TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 15

Chapter: 15

Amdara murdar balo hiḳä?
Amdara murdar balo hik'ə?

(Mrḳ. 7:1-23

)
(Mrk'. 7:1-23

)

Verse: 1

Ṭe vädä Yerusalimaxun fariseyxo saal ḳanun zombalxo Isusi ṭo͑ġo͑lṭun hari.
T'e vədə Yerusalimaxun fariseyxo saal k'anun zombalxo İsusi t'ǒğǒlt'un hari.

Verse: 2

Šoṭoġon xavarṭun haq̇i: "Vi šagirdxon bavoġoxun mandi ädätxo heṭaynaḳṭun care? Šum ukalṭuxun be͑ś ičoġoy kulmoġo teṭun oc̣ksa". ^*
Şot'oğon xavart'un haq'i: "Vi şagirdxon bavoğoxun mandi ədətxo het'aynak't'un śare? Şum ukalt'uxun běš içoğoy kulmoğo tet'un os'ksa". ^*

Verse: 3

Isusen šoṭoġo ǯoġabe tadi: "P̣oy vä͑n heṭaynaḳnan ef ädätxoy xätiren Buxaʒ́uġoy ämirä care?
İsusen şot'oğo coğabe tadi: "P'oy və̌n het'aynak'nan ef ədətxoy xətiren Buxačuğoy əmirə śare?

Verse: 4

Buxaʒ́uġon pene: "Vi bava-nana hörmätba" saal "Iz bava nääl nana źamdala amdar bespakalane". ^*
Buxačuğon pene: "Vi bava-nana hörmətba" saal "İz bava nəəl nana ǰamdala amdar bespakalane". ^*

Verse: 5

Vä͑n isä nexnan: "Šiin iz bava nääl iz nana uḳayin ki, zaxun vi yaq̇be͑ġala kömäy Buxaʒ́uġoy paye baki,
Və̌n isə nexnan: "Şiin iz bava nəəl iz nana uk'ayin ki, zaxun vi yaq'běğala köməy Buxačuğoy paye baki,

Verse: 6

ṭe vädä iz bava-nana hörmät nu bes baneko". Metärluġen, vä͑n ef ädäti xätiren Buxaʒ́uġoy äyitä hiḳḳalnanbsa.
t'e vədə iz bava-nana hörmət nu bes baneko". Metərluğen, və̌n ef ədəti xətiren Buxačuğoy əyitə hik'k'alnanbsa.

Verse: 7

Ay ṗä͑ćolorox! Isaya xavarečalen vä͑ynaḳ hetär šaaṭa pe:
Ay p'ə̌ç̌olorox! İsaya xavareçalen və̌ynak' hetər şaat'a pe:

Verse: 8

"Me ǯamaaten ičoġoy ǯiǯirxone Za hörmätbsa, \ Ama ičoġoy üḳ Zaxun ä͑xile.
"Me camaaten içoğoy cicirxone Za hörmətbsa, \ Ama içoğoy ük' Zaxun ə̌xile.

Verse: 9

Ičoġoy Za bul ḳoc̣bsunal amc̣ine, \ Bez ḳanunxo ičoġoy č̣evḳi ḳanunxonṭun äväzbsa". ^*
İçoğoy Za bul k'os'bsunal ams'ine, \ Bez k'anunxo içoğoy c'evk'i k'anunxont'un əvəzbsa". ^*

Verse: 10

Isusen ǯamaata Iz ṭo͑ġo͑l ḳalpi pine: "U͑mu͑x laxanan hamal bex bafṭanan.
İsusen camaata İz t'ǒğǒl k'alpi pine: "Ǔmǔx laxanan hamal bex baft'anan.

Verse: 11

Źomo baġala šeyen amdara murdar tenebo, ama Amdara murdar balo źomoxun č̣eġala šeye".
J̌omo bağala şeyen amdara murdar tenebo, ama Amdara murdar balo ǰomoxun c'eğala şeye".

Verse: 12

Oša šagirdxon Šoṭay ṭo͑ġo͑l hari piṭun: "Avanu ki, fariseyxon me äyitä ibaki inǯimišṭun baki"?
Oşa şagirdxon Şot'ay t'ǒğǒl hari pit'un: "Avanu ki, fariseyxon me əyitə ibaki incimişt'un baki"?

Verse: 13

Isusen ǯoġabe tadi: "Bez Göynul bakala Bavan nu biṭi här sa bitḳi tumexun čukeġale.
İsusen coğabe tadi: "Bez Göynul bakala Bavan nu bit'i hər sa bitk'i tumexun çukeğale.

Verse: 14

Šoṭoġoxun kulhaq̇anan. Šorox ḳać̣iġoy ḳać̣i kalaluġbalxone. Ägär ḳać̣inen ḳać̣ina tašayin, ṗo͑ġä͑l kurnuṭun bafṭo". ^*
Şot'oğoxun kulhaq'anan. Şorox k'ač'iğoy k'ač'i kalaluğbalxone. Əgər k'ač'inen k'ač'ina taşayin, p'ǒğə̌l kurnut'un baft'o". ^*

Verse: 15

P̣eṭeren Šoṭoxun xaišebi: "Me mäsälinä yax q̇andəriša".
P'et'eren Şot'oxun xaişebi: "Me məsəlinə yax q'andırişa".

Verse: 16

Isusen pine: "Vä͑nal hälä bex tenan bafṭe?
İsusen pine: "Və̌nal hələ bex tenan baft'e?

Verse: 17

Bex tenan bafsṭa ki, źomo baġala här šey tapanene baysa ošaal čölöne č̣eysa?
Bex tenan bafst'a ki, ǰomo bağala hər şey tapanene baysa oşaal çölöne c'eysa?

Verse: 18

Źomoxun č̣eġala här šey isä üḳexune č̣eysa, moṭoġonal amdara murdarebsa. ^*
J̌omoxun c'eğala hər şey isə ük'exune c'eysa, mot'oğonal amdara murdarebsa. ^*

Verse: 19

Šoṭaynaḳ ki, üḳexune č̣eġon pis fikirxo, amdar bespsun, xäyanätbsun, äxlagsusluġ, oġriluġ, äfčidän ćoyel čurpsun, saal amdarxoy pisä äyitpsun.
Şot'aynak' ki, ük'exune c'eğon pis fikirxo, amdar bespsun, xəyanətbsun, əxlagsusluğ, oğriluğ, əfçidən ç̌oyel çurpsun, saal amdarxoy pisə əyitpsun.

Verse: 20

Amdara murdar bala šeymux moroxe. Nu oc̣eci kulmoġon ukun uksunen isä amdara murdar tenebo".
Amdara murdar bala şeymux moroxe. Nu os'eśi kulmoğon ukun uksunen isə amdara murdar tenebo".

Känanlu čuġoy ve͑baksun
Kənanlu çuğoy věbaksun

(Mrḳ. 7:24-30

)
(Mrk'. 7:24-30

)

Verse: 21

Isus ṭeṭiin č̣eri Sur saal Sidon oćalxone taci.
İsus t'et'iin c'eri Sur saal Sidon oç̌alxone taśi.

Verse: 22

Mone, känanlu sa čuux ṭe ganuxun č̣eri "Ay Q̣onʒ́ux, ay Davidi Ġar, za gorox eki. Bez xuyäräsṭa murdar urufe bu, gele koruġe aksa" uḳa harayepi.
Mone, kənanlu sa çuux t'e ganuxun c'eri "Ay Q'ončux, ay Davidi Ğar, za gorox eki. Bez xuyərəst'a murdar urufe bu, gele koruğe aksa" uk'a harayepi.

Verse: 23

Isusen šoṭay ǯoġaba sa äyitenal, hametär, tene tadi. Iz šagirdxo ə͑śalayinšaki "Koṭo yaq̇abada taceq̇an, šoṭaynaḳ ki, beš bać̣anexune haraye" pi, Isusa xoyinśṭunbi.
İsusen şot'ay coğaba sa əyitenal, hametər, tene tadi. İz şagirdxo ı̌šalayinşaki "Kot'o yaq'abada taśeq'an, şot'aynak' ki, beş bač'anexune haraye" pi, İsusa xoyinšt'unbi.

Verse: 24

Ama Isusen pine: "Zu täkč̣ä Israili ǯamaati aći eġelxoy ṭo͑ġo͑lez yaq̇abake".
Ama İsusen pine: "Zu təkc'ə İsraili camaati aç̌i eğelxoy t'ǒğǒlez yaq'abake".

Verse: 25

Čuux isä ə͑śalayinšaki, Šoṭay be͑ś diz čökṭi pine: "Ay Q̣onʒ́ux, za kömäyba".
Çuux isə ı̌šalayinşaki, Şot'ay běš diz çökt'i pine: "Ay Q'ončux, za köməyba".

Verse: 26

Isusen pine: "Äyloġoy śuma exṭi xä͑yoġo tasṭun düzgün tene bako".
İsusen pine: "Əyloğoy šuma ext'i xə̌yoğo tast'un düzgün tene bako".

Verse: 27

Čuġon pine: "Haq̇lunu, ay Q̣onʒ́ux! Ama xä͑yoġonal ičoġoy q̇onʒ́uġxoy sulfinaxun bitala q̇ərəġxoxun uṭunksa".
Çuğon pine: "Haq'lunu, ay Q'ončux! Ama xə̌yoğonal içoğoy q'ončuğxoy sulfinaxun bitala q'ırığxoxun ut'unksa".

Verse: 28

Ṭe vädä Isusen ǯoġab tadi čuġo pine: "Ay čuux! Vi ve͑baksun kalane, barta vaynaḳ vi čureġala ḳinäḳq̇an baki". Šoṭay xuyäräl haṭe saad q̇olayebaki.
T'e vədə İsusen coğab tadi çuğo pine: "Ay çuux! Vi věbaksun kalane, barta vaynak' vi çureğala k'inək'q'an baki". Şot'ay xuyərəl hat'e saad q'olayebaki.

Isusi biṗ hazaraxun gele tana boševksun
İsusi bip' hazaraxun gele tana boşevksun

(Mrḳ. 8:1-10

)
(Mrk'. 8:1-10

)

Verse: 29

Isus ṭeṭiin č̣eri Iz yaq̇a Galileya göle ṭo͑ġo͑lxun davamebi, oša buruġo laci ṭeṭiya areci.
İsus t'et'iin c'eri İz yaq'a Galileya göle t'ǒğǒlxun davamebi, oşa buruğo laśi t'et'iya areśi.

Verse: 30

Šoṭay ṭo͑ġo͑l kala sa top ǯamaate hari, ičoġoxunal axsaġxo, ḳać̣iġo, mayifxo, lalurxo \ saal gele q̇eräzṭoġoval eṭunčeri. Šoṭoġo Isusi turmoġoy ṭo͑ġo͑l laṭunxi, Isusenal šoṭoġo q̇olayebsay.
Şot'ay t'ǒğǒl kala sa top camaate hari, içoğoxunal axsağxo, k'ač'iğo, mayifxo, lalurxo \ saal gele q'erəzt'oğoval et'unçeri. Şot'oğo İsusi turmoğoy t'ǒğǒl lat'unxi, İsusenal şot'oğo q'olayebsay.

Verse: 31

Ǯamaaten aḳaṭan ki, lalurxon äyitṭunne, mayifxo q̇olayṭunbaksa, axsaġxo taraṭunne, ḳać̣iġon aṭunksa, määṭṭälṭun mandi, Israili Buxaʒ́uġoy c̣iya alaṭunbsay.
Camaaten ak'at'an ki, lalurxon əyitt'unne, mayifxo q'olayt'unbaksa, axsağxo tarat'unne, k'ač'iğon at'unksa, məət't'əlt'un mandi, İsraili Buxačuğoy s'iya alat'unbsay.

Verse: 32

Isusen Iz šagirdxo Iz ṭo͑ġo͑l ḳalpi pine: "Me ǯamaata Bez goroxe eysa: xib ġine ki, Bez ṭo͑ġo͑lṭun, ičoġoy ukseynaḳal hiḳḳal tene bu. Šoṭoġo ḳoya busa yaq̇abasṭun tez čuresa ki, yaq̇a halnuxun nu bitaṭun".
İsusen İz şagirdxo İz t'ǒğǒl k'alpi pine: "Me camaata Bez goroxe eysa: xib ğine ki, Bez t'ǒğǒlt'un, içoğoy ukseynak'al hik'k'al tene bu. Şot'oğo k'oya busa yaq'abast'un tez çuresa ki, yaq'a halnuxun nu bitat'un".

Verse: 33

Šagirdxon Šoṭo piṭun: "Me čölluġa meq̇ädär amdarxo boševḳseynaḳ śum mayin bä͑ġä͑ben?"
Şagirdxon Şot'o pit'un: "Me çölluğa meq'ədər amdarxo boşevk'seynak' šum mayin bə̌ğə̌ben?"

Verse: 34

Isusen šoṭoġoxun xavare haq̇i: "Ef hema śumabu?" Šoṭoġon ǯoġabṭun tadi: "Vu͑ġ śum saal samal xuri čäliyäx bu".
İsusen şot'oğoxun xavare haq'i: "Ef hema šumabu?" Şot'oğon coğabt'un tadi: "Vǔğ šum saal samal xuri çəliyəx bu".

Verse: 35

Ṭe vädä Isusen ǯamaata ämirebi ki, arceq̇aṭun oq̇a.
T'e vədə İsusen camaata əmirebi ki, arśeq'at'un oq'a.

Verse: 36

Vu͑ġ śuma q̇a čäliġo exṭi šükürebi oša ǯöybi Iz šagirdxone tadi, šagirdxonal ǯamaatane paybi.
Vǔğ šuma q'a çəliğo ext'i şükürebi oşa cöybi İz şagirdxone tadi, şagirdxonal camaatane paybi.

Verse: 37

Bitoṭin käyi-boṭunši. Avuzin mandi ḳoṭorxo girṭunbi, vu͑ġ zänbile buybaki.
Bitot'in kəyi-bot'unşi. Avuzin mandi k'ot'orxo girt'unbi, vǔğ zənbile buybaki.

Verse: 38

Ukun ukala sayǯä išq̇arxoy say isä čupuxxoxun saal äyloġoxun bašq̇a biṗ hazar taney.
Ukun ukala saycə işq'arxoy say isə çupuxxoxun saal əyloğoxun başq'a bip' hazar taney.

Verse: 39

Isusen ǯamaata yaq̇abadiṭuxun oša lodḳina arci Magadan oćalane taci.
İsusen camaata yaq'abadit'uxun oşa lodk'ina arśi Magadan oç̌alane taśi.

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.