; Luḳ. 22:1-2; Ioan. 11:45-53)
; Luk'. 22:1-2; İoan. 11:45-53)
Č̣ovaksuni axsibayeynaḳ * saal Ä͑yinsuz Šume axsibayeynaḳ * ṗä͑ ġine mandey. Samǯi be͑yinśxon q̇a ḳanun zombalxon Isusa č̣äṗḳin biq̇i besṗesṭeynaḳ sa yaq̇ṭun qä͑vesay,
ama "moṭo axsibayasṭa ma ben, tene amdarxoy arane gärgürčiluġe bafṭon" nexṭuniy.
Isus isä me vädinä Beṭanyinaney. Šo ǯuzamaxun q̇olaybaki Simoni ḳoya sulfin bel arcaṭan sa čuux alabasṭer źe͑naxun düzbaki iz bošal gele toyexlu, nard c̣iyen bitḳin č̣äyin bakala q̇av iz kiyel ḳoya baci Šoṭay ṭo͑ġo͑le taci. Me čuġon q̇ave bula xoxṗi iz boš bakala č̣äyinä Isusi bele cipi.
Ṭe vädä q̇onaġxoxun bäziṭoġon äǯuġläyinšäki sun-suna piṭun: "Me toyexlu č̣äyin heṭaynaḳe amc̣i gala äšesa?
Axəri koṭo xibbać dinaraxunal * toyex toydi tänginä käsibxo paybese bakoy". Šoṭoġon čuġo töhmätbsaṭun burqi.
Ama Isusen pine: "Čuġoxun kulhaq̇anan. Heṭaynaḳnan koṭo inǯitmišbsa? Koṭin Zaynaḳ šaaṭ sa äše biq̇i.
Käsibxo hämišä ef ṭo͑ġo͑le, ef čureġala vädineyal šoṭoġo kömäybes banankon. Zu isä hämišä ef ṭo͑ġo͑l tez bakal. *
Čuġon iz baǯarbalṭune bi. Bez bädänä oćalaxpseynaḳ häzirbi č̣äyinäne äšṗesṭi.
Vä͑x düzinäz nex: dünyäni mani gala Mu͑q Xavar karoozbakalesa, me čuġo eyex badi iz biq̇i äšlin baradal exlätṗalṭun".
; Luḳ. 22:3-6; Ioan. 13:18-30)
; Luk'. 22:3-6; İoan. 13:18-30)
Hame vädine ṗac̣c̣e šagirdaxun soġo bakala Iuda Isḳarioṭ Isusa samǯi be͑yinśxoy kiyel tasṭuni niyäten šoṭoġoy ṭo͑ġo͑le taci.
Samǯi be͑yinśxo mu͑qṭun baki, Iuda tängä tasṭunal äyitṭun tadi. Šoṭinal Isusa šoṭoġoy kiyel tasṭeynaḳ yaq̇ qä͑vesane burqi.
; Luḳ. 22:7-23; Ioan. 13:21-30; 1 Ḳor. 11:23-25)
; Luk'. 22:7-23; İoan. 13:21-30; 1 K'or. 11:23-25)
Ä͑yinsuz Šume axsibayi * samǯi ġine, yäni Č̣ovaksuni axsibayi q̇urbanluġ q̇uzina śamḳala ġine šagirdxon Isusaxun xavarṭun haq̇i: "Č̣ovaksuni axsibayi q̇urbani ukuna maya häzirben?"
Isusenal šagirdxoxun ṗranna yaq̇abi pine: "Šähäre takinan, ṭeṭiya ef be͑ś \ gamaten xe tašala sa amdar č̣eġale. Šoṭay bać̣anexun takinan.
Šo mani ḳoya baġayin, ṭe ḳožin q̇onʒ́uġo upanan: "Määlimen xavare haq̇sa: Bez šagirdxoxun sagala Č̣ovaksuni axsibayi q̇urbana ukala otaġ maya?"
Ḳožin q̇onʒ́uġonal vä͑ynaḳ ala häzirbaki sa otaġ aḳesṭale. Ṭeṭiya yaynaḳ häzirluġ be͑ġanan".
Šagirdxo yaq̇aṭun bafṭi. Šähäre hari här šeya Šoṭin pi ḳinäḳṭun aḳi, Č̣ovaksuni axsibayi ukunal häzirṭunbi.
Biyäbakaṭan Isus ṗac̣c̣e šagirdaxun sagala hare.
Šorox sulfin bel arci śum ukaṭan Isusen pine: "Vä͑x düzinäz nex: vä͑xun sunṭin - häysä Zaxun śum ukalṭin - Za toydale". *
Šorox pisṭunbaki, sunay bać̣anexun "zu tezu ki?" pi Šoṭoxun xavar haq̇saṭun burqi.
Isusen šoṭoġo pine: "Ef ṗac̣c̣e tanaxun soġone. Zaxun sagala śuma q̇ava torḳalo šone.
Amdari Ġar Iz ä͑mxun cameci ḳinäḳe taysa. Ama vay ṭe amdari hala ki, Amdari Ġara xäyanätebsa! Ṭe amdareynaḳ sal nanaxun nu bakiniy šaaṭe bakoy".
Šoṭoġon ukaṭan Isusen śuma exedi, šükürbala afərəna pi, šoṭo ǯöybi šagirdxo tadi pine: "Exṭanan! Mo Bezi bädäne".
Oša ǯame exṭi, šükürbi šoṭoval šagirdxone tadi, bitoṭinal ṭeṭiin u͑ṭu͑nġi.
Isusen šoṭoġo pine: "Mo geleṭay yäšäyinšeynaḳ barala Bezi ṗine, Täzä \ Iräziluġi ṗi. *
Vä͑x düzinäz nex: Zu Buxaʒ́uġoy padčaġluġa täzä fi u͑ġä͑lä ġinal ciriḳ č̣aṗen tadala me meyvinäxun ene u͑ġä͑letez".
Šorox Buxaʒ́uġo alxəšṗala mä͑ġurxo mä͑ġpiṭuxun oša č̣eri Zeytun buruġoy täräfṭun taci.
; Luḳ. 22:31-34; Ioan. 13:36-38)
; Luk'. 22:31-34; İoan. 13:36-38)
Isusen Iz šagirdxo pine: "Vä͑n bitoṭin Za bosi taġalnan, šoṭaynaḳ ki, metäre camece:
Ama Zu be͑yinbakiṭuxun oša vä͑xun be͑ś Galileyina taci ṭiya efi yaq̇a be͑ġoz". **
P̣eṭeren Šoṭo pine: "Lap bitoṭin Va bosi taalġayṭun, zu ketär tez bal!"
Isusen ǯoġabe tadi: "Va düzinäz nex: ġe, hame üše dadalen ṗä͑ käräm elḳamin hun Zaxun xib käräm danmišakalnu".
Ama P̣eṭeren iz uḳalṭay loxol čurpi pine: "Ägär Vaxun sagala bez bisunal lazəm bakayin, Vaxun tez danmišakal!" Mandi šagirdxonal bitoṭin hametärṭun pi.
; Luḳ. 22:39-46)
; Luk'. 22:39-46)
Oša šorox Geṭsemani uḳala sa galaṭun hari. Isusen Iz šagirdxo pine: "Zu afərəḳamin vä͑n memiya čurpanan".
Šoṭin P̣eṭera, Iaḳova saal Ioana isä Ičuxune exṭi. Šo gele narahatey, Iču kala sa q̇ə͑yene haq̇ey.
Šoṭin pine: "Za ṭetär sa därdene haq̇e ki, male mansṭa biyaz. Vä͑n häysä memiya čurpanan, ama nepaxmaekinan".
Ič isä samal be͑ś taci ćooq̇a biti afərənepi ki, mümkünesa, Iz loxol eġala me äzyät Iču nu lafṭane.
Šoṭin metäre pi: "Ay Bava, axəri Vaynaḳ här šey mümküne. Me äzyät u͑ġe͑sṭala ǯama Zaxun ä͑xilba. Ama Bez tää, Vi čureġaloq̇an baki".
Oša Isus šagirdxoy ṭo͑ġo͑le qaybaki. Hariyal šoṭoġo neṗaxe aḳi. Šoṭin P̣eṭera ḳalpi pine: "Simon, neṗaxnu? Sa saad muġur mandes batenkoy?
Muġur mandi afərəpanan ki, Šeytanen vä͑x maq̇an sinäyinši. Šoṭo görä ki, urufi niyät šaaṭal bakayin, amdar zäife".
Isus ṗurumal ṭeṭiin ä͑xilbaki haṭe äyitmoġon afərənepi.
Qaybakaṭan aneḳi ki, šorox neṗaxṭunsa, šoṭaynaḳ ki, ičoġoy pulmux q̇ič̣esay. Šoṭoġon teṭun avay ki, Isusa ḳä uḳaṭun.
Isus xibimǯi käräm šoṭoġoy ṭo͑ġo͑l qaybaki pine: "Häläl basḳi \ dinǯäyinšnanbaksa? Bäse! Vaxṭ ṗaṗene! Häysä Amdari Ġar günaxkärxoy kiyel tadeġale!
Hayzanan taġen. Ene, Za toydiyobal enesa!"
; Luḳ. 22:47-53; Ioan. 18:3-12)
; Luk'. 22:47-53; İoan. 18:3-12)
Isusen Iz źomo bakala äyitä hälä pi tene čarḳey, Iz ṗac̣c̣e šagirdaxun soġo bakala Iuda hari č̣ere. Šoṭay ṭo͑ġo͑l samǯi be͑yinśxon, ḳanun zombalxon saal aġsaq̇q̇alxon yaq̇abi kiye xančalla q̇a sayballa sa däsṭä amdare buy.
Isusa toydi Iudan šoṭoġoxun saturbe͑ś äyitpeney: "Zu šoṭoġoxun maṭu mučḳayiz, avabakanan ki, šone Isus. Ṭe vädä ef amdarxon šoṭo biq̇i tašereq̇aṭun".
Hametär, Iuda düz Isusi ṭo͑ġo͑l hari Šoṭo "määlim!" pi mučepi.
Šoṭoxun hari amdarxonal Isusa biṭunq̇i.
Isusi ṭo͑ġo͑l bakalṭoġoxun sunṭin xančala zapi samǯi be͑yinśi ḳula duġi šoṭay u͑mo͑ġo tumexun boneṭi.
Isusen šoṭoġo pine: "Vä͑n heṭaynaḳnan Bez bać̣anexun amdarfu͑q̇ḳali loxol eġala ḳinäḳ xančalla q̇a sayballa hare?
Här ġi xrama ef piin be͑ś zomezbsay, sal Za bitenanq̇say. Ama barta ω͑vel Cam bex ṗaṗeq̇an". *
Ṭe vädä bitoṭin Isusa bosi ṭiṭunṭeri.
Sayǯä kätan parčinen bäč̣üreci sa ǯäyil ġar isä häläl Isusi bać̣anexun tanesay. Äsḳärxon šoṭo biṭunq̇i.
Ama šo parčin bošṭan č̣efṭi čuplaġ ṭineṭeri.
; Luḳ. 22:54-55,63-71; Ioan. 18:13-24)
; Luk'. 22:54-55,63-71; İoan. 18:13-24)
Isusa samǯi be͑yinśxoy kalaṭay be͑śṭun tašeri. Ṭiya bütüm samǯi be͑yinśxo, aġsaq̇q̇alxo saal ḳanun zombalxone girecey.
P̣eṭer isä ä͑xiläxun samǯi be͑yinśxoy kalaṭay määlinäl ciriḳ Isusi bać̣anexun enesay. Šo määlne baci aruġoy ṭo͑ġo͑l bakala q̇aroolčiġoxun sagala arci gamesane burqi.
Samǯi be͑yinśxon q̇a Kala Šurina bakalṭoġoy bitoṭin amdarxo ečesṭi äyitṗesṭunsṭay ki, Šoṭo besṗesṭeynaḳ mänä bä͑ġä͑baṭun. Ama hiḳḳal bä͑ġä͑bes teṭun baksay.
Šoṭay äleyinä äfčidän ćoyel čurḳalxo geleney, ama šoṭoġoy sayǯäṭay äyitmux sun-sunaxun düz etenesay.
Bäziṭoġon isä äfčidän ćoyel čurpi piṭun:
"Yan Koṭay metär upsunayan ibake: "Zu amdarxon biq̇i me xrama carpi xib ġiin boš kiin nu biq̇es bakala q̇eräz sa xram biq̇oz". *
Ama šoṭoġoyal äyitmux sunaxun düz tene hari.
Ṭe vädä samǯi be͑yinśxoy kalo turel hayzeri Isusaxun xavare haq̇i: "Vi me amdarxo tadala ǯoġab \ butene? Axəri šoṭoġon vi äleyinäṭun äyite!"
Ama Isus šiṗ čurpeney, šoṭin ǯoġab tene tasṭay. Samǯi be͑yinśxoy kalaṭin ṗurum Šoṭoxun xavare haq̇i: "Xeyir-bäräkätlu Bakalṭay Ġar Xrisṭos hunnu?"
Isusen šoṭo pine: "Zuzu! Vä͑n Amdari Ġare Zorba Bakalṭay yön täräf arsṭuna q̇a göynul bakala asoyxoy loxol eysuna aḳalnan". *
Ṭe vädä samǯi be͑yinśxoy kalaṭin iz loxol bakala paltara zəġzəġbi * pine: "Ene šahidxo ḳä ehtiyäǯyax bu?
Koṭin me äyitmoġon izi Buxaʒ́uġo nu čalxsunane aḳesṭi! P̣oy moṭo ḳänan nex?" Bitoṭinal Isusi bisuni ǯazina layiġ baksuna q̇ärarṭun tadi. *
Bäziṭoġon Šoṭay loxol ćupsaṭun burqi, Šoṭay pulmoġo ġaćṗi "xavarečalluġba be͑yn!" pi Šoṭo yumburuġlayinšṭunbsay. Moṭoxun oša q̇aroolčiġonṭun burqi Šoṭo ṭapsa.
; Luḳ. 22:56-62; Ioan. 18:15-18; 18:25-27)
; Luk'. 22:56-62; İoan. 18:15-18; 18:25-27)
P̣eṭer isä hälä määlneney. Me vädine samǯi be͑yinśxoy kalaṭay čuux nökärxoxun soġoval ṭiyane hari.
Šoṭin aruġoy bel gameġala P̣eṭera \ aḳi šoṭay loxol be͑ġi pine: "Hunal me Nazareṭlunaxun, Isusaxun sagalanuy".
Ama P̣eṭeren moṭoxun danmišaki pine: "Nä avatez, nä q̇amištezbaksa hun heṭuxunen äyite". Šo määlin baġala ganuče taci, hame vädineyal dadalen elepi.
Čuux nökären P̣eṭera miyal aḳi iz ṭo͑ġo͑l bakalṭoġo ṗurum pine: "Moval šoṭoġoxune".
P̣eṭer ṗurumal danmišebaki. \ Samal oša ṭeṭiya čurpiṭoġon ṗurum iču piṭun: "Hägigiyal, hun šoṭoġoxunnu, axəri hunal Galileyinaxunnu".
P̣eṭeren iču q̇arġišbsun elaspi pine: "Vä͑n uḳala ṭe amdara tez čalxsa".
Haṭe dayġal dadalen ṗä͑mǯi käräm elepi. \ P̣eṭeren Isusi "dadalen ṗä͑ käräm elḳamin hun Zaxun xib käräm danmišakalnu" äyitä iz eyex badi o͑no͑nepi.
