; 42-48; Luḳ. 9:46-48; 17:1-2)
; 42-48; Luk'. 9:46-48; 17:1-2)
Ṭe vädine šagirdxo Isusi ṭo͑ġo͑l hari xavarṭun haq̇i: "Göye padčaġluġa än kalo šuva?" *
Isusen Iz ṭo͑ġo͑l sa mic̣iḳ äyel ḳalpi šoṭo šagirdxoy be͑ś čurdesṭi
pine: "Vä͑x düzinäz nex: ägär vä͑n nu badalbaki, me äylux ḳinäḳ nu bakaynan, Göye padčaġluġa bayes tenan bako. *
Šiin iču oq̇a biq̇i me äyel ḳinäḳ bakayin, Göye padčaġluġa än kalo šone.
Šiinal Bez c̣iyen metär sa äylä q̇abulbayin, Zane q̇abulbo.
Ama šiin Za ve͑bakala me kala nuval hesabbakalaṭoġoxun sunṭu pis yaq̇a zaṗḳayin, iz ozane kala sa źomoḳožin źe͑ suruḳbi dänizi tume iču bosi q̇ä͑q̇ä͑yesun šoṭaynaḳ šaaṭe bako.
Vay me dünyäni hala, memiya günaxbsuna ečala äšurxo gelene. Šoṭoġoy be͑śinä͑mä haq̇es tene baksa. Ama vay ṭe amdari hala ki, morox iz kömäyene baksa!
Ägär vi kiin nääl vi turine va pis yaq̇a zaṗesa, šoṭo boṭa bosa. Vi hämišäluġ yäšäyinšä mayif nääl axsaġ baysun ṗä͑ kulla saal ṗä͑ turla hämišäluġ aruġo bosesunaxun šaaṭe. *
Ägär vi piine va pis yaq̇a zaṗesa, šoṭo č̣evḳa bosa. Vi sa pulla hämišäluġ yäšäyinšä baysun ṗä͑ pulla ǯähännämi aruġo bosesunaxun šaaṭe. *
Be͑ġanan, me kala nu hesabbakalṭoġoy sayǯäṭuval xor ma be͑ġanan. Vä͑x düzinäz nex: šoṭoġoy angelxo hämišä Bez göynul bakala Bavay ṭo͑ġo͑l čurpiṭun.
Amdari Ġar yaq̇a aćesṗiṭoġo čarḳesṭane hare. *
Vä͑n hetärnan fikirbsa? Sa amdari sabać eġel bunesa, šoṭoġoyal soġo aćenesa, doxsan vuyara buruxmoġo barti aći eġela qä͑vesa tene taġon ki?
Vä͑x düzinäz nex: šoṭo bä͑ġä͑baṭan isä, nu aći doxsan vuy eġeleynaḳ mu͑q bakalṭuxun gele šoṭaynaḳe mu͑qbako.
Hametäräl me kala nu \ hesabbakalṭoġoy sayǯäṭay äfčibaksuna göynul bakala ef Bavan čurtenesa
Ägär vi vičen va görä günax äšṗesṭayin, taki šoṭay günaxa šoṭo aḳesṭa. Barta här šey täkč̣ä ef ṗrannay araneq̇an mandi. Šoṭin va u͑mu͑xlaxayin, vi vičä düz yaq̇a qaydin baksa. *
Ama nu u͑mu͑xlaxayin, vaxun sa nääl ki ṗä͑ tanal taša ki, "här sa äš ṗä͑ nääl ki xib šahidi äyitenq̇an täsdiġ baki". *
Ägär šoṭin me amdarxoy äyitäl nu u͑mu͑xlaxayin, ve͑bakalxoy ǯämiyätä avabakesṭa. Ägär ǯämiyäti äyitäl u͑mu͑xlaxsun nu čureġayin, šoṭo vaynaḳ Buxaʒ́uġo nu čalxala sa amdar saal naloggirbal ḳinäḳ hesabba.
Vä͑x düzinäz nex: oćali ćoyel vä͑n iǯaza nu tadalṭoġo göynuval teṭun iǯaza tadal, oćali ćoyel vä͑n iǯaza tadalṭoġo göynuval iǯaza tadalṭun. *
P̣urumal vä͑x nexzu: ägär ef aranexun ṗä͑ tanen sagala ḳänesa čureġayṭun, Göynul bakala Bez Bavan šoṭoġoy čureġala här sa šeya tadale.
Šoṭaynaḳ ki, maya ṗä͑ nääl ki xib tan Bez c̣iyen gireġayin, Zuval ṭeṭiya, šoṭoġoy arane bakoz".
Ṭe vädä P̣eṭer ə͑śalayinšaki Isusa pine: "Ay Q̣onʒ́ux! Bez vičen za görä \ günaxbayin, hema käräm zu šoṭo baġəšlayinšalazu? Vu͑ġ käräm?"
Isusen ǯoġabe tadi: "Vu͑ġ käräm tä, yetmiš käräm vu͑ġ. *
Šoṭaynaḳ ki, Göye padčaġluġ iz nökärxoxun haq̇q̇esab tašṭun čureġala sa padčaġane ošq̇ar.
Haq̇q̇esab tašala vädine šoṭay ṭo͑ġo͑l iču vic̣ hazar ṭalanṭ * gümüš borǯ bakala sa amdarṭun ešṭa.
Ama šoṭin iz borǯa qaydes nu baksuna görä padčaġen ämirebsa ki, iz borǯa ödäyinšbseynaḳ ṭe amdara ičuval, iz čuġoval, iz äyloġoval, iz bütüm var-dövlätäl toydaṭun.
Nökären ćooq̇a biti šoṭo xoyinśebsa: "Samal portba! Zu bitova ödäyinšoz".
Padčaġi goroxe eysa nökärä, šoṭo tärebsa, iz borǯal baġəšlayinšebsa.
Ama ṭe nökär ṭeṭiin č̣eri iču sabać dinar * borǯ bakala sa yoldašane iräsṭeysa. Šoṭay q̇oq̇a biq̇i "bez borǯa qayda" uḳa q̇ä͑q̇ä͑psane burqsa.
Iz yoldašen čökṭi šoṭo xoyinśebsa: "Samal portba, vi borǯa ödäyinšoz"!
Šo isä tene iräzi baksa. Iz borǯa qaydala vaxṭal ciriḳ šoṭo zindanane badesṭa.
Padčaġi ṭə͑yä͑mi nökärxon me äšurxo aḳaṭan šoṭoġo kala \ därdene haq̇sa. Šoṭoġon taci bütümä ičoġoy aġa exlätṭunbsa.
Ṭe vädä padčaġen ṭe nökärä iz ṭo͑ġo͑l ḳalpi pine: "Ay pis nökär! Hun za xoyinśenbi, zuval vi borǯa bitova va baġəšlayinšezbi.
P̣oy zu va gorox eġalṭullariḳ, hunal vi yoldaša gorox nu eġalanuy ki?"
Šoṭay aġan äǯuġläyinšäki ämirebsa ki, iz bütüm borǯa ödäyinšamin šoṭo äzyät tadaṭun.
Hametäräl Göynul bakala Bez Bavan vä͑xun räfṭärbale, ägär vä͑n ef vičä üḳin nu baġəšlayinšaynan".
