მართალ ხარ შენ, უფალო, რამეთუ მიგიგო შენდამი, გარნა სასჯელნი ვთქუნე შენდამი: რად რამეთუ გზაჲ უთნოთაჲ წარემართების? იეფის ყოველთა უგულებელს-მყოფელთა უგულებელსყოფათასა?
დაჰნერგენ იგინი, და განიძირეს, შვილიერ იქმნეს და ყვეს ნაყოფი. მახლობელ ხან შენ პირისა მათისა და შორს -- თირკუმელთაგან მათთა.
და შენ, უფალო, მიცი მე, გამოსცადე გული ჩემი წინაშე შენსა, და შეკრიბენ იგინი, ვითარცა ცხოვარნი კლვადნი, უბიწო ჰყვენ იგინი დღისათჳს დაკლვისა მათისა.
ვიდრემდის იგლოვდეს ქუეყანაჲ, და ყოველნი თივაჲ ველისაჲ განჴმეს უკეთურებისაგან დამკჳდრებულთა მას ზედა? უჩინო-იქმნეს საცხოვარნი და მფრინველნი, რამეთუ თქუას: არა იხილნეს უფალმან გზანი ჩუენნი.
შენნი ფერჴნი რბიან და დაგჴსნიან შენ; ვითარ განემზადები ჰუნეთა ზედა და ქუეყანასა ზედა მშჳდობისასა შენ ესავ? ვითარ ჰყოფ ოხრასა ზედა იორდანისასა?
რამეთუ ძმანიცა შენნი და სახლი მამისა შენისაჲ, და იგინიცა გეცრუვნეს შენ და მათცა ჴმა-ყვეს უკუანისაგან შენისა, ზედა შეკრბეს; ნუ ირწმუნებ მათდამი, რამეთუ იტყოდინ შენდამი მშჳდობითა.
დაუტევე სახლი ჩემი და დავაგდე სამკჳდრებელი ჩემი, მივეც შეყუარებული სული ჩემი ჴელთა მტერთა მისთასა.
იქმნა სამკჳდრებელი ჩემი ჩემდა, ვითარცა ლომი მაღნარსა შინა, მოსცა ჩემ ზედა ჴმაჲ მისი, ამისთჳს მოვიძულე იგი.
ნუ ქუაბი აფთრისაჲ სამკჳდრებელი ჩემი ჩემდა, ანუ ქუაბი გარემოჲს მისსა? მას ზედა ვიდოდეთ, შეკრიბენით ყოველნი მჴეცნი ველისანი, და მოვიდენ ჭამად მისსა.
მწყემსთა მრავალთა განრყუნეს ვენა\ჴი Page of ed. 1709: 71=79a ჩემი, შეაბილწებდეს ნაწილსა ჩემსა, მისცეს ნაწილი გულის-სათქუმელი ჩემი უდაბნოდ მიუალად.
დაიდვა უჩინო საქმნელად წარწყმედისა. ჩემ მიერ უჩინო ყოფითა უჩინო იქმნა ყოველი ქუეყანაჲ, რამეთუ არა არს მამაკაცი, დამდებელი გულსა შინა.
ყოველთა ზედა ალაგთა უდაბნოსა შორის მოვიდეს საარებულნი, რამეთუ მახჳლმან უფლისამან შეჭამოს კიდითგან ქუეყანისაჲთ და ვიდრე კიდემდე ქუეყანისა, არა არს მშჳდობაჲ ყოვლისა ჴორცისა.
სთესენით იფქლი და ეკალნი მოიმკენით; ნაწილნი მათნი არსარგებელ ეყვნენ მათ, სირცხლეულ იქმნენით სიქადულისაგან თქუენისა, ყუედრებისაგან წინაშე უფლისა.
რამეთუ ამათ იტყჳს უფალი: ყოველთათჳს მეზობელთა ბოროტთა, შემხებელთა სამკჳდრებელისა ჩემისათა, რომელი განვიკერძე ერი ჩემი ისრაელი: აჰა მე აღვიხუნე იგინი ქუეყანისაგან მათისა და სახლი იუდაჲსი გამოვიყვანო შორის მათსა.
და იყოს, შემდგომად გამოყვანებისა მათისა ჩემგან, მოვაქციო და შევიწყალნე იგინი და დავამკჳდრნე იგინი კაცადი სამკჳდრებელსა ზედა თჳსსა და კაცადი ქუეყანასა ზედა თჳსსა.
და იყოს, უკუეთუ მსწავლელთა ისწავონ გზაჲ ერისა ჩემისაჲ ფუცვად სახლისა მიმართ ჩემისა: "ცხოველ არს უფალი", ვითარცა ასწავეს ერსა ჩემსა ფუცვად ბაალისა მიმართ და აღეშენნენ საშუალ ერისა ჩემისა.
ხოლო არა თუ მოიქცენ, და მოვსპო ნათესავი იგი მოსპობით და წარწყმედით, თქუა უფალმან.
