šoṭay ḳä xeyirä bu?
Šin Zaxun saal Bez äyitmoġoxun oṭṗayin, Amdari Ġarenal Izi, Iz Bavay saal ə͑vel angelxoy \ tamtaraġen eġaṭan šoṭoxun oṭṗale.
Vä͑x düzinäz nex: memiya čurpiṭoġoy bäziyorox Buxaʒ́uġoy padčaġluġi eysuna lap ičoġoy piin aḳiṭuxun oša biyalṭun"
; Mrḳ. 9:2-8)
; Mrk'. 9:2-8)
Me äyitmoġoxun oša muġ ġine č̣ovaki. Isusen Ičuxun P̣eṭera, Ioana saal Iaḳova exṭi afərəpseynaḳ buruġone laci.
Isusen afərəḳaṭan Izi aḳesun badalebaki, Izi paltari irängäl map-mac̣i, c̣aldalane baki.
Hame vädine ṗä͑ išq̇ar hari Isusaxun exlätpsaṭun burqi. Moṭoġoy soġo Moisey, ṭe soġo isä Ilyaney.
Šoṭoġon tamtaraġen hari Isusi Yerusalima Izi bisuni bex ṗaṗespsuni baradaṭun exlätpsay.
P̣eṭera q̇a ičuxun bakalṭoġo isä bä͑ġä͑loy neṗene ćaxṗey. Ama muġurbaki šoṭoġon Isusi tamtaraġa saal Ičuxun čurpi ṗä͑ išq̇araṭun aḳi.
Išq̇arxo Isusaxun ǯöybakaṭan P̣eṭeren Šoṭo pine: "Määlim, beši memiya baksun he šaaṭe! Eki xib dänä čadər biq̇en: soġo Vaynaḳ, soġo Moiseyeynaḳ, soġoval Ilyaynaḳ". Äslindä šoṭin ičinal tene avay ḳä nex.
P̣eṭeren me äyitmoġo uḳaṭan, sa asoy hari šoṭoġo buṭeḳi. Ičoġoy loxol xoži bitaṭan šoṭoġon q̇ə͑ṭunbi.
Asoyi bošṭan isä sa säse hari: "Mo Bezi Ġare, Bezi č̣äḳṗiyone! Koṭo ibakanan!". *
Säs boṭbakaṭan \ šoṭoġon Isusa savsaṭun aḳi. Šagirdxon baki äšurxo sir ḳinäḳ efi, me barada ṭe vaxṭ šuḳḳala exlät teṭunbi.
; Mrḳ. 9:14-29)
; Mrk'. 9:14-29)
Äyč̣indäri, šorox buruġoxun ciġaṭan, Isusi be͑ś kala sa top ǯamaate č̣eri.
Ǯamaati aranexun sa išq̇aren harayepi: "Määlim, xoyinśezbsa, bez ġara be͑ġa, šo bez täk sa ġare.
Äräbir koṭay boš sa murdar urufe baysa, ṭe vädä koṭin osṭaar harayene, iz kiin-turin ṭuṭunne. Urufen koṭo iz źomoxun kä͑f baramin inǯiṭmišebsa. Äylä gele äzyät tadiṭuxun ošane iz bošṭan č̣eysa.
Zu Vi šagirdxoxun šoṭo č̣evksuna xaišbezu, ama šoṭoġon baǯarteṭunbi".
Isusenal pine: "Ay nu ve͑bakala q̇a yaq̇a aćesṗi näsil! Heq̇ädär Zu vä͑xun mandi vä͑x portṗoz? Vi ġara Bez ṭo͑ġo͑l eča".
Äyel Isusa ə͑śalayinšakaṭan murdar urufen šoṭo oq̇a saki źə͑ḳepi. Ama Isusen murdar urufa q̇adaġanebi, ġaral q̇olaybi iz bavane qaydi.
Bito Buxaʒ́uġoy kalaluġa aḳi määṭṭälṭun mansṭay.
; Mrḳ. 9:30-32)
; Mrk'. 9:30-32)
"Häysä bezi uḳalṭoġo yönbäri u͑mu͑xlaxanan: Amdari Ġar amdarxoy kiyel tadeġale".
Ama šagirdxon me äyitä q̇amišteṭunbaki. Me äyitin määnä šoṭoġoynaḳ č̣aṗe mandi, Šoṭoxun me äyiti ḳä upsuna xavar haq̇suna isä zaṗṭunsay.
Sa ġi šagirdxon ičoġoy arane än kalo šu baksuni barada höǯätbsaṭun burqi.
Isusen šoṭoġoy üḳe boš bakala fikirxo avabaki, sa mic̣iḳ äylä ečeri Iz ṭo͑ġo͑l čurdesedi.
Oša šoṭoġo pine: "Šin Bez c̣iyen me äylä q̇abulbayin, Zane q̇abulbi baksa, Za q̇abulbalṭin isä Za Yaq̇abiṭune q̇abulbi baksa. Šoṭaynaḳ ki, ef arane bitoṭuxun mic̣iḳ bakalo än kalone".
Ioanen pine: "Määlim, yan Vi c̣iyen murdar urufxo č̣evḳala sa amdaryan aḳi, ama yallariḳ Vi bać̣anexun taġalṭoġoxun nu baksuna görä šoṭo q̇adaġanyanbi".
Ama Isusen šoṭo pine: "Šoṭo mane ma bakanan! Efi äleyinä nu bakalo ef täräfe".
Isusi dünyänexun ǯöybaksuni vaxṭ ə͑śalayinšaksunen Šoṭin Yerusalima taysunane q̇ärara hari.
Isusen Ičuxun be͑ś Iz elčiġone yaq̇abi. Šorox Isusi eysuni häzirluġa be͑ġseynaḳ taci samariyaluġoy sa ayizeṭun baci.
Ama samariyaluġon Isusa q̇abul teṭunbi, šoṭaynaḳ ki, Šo Yerusalimane taysay.
Iz šagirdxo bakala Iaḳoven q̇a Ioanen moṭo aḳi piṭun: "Čurensa, ay Q̣onʒ́ux, Ilyan bi ḳinäḳ yanal moṭoġo äfčibseynaḳ göynuxun arux barsṭuna ämirben?" *
Ama Isusen fərəpi šoṭoġo q̇adaġanebi.
Šoroxal q̇eräz sa ayizeṭun taci.
Šorox yaq̇ taġaṭan sunṭin Isusa pine: "Hun maya taġayin, zu Vi bać̣anexun eġoz".
Isusen šoṭo pine: "Tülküġoyal, göynul purḳala q̇ušurxoyal mese bu. Ama Amdari Ġare bul laxala sa gaal tene bu".
Q̣eräz sunṭu isä pine: "Bez bać̣anexun eki". Šoṭinal ǯoġabe tadi: "Ay Q̣onʒ́ux, za iǯaza tada, süfṭä taġaz bez bava oćalaxbaz".
Isusen šoṭo pine: "Barta ṗuriṭoġonq̇an ičoġoy ṗuriṭoġo oćalaxbi. Hun isä taki Buxaʒ́uġoy padčaġluġi barada bayanba".
P̣urum q̇eräz sunṭin pine: "Ay Q̣onʒ́ux, zu Vi bać̣anexun eġoz, ama süfṭä iǯaza tada taġaz bez ḳožinṭoġoxun dirisṭoġonbaz".
Ama Isusen šoṭo pine: "Kötän äšṗesṭi, ama qoš be͑ġalo Buxaʒ́uġoy padčaġluġa yarayinš tenebsa".
