TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 25

Chapter: 25

Vic̣ xuyäri barada mäsälä
Vis' xuyəri barada məsələ

Verse: 1

Šoṭaynaḳ ki, ṭe vädä Göye \ padčaġluġ čiraġxo exṭi bäye be͑ś č̣eġala vic̣ xuyärä ošq̇ardale. ^*
Şot'aynak' ki, t'e vədə Göye \ padçağluğ çirağxo ext'i bəye běš c'eğala vis' xuyərə oşq'ardale. ^*

Verse: 2

Šoṭoġoxun qo xuyär haq̇ullu, qo xuyär isä haq̇əlsuzey.
Şot'oğoxun qo xuyər haq'ullu, qo xuyər isə haq'ılsuzey.

Verse: 3

Haq̇əlsuzṭoġon ičoġoxun čiraġxo exṭeṭuniy, ama č̣äyin teṭun exṭey.
Haq'ılsuzt'oğon içoğoxun çirağxo ext'et'uniy, ama c'əyin tet'un ext'ey.

Verse: 4

Haq̇ulluṭoġon isä čiraġxoxun sagala q̇avurxoy boš č̣äyinäl exṭeṭuniy.
Haq'ullut'oğon isə çirağxoxun sagala q'avurxoy boş c'əyinəl ext'et'uniy.

Verse: 5

Ama bäy č̣äyibaksuna görä xuyärmoġon ḳuzpi neṗaxṭunsa.
Ama bəy c'əyibaksuna görə xuyərmoğon k'uzpi nep'axt'unsa.

Verse: 6

Üšeni yarinesṭa sa haraye č̣eysa: "Bäy enesa, šoṭay be͑ś č̣ekinan!"
�şeni yarinest'a sa haraye c'eysa: "Bəy enesa, şot'ay běš c'ekinan!"

Verse: 7

Me vädä xuyärmux bütüm muġurbaki ičoġoy čiraġxo düzṭunbsa ki, šorox yönbäri boḳane.
Me vədə xuyərmux bütüm muğurbaki içoğoy çirağxo düzt'unbsa ki, şorox yönbəri bok'ane.

Verse: 8

Haq̇əlsuz xuyärmoġon haq̇ulluṭoġo nexṭun: "Ef č̣äyinäxun yaxal tadanan, šoṭaynaḳ ki, beš čiraġxo aneśṭa".
Haq'ılsuz xuyərmoğon haq'ullut'oğo next'un: "Ef c'əyinəxun yaxal tadanan, şot'aynak' ki, beş çirağxo anešt'a".

Verse: 9

Haq̇ullu xuyärmoġon isä ǯoġabṭun tasṭa: "Č̣äyin ham vä͑ynaḳ, hamal yaynaḳ tene ṗoyeġal. Šaaṭo šone taci dükänexun haq̇anan".
Haq'ullu xuyərmoğon isə coğabt'un tast'a: "C'əyin ham və̌ynak', hamal yaynak' tene p'oyeğal. Şaat'o şone taśi dükənexun haq'anan".

Verse: 10

Šorox č̣äyin haq̇sa taġala vädine bäy enesa. Häzir bakalxo šoṭoxun sagala laśḳoyi märäkäyä baṭunsa, ćomoval ġaćesa.
Şorox c'əyin haq'sa tağala vədine bəy enesa. Həzir bakalxo şot'oxun sagala lašk'oyi mərəkəyə bat'unsa, ç̌omoval ğaç̌esa.

Verse: 11

Oša ṭə͑yä͑mi xuyärmux hari "Aġa! Aġa! Ćomo yaynaḳ qaypa!" nexṭun.
Oşa t'ı̌yə̌mi xuyərmux hari "Ağa! Ağa! Ç̌omo yaynak' qaypa!" next'un.

Verse: 12

Šoṭin isä ǯoġabe tasṭa: "Zu vä͑x sal čaltezxsa". ^*
Şot'in isə coğabe tast'a: "Zu və̌x sal çaltezxsa". ^*

Verse: 13

Metärluġen, muġur mandanan. Šoṭaynaḳ ki, vä͑n nä ġina, nääl saada tenan ava. ^*
Metərluğen, muğur mandanan. Şot'aynak' ki, və̌n nə ğina, nəəl saada tenan ava. ^*

Amanat tängin barada mäsälä
Amanat təngin barada məsələ

(Luḳ. 19:11-27

)
(Luk'. 19:11-27

)

Verse: 14

Göye padčaġluġ q̇eräz ölköġo tarapsa taġala sa amdarane ošq̇ar. Šoṭin iz ḳulurxo ḳalpi iz var-dövlätä šoṭoġo amanatebsa.
Göye padçağluğ q'erəz ölköğo tarapsa tağala sa amdarane oşq'ar. Şot'in iz k'ulurxo k'alpi iz var-dövlətə şot'oğo amanatebsa.

Verse: 15

Šoṭin här sunṭu iz baǯaraġa görä - sunṭu qo, sunṭu ṗä͑, sunṭuval sa ṭalanṭ tängäne tasṭa. Ič isä yaq̇ane bafsṭa. ^*
Şot'in hər sunt'u iz bacarağa görə - sunt'u qo, sunt'u p'ə̌, sunt'uval sa t'alant' təngəne tast'a. İç isə yaq'ane bafst'a. ^*

Verse: 16

Qo ṭalanṭ haq̇iṭin haṭe saad taci tänginä faizen banḳa laxi, saal qo ṭalanṭ q̇azayinšebsa.
Qo t'alant' haq'it'in hat'e saad taśi tənginə faizen bank'a laxi, saal qo t'alant' q'azayinşebsa.

Verse: 17

P̣ä͑ ṭalanṭ haq̇iṭinal hametärbi saal ṗä͑ ṭalanṭ q̇azayinšebsa.
P'ə̌ t'alant' haq'it'inal hametərbi saal p'ə̌ t'alant' q'azayinşebsa.

Verse: 18

Sa ṭalanṭ haq̇iṭin isä taci kaśṗi iz aġay tänginä oćali oq̇a č̣aṗebsa.
Sa t'alant' haq'it'in isə taśi kašp'i iz ağay tənginə oç̌ali oq'a c'ap'ebsa.

Verse: 19

Gele vaxṭaxun oša ṭe ḳulurxoy aġa qaybaki šoṭoġoxun haq̇q̇esabe čuresa.
Gele vaxt'axun oşa t'e k'ulurxoy ağa qaybaki şot'oğoxun haq'q'esabe çuresa.

Verse: 20

Qo ṭalanṭ haq̇iṭin qo ṭalanṭal avuzin ečeri nexe: "Aġa, hun za qo ṭalanṭen amanatbi. Mone, zu sa qo ṭalanṭal q̇azayinšezbi".
Qo t'alant' haq'it'in qo t'alant'al avuzin eçeri nexe: "Ağa, hun za qo t'alant'en amanatbi. Mone, zu sa qo t'alant'al q'azayinşezbi".

Verse: 21

Aġan šoṭo nexe: "Äfärin, šaaṭ hamal za sadiḳ ḳul! Hun xuri äšurxosṭa za sadiḳen baki, va samalal kala äšurxo tapšurboz. Eki bez q̇onaxluġa gärbaka!"
Ağan şot'o nexe: "Əfərin, şaat' hamal za sadik' k'ul! Hun xuri əşurxost'a za sadik'en baki, va samalal kala əşurxo tapşurboz. Eki bez q'onaxluğa gərbaka!"

Verse: 22

P̣ä͑ ṭalanṭ haq̇iṭinal hari nexe: "Aġa, za ṗä͑ ṭalanṭen amanatbi. Mone, zu sa ṗä͑ ṭalanṭal q̇azayinšezbi".
P'ə̌ t'alant' haq'it'inal hari nexe: "Ağa, za p'ə̌ t'alant'en amanatbi. Mone, zu sa p'ə̌ t'alant'al q'azayinşezbi".

Verse: 23

Sa ṭalanṭ haq̇iṭinal hari nexe: "Aġa, vi särt sa amdar baksuna avazuy. Nu biṭi ganuxun exenbsa, nu carpi ganuxun girenbsa.
Sa t'alant' haq'it'inal hari nexe: "Ağa, vi sərt sa amdar baksuna avazuy. Nu bit'i ganuxun exenbsa, nu śarpi ganuxun girenbsa.

Verse: 25

Šoṭo görä q̇ə͑zbi, taci vi sa ṭalanṭa oćali oq̇a č̣aṗezbi. Bürüša, vi tänginä qoš exṭa!"
Şot'o görə q'ı̌zbi, taśi vi sa t'alant'a oç̌ali oq'a c'ap'ezbi. Bürüşa, vi tənginə qoş ext'a!"

Verse: 26

Aġan šoṭo ǯoġabe tasṭa: "Pis hamal tänbäl ḳul! Bez nu biṭi ganuxun exbsuna saal nu carpi ganuxun girbsuna hun avanuy.
Ağan şot'o coğabe tast'a: "Pis hamal tənbəl k'ul! Bez nu bit'i ganuxun exbsuna saal nu śarpi ganuxun girbsuna hun avanuy.

Verse: 27

Šoṭo görä hun bez tänginä gäräy faizen banḳa laxinuy ki, zu qaybakaṭan šoṭo faizen qoš exṭaz.
Şot'o görə hun bez tənginə gərəy faizen bank'a laxinuy ki, zu qaybakat'an şot'o faizen qoş ext'az.

Verse: 28

Isä iz kiye bakala ṭalanṭa koṭoxun exṭanan ičusṭa vic̣ ṭalanṭ bakalṭu tadanan!
İsə iz kiye bakala t'alant'a kot'oxun ext'anan içust'a vis' t'alant' bakalt'u tadanan!

Verse: 29

Šoṭaynaḳ ki, ši bune, šoṭo samalal gele tadeġale, šoval bolluġi boš bakale; ši tenosa, iz kiye bakaloval šoṭoxun haq̇eġale. ^*
Şot'aynak' ki, şi bune, şot'o samalal gele tadeğale, şoval bolluği boş bakale; şi tenosa, iz kiye bakaloval şot'oxun haq'eğale. ^*

Verse: 30

Bašaraġsuz ḳula isä bayinq̇luġ čölö bosanan. Ṭeṭiya o͑no͑psun saal ulux ġərəč̣esṭun bakale". ^*
Başarağsuz k'ula isə bayinq'luğ çölö bosanan. T'et'iya ǒnǒpsun saal ulux ğırıc'est'un bakale". ^*

Axərənǯi ġi
Axırınci ği

Verse: 31

Amdari Ġar bütüm Iz angelxoxun sagala tamtaraġen eġala vädine Šo Iz taxṭe loxol arcale. ^*
Amdari Ğar bütüm İz angelxoxun sagala tamtarağen eğala vədine Şo İz taxt'e loxol arśale. ^*

Verse: 32

Ṭe vädä bütüm millätxo Šoṭay be͑ś topbalṭun. Šoṭin eġelxo kečiġoxun ǯöybala sa čoban ḳinäḳ amdarxo sun-sunaxun ǯöybale.
T'e vədə bütüm millətxo Şot'ay běš topbalt'un. Şot'in eğelxo keçiğoxun cöybala sa çoban k'inək' amdarxo sun-sunaxun cöybale.

Verse: 33

Eġelxo Iz yön täräf, kečiġo isä tärs täräf efale.
Eğelxo İz yön tərəf, keçiğo isə tərs tərəf efale.

Verse: 34

Ṭe vädä Padčaġen yön täräfinṭoġo uḳale: "Ekinan miya, ay Bez Bavan xeyir-bäräkät tadiyorox! Dünyä yaranmišaki ġinaxun maġay vä͑ynaḳ täyinbakiṭay q̇onʒ́ux bakanan.
T'e vədə Padçağen yön tərəfint'oğo uk'ale: "Ekinan miya, ay Bez Bavan xeyir-bərəkət tadiyorox! Dünyə yaranmişaki ğinaxun mağay və̌ynak' təyinbakit'ay q'ončux bakanan.

Verse: 35

Šoṭaynaḳ ki, Zu busazuy - vä͑nal Za ukunnan tadi, xenezazuy - vä͑nal Za xenan tadi, q̇äribzuy - vä͑n Za q̇abulnanbi,
Şot'aynak' ki, Zu busazuy - və̌nal Za ukunnan tadi, xenezazuy - və̌nal Za xenan tadi, q'əribzuy - və̌n Za q'abulnanbi,

Verse: 36

čuplaġzuy - Za lapesnandi, azarizuy - Bez q̇ayġinenan mandi, zindanazuy - Bez ṭo͑ġo͑lnan hari".
çuplağzuy - Za lapesnandi, azarizuy - Bez q'ayğinenan mandi, zindanazuy - Bez t'ǒğǒlnan hari".

Verse: 37

Ṭe vädä düzgünṭoġon Šoṭo ǯoġab tadalṭun: "Ay Q̣onʒ́ux, yan hevaxṭyan Va busa aḳi - ukun tadi, xeneza aḳi - xe tadi?
T'e vədə düzgünt'oğon Şot'o coğab tadalt'un: "Ay Q'ončux, yan hevaxt'yan Va busa ak'i - ukun tadi, xeneza ak'i - xe tadi?

Verse: 38

Hevaxṭyan Va q̇ärib aḳi - q̇abulbi, čuplaġ aḳi - lapesṭi?
Hevaxt'yan Va q'ərib ak'i - q'abulbi, çuplağ ak'i - lapest'i?

Verse: 39

Hevaxṭyan Va azari aḳi, zindana aḳi - Vi ṭo͑ġo͑l hari?"
Hevaxt'yan Va azari ak'i, zindana ak'i - Vi t'ǒğǒl hari?"

Verse: 40

Padčaġenal šoṭoġo ǯoġab tadale: "Vä͑x nexzu: vä͑n me Bez än mic̣iḳ vičimoġoxun sunṭaynaḳ biṭu Zaynaḳnanbe".
Padçağenal şot'oğo coğab tadale: "Və̌x nexzu: və̌n me Bez ən mis'ik' viçimoğoxun sunt'aynak' bit'u Zaynak'nanbe".

Verse: 41

Oša Iz tärs täräfinṭoġo uḳale: "Ay läänät bakiyorox, ä͑xil bakanan Zaxun! Ibliseynaḳ q̇a iz angelxoynaḳ täyinbaki hämišäluġ aruġo takinan!
Oşa İz tərs tərəfint'oğo uk'ale: "Ay ləənət bakiyorox, ə̌xil bakanan Zaxun! İbliseynak' q'a iz angelxoynak' təyinbaki həmişəluğ aruğo takinan!

Verse: 42

Šoṭaynaḳ ki, Zu busazuy - vä͑nal Za ukun tenan tadi, xenezazuy - vä͑nal Za xe tenan tadi,
Şot'aynak' ki, Zu busazuy - və̌nal Za ukun tenan tadi, xenezazuy - və̌nal Za xe tenan tadi,

Verse: 43

Zu q̇äribzuy - vä͑nal Za q̇abul tenanbi, čuplaġzuy - vä͑nal Za lapestenandi, azarizuy, zindanazuy - vä͑nal Bez q̇ayġine tenan mandi".
Zu q'əribzuy - və̌nal Za q'abul tenanbi, çuplağzuy - və̌nal Za lapestenandi, azarizuy, zindanazuy - və̌nal Bez q'ayğine tenan mandi".

Verse: 44

Ṭe vädä šoṭoġonal uḳalṭun: "Ay Q̣onʒ́ux, yan Va hevaxṭyan busa, xeneza, q̇ärib, azari, zindana aḳi ki, Va kömäy teyanbi?"
T'e vədə şot'oğonal uk'alt'un: "Ay Q'ončux, yan Va hevaxt'yan busa, xeneza, q'ərib, azari, zindana ak'i ki, Va köməy teyanbi?"

Verse: 45

Šoṭinal ǯoġab tadale: "Vä͑x düzinäz nex: vä͑n me mic̣iḳṭoġoy sunṭaynaḳ nu biṭu Zaynaḳal tenanbe".
Şot'inal coğab tadale: "Və̌x düzinəz nex: və̌n me mis'ik't'oğoy sunt'aynak' nu bit'u Zaynak'al tenanbe".

Verse: 46

Morox hämišäluġ koruġa, düzgünorox isä hämišäluġ yäšäyinšä taġalṭun". ^*
Morox həmişəluğ koruğa, düzgünorox isə həmişəluğ yəşəyinşə tağalt'un". ^*

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.