TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 81

Chapter: 13

Isusi Iz šagirdxoy turmoġo oc̣ksun
İsusi İz şagirdxoy turmoğo os'ksun

Verse: 1

*Č̣ovaksuni axsibay ^* ə͑śalayinšebaksay. Isusen me dünyänexun ǯöybaki Iz Bavay ṭo͑ġo͑l qaybaksuni vaxṭ hari ṗaṗsuna avaney. Šoṭin me dünyäne Iču aid bakalṭoġo hämišä čurecene, axəra ciriḳäl čureci.
*C'ovaksuni axsibay ^* ı̌šalayinşebaksay. İsusen me dünyənexun cöybaki İz Bavay t'ǒğǒl qaybaksuni vaxt' hari p'ap'suna avaney. Şot'in me dünyəne İçu aid bakalt'oğo həmişə çureśene, axıra śirik'əl çureśi.

Verse: 2

Biyäsin śum ukala vädäney. Iblisenal ene Isusa toysṭuni fikirä Simon Isḳarioṭi ġar Iuday beyne badeney.
Biyəsin šum ukala vədəney. İblisenal ene İsusa toyst'uni fikirə Simon İsk'ariot'i ğar İuday beyne badeney.

Verse: 3

Isusen Bavan här šeya Iz kiyel tasṭuna, Izi Buxaʒ́uġoxun eysuna, qaybakiyal Buxaʒ́uġoy ṭo͑ġo͑l taysuna avaney.
İsusen Bavan hər şeya İz kiyel tast'una, İzi Buxačuğoxun eysuna, qaybakiyal Buxačuğoy t'ǒğǒl taysuna avaney.

Verse: 4

Šoṭin Iz ganuxun hayzeri xälätä č̣eq̇i sa däsmär exṭi Iz bə͑yex ġaćepi.
Şot'in İz ganuxun hayzeri xələtə c'eq'i sa dəsmər ext'i İz bı̌yex ğaç̌epi.

Verse: 5

Moṭoxun oša läänä xe bapi šagirdxoy turmoġo oc̣ḳi, Iz bə͑yex ġaćṗi däsmären śarpsane burqi.
Mot'oxun oşa ləənə xe bapi şagirdxoy turmoğo os'k'i, İz bı̌yex ğaç̌p'i dəsməren šarpsane burqi.

Verse: 6

Isus Simon P̣eṭera ə͑śalayinšakaṭan šoṭin Isusa pine: "Ay Q̣onʒ́ux, bezi turmoġo Hun oc̣ḳalnu?"
İsus Simon P'et'era ı̌šalayinşakat'an şot'in İsusa pine: "Ay Q'ončux, bezi turmoğo Hun os'k'alnu?"

Verse: 7

Isusen šoṭo ǯoġab tadi pine: "Bezi ḳä bsuna hun häysä tää, oša q̇amišakalnu".
İsusen şot'o coğab tadi pine: "Bezi k'ə bsuna hun həysə təə, oşa q'amişakalnu".

Verse: 8

P̣eṭeren Šoṭo pine: "Sal sa vädine! Hun bezi turmoġo ten oc̣ḳal!" Isusen \ šoṭo ǯoġabe tadi: "Ägär nu oc̣ḳayiz, Bezi äsil šagird bakes ten bakon".
P'et'eren Şot'o pine: "Sal sa vədine! Hun bezi turmoğo ten os'k'al!" İsusen \ şot'o coğabe tadi: "Əgər nu os'k'ayiz, Bezi əsil şagird bakes ten bakon".

Verse: 9

Ṭe vädä Simon P̣eṭeren Šoṭo pine: "Ay Q̣onʒ́ux, ṭe vädä sayǯä bezi turmoġo tää, kulmoġo q̇a bulal oc̣ḳa".
T'e vədə Simon P'et'eren Şot'o pine: "Ay Q'ončux, t'e vədə saycə bezi turmoğo təə, kulmoğo q'a bulal os'k'a".

Verse: 10

Isusen šoṭo pine: "Oc̣ḳalpi amdareynaḳ sayǯä turmoġo oc̣ksun bäse, šoṭaynaḳ ki, šo bul-oś tämize. Vä͑nal tämiznan, ama bütüm tää".
İsusen şot'o pine: "Os'k'alpi amdareynak' saycə turmoğo os'ksun bəse, şot'aynak' ki, şo bul-oš təmize. Və̌nal təmiznan, ama bütüm təə".

Verse: 11

Šoṭin Iču šiin toydalesa avaney, koṭo göräl "bütüm tämiz tenan" pine.
Şot'in İçu şiin toydalesa avaney, kot'o görəl "bütüm təmiz tenan" pine.

Verse: 12

Isusen šoṭoġoy turmoġo oc̣ḳiṭuxun oša Iz xälätä lapi ṗurum Iz gala arci šoṭoġo pine: "Zu vä͑ynaḳ ḳäz bisa q̇amišnanbaki?
İsusen şot'oğoy turmoğo os'k'it'uxun oşa İz xələtə lapi p'urum İz gala arśi şot'oğo pine: "Zu və̌ynak' k'əz bisa q'amişnanbaki?

Verse: 13

Vä͑n Za "Määlim" saal "Q̣onʒ́ux" pinan ḳale. Düznan nexe, šoṭaynaḳ ki, Zu haṭe Šozu.
Və̌n Za "Məəlim" saal "Q'ončux" pinan k'ale. Düznan nexe, şot'aynak' ki, Zu hat'e Şozu.

Verse: 14

Isä ki, Zu Q̣onʒ́ux saal Määlim baksunen ef turmoġoz oc̣ḳi, vä͑nal sun-sunay turmoġo oc̣ḳalanan.
İsə ki, Zu Q'ončux saal Məəlim baksunen ef turmoğoz os'k'i, və̌nal sun-sunay turmoğo os'k'alanan.

Verse: 15

Vä͑x aḳesezdi ki, Zu vä͑ynaḳ biṭu vä͑nal sun-sunaynaḳ banan.
Və̌x ak'esezdi ki, Zu və̌ynak' bit'u və̌nal sun-sunaynak' banan.

Verse: 16

Serina, serinaz vä͑x nex: *ḳul iz aġaxun, elčiyal iču yaq̇abiṭuxun kala tene.
Serina, serinaz və̌x nex: *k'ul iz ağaxun, elçiyal içu yaq'abit'uxun kala tene.

Verse: 17

Isä ki me äyitmoġo avanan, vä͑n hametär bsunen bäxṭävär bakalnan.
İsə ki me əyitmoğo avanan, və̌n hametər bsunen bəxt'əvər bakalnan.

Verse: 18

Ef bitoṭay barada tez nex. Zu Bezi č̣äḳṗiṭoġo čalezxsa. Ama barta "Zaxun sagala śum ukalo Bez düšmäne baki" ^* uḳala ω͑vel Cam bex ṗaṗeq̇an.
Ef bitot'ay barada tez nex. Zu Bezi c'ək'p'it'oğo çalezxsa. Ama barta "Zaxun sagala šum ukalo Bez düşməne baki" ^* uk'ala Ǐvel Śam bex p'ap'eq'an.

Verse: 19

Häysä me äyitmux bex ṗaṗalṭuxun be͑ś vä͑x moṭoġo nexzu ki, bex ṗaṗaṭan ve͑ bakanan: Zu \ Šozu.
Həysə me əyitmux bex p'ap'alt'uxun běš və̌x mot'oğo nexzu ki, bex p'ap'at'an vě bakanan: Zu \ Şozu.

Verse: 20

Serina, serinaz vä͑x nex: Zu yaq̇abalṭu q̇abulbalṭin Zane q̇abulbsa, Za q̇abulbalṭin isä Za Yaq̇abiṭune q̇abulbsa". ^*
Serina, serinaz və̌x nex: Zu yaq'abalt'u q'abulbalt'in Zane q'abulbsa, Za q'abulbalt'in isə Za Yaq'abit'une q'abulbsa". ^*

Iuday Isusa toysṭun
İuday İsusa toyst'un

(Maṭ. 26:20-25

; Mrḳ. 14:17-21

; Luḳ. 22:21-33

)
(Mat'. 26:20-25

; Mrk'. 14:17-21

; Luk'. 22:21-33

)

Verse: 21

Isusen me äyitmoġo piṭuxun oša gele pis baki pine: "Serina, serinaz vä͑x nex: vä͑xun sunṭin Za toydale".
İsusen me əyitmoğo pit'uxun oşa gele pis baki pine: "Serina, serinaz və̌x nex: və̌xun sunt'in Za toydale".

Verse: 22

Iz šagirdxon me äyitmoġo ši barada upsuna nu avabaksuna görä čäšmišäki sun-sunay loxolṭun be͑ġi.
İz şagirdxon me əyitmoğo şi barada upsuna nu avabaksuna görə çəşmişəki sun-sunay loxolt'un běği.

Verse: 23

Iz šagirdxoxun soġo - Isusi čureġala šagird Šoṭo lap ə͑śaney.
İz şagirdxoxun soğo - İsusi çureğala şagird Şot'o lap ı̌šaney.

Verse: 24

Simon P̣eṭeren ṭe šagirdi loxol himebi ki, ši barada upsuna Šoṭoxun xavar haq̇ane.
Simon P'et'eren t'e şagirdi loxol himebi ki, şi barada upsuna Şot'oxun xavar haq'ane.

Verse: 25

Ṭe šagirdenal fərəpi Isusaxun xavare haq̇i: "Ay Q̣onʒ́ux, šo šuva?"
T'e şagirdenal fırıpi İsusaxun xavare haq'i: "Ay Q'ončux, şo şuva?"

Verse: 26

Isusen ǯoġabe tadi: "Me śume loq̇mina torpi šu tadozsa, šone". Loq̇mina torpi Simon Isḳarioṭi ġar Iudane tadi.
İsusen coğabe tadi: "Me šume loq'mina torpi şu tadozsa, şone". Loq'mina torpi Simon İsk'ariot'i ğar İudane tadi.

Verse: 27

Iudan loq̇mina exṭala ḳinäḳ Šeytan šoṭay boše baci. Isusen šoṭo "ḳä balnusa, usum ba!" pine.
İudan loq'mina ext'ala k'inək' Şeytan şot'ay boşe baśi. İsusen şot'o "k'ə balnusa, usum ba!" pine.

Verse: 28

Isusen moṭo heṭaynaḳ šoṭo upsuna sulfin bel bakalṭoġoy šuḳḳalen tene q̇amišaki.
İsusen mot'o het'aynak' şot'o upsuna sulfin bel bakalt'oğoy şuk'k'alen tene q'amişaki.

Verse: 29

Tängin toray Iudasṭa baksuna görä bäziṭoġon fikirṭunbi ki, Isusen šoṭo "axsibaya yaynaḳ lazəm bakala šeyurxo haq̇a" nääl "käsibxo sa šey tada" nexe.
Təngin toray İudast'a baksuna görə bəzit'oğon fikirt'unbi ki, İsusen şot'o "axsibaya yaynak' lazım bakala şeyurxo haq'a" nəəl "kəsibxo sa şey tada" nexe.

Verse: 30

Iudan loq̇mina \ exṭiṭuxun oša kap qavunane č̣eri. Üšeney
İudan loq'mina \ ext'it'uxun oşa kap qavunane c'eri. �şeney

Sun-suna čurekinan
Sun-suna çurekinan

Verse: 31

Iuda č̣eriṭuxun oša Isusen pine: "Häysä *Amdari Ġare c̣i alanebaki, Buxaʒ́uġoy c̣iyal Šoṭoxune alabaki.
İuda c'erit'uxun oşa İsusen pine: "Həysə *Amdari Ğare s'i alanebaki, Buxačuğoy s'iyal Şot'oxune alabaki.

Verse: 32

Isä ki, Buxaʒ́uġoy c̣i Šoṭoxune alabaki, Buxaʒ́uġonal Šoṭo Ičusṭa alabale, usumluġen alabale.
İsə ki, Buxačuğoy s'i Şot'oxune alabaki, Buxačuğonal Şot'o İçust'a alabale, usumluğen alabale.

Verse: 33

Ay Bezi äylux! Samal vädäl vä͑xun bakoz. Vä͑n Za qä͑veġalnan, ama Zu iudeyxo "Bezi taġala gala vä͑n eyes tenan bakon" pi ḳinäḳ häysä vä͑xal moṭo nexzu. ^*
Ay Bezi əylux! Samal vədəl və̌xun bakoz. Və̌n Za qə̌veğalnan, ama Zu iudeyxo "Bezi tağala gala və̌n eyes tenan bakon" pi k'inək' həysə və̌xal mot'o nexzu. ^*

Verse: 34

Vä͑x täzä sa ämirez tasṭa: sun-suna čurekinan, Zu vä͑x čureci ḳinäḳ vä͑nal sun-suna čurekinan. ^*
Və̌x təzə sa əmirez tast'a: sun-suna çurekinan, Zu və̌x çureśi k'inək' və̌nal sun-suna çurekinan. ^*

Verse: 35

Ägär efi sun-suna čuresun bakayin, ṭe vädä bütüm amdarxon avabakalṭun ki, vä͑n Bezi šagirdxonan".
Əgər efi sun-suna çuresun bakayin, t'e vədə bütüm amdarxon avabakalt'un ki, və̌n Bezi şagirdxonan".

P̣eṭeri Ičuxun danmišaksuna Isusi saturbe͑ś upsun
P'et'eri İçuxun danmişaksuna İsusi saturběš upsun

(Maṭ. 26:31-35

; Mrḳ. 14:27-31

; Luḳ. 22:31-34

)
(Mat'. 26:31-35

; Mrk'. 14:27-31

; Luk'. 22:31-34

)

Verse: 36

Simon P̣eṭeren Isusaxun xavare haq̇i: "Ay Q̣onʒ́ux, mayan taysa?" Isusen ǯoġabe tadi: "Zu taġala gala häysä hun Bezi bać̣anexun eyes ten bakon, ama oša eġalnu".
Simon P'et'eren İsusaxun xavare haq'i: "Ay Q'ončux, mayan taysa?" İsusen coğabe tadi: "Zu tağala gala həysə hun Bezi bač'anexun eyes ten bakon, ama oşa eğalnu".

Verse: 37

P̣eṭeren Šoṭo pine: "Ay Q̣onʒ́ux, häysä heṭaynaḳ Vi bać̣anexun eyes tez bakon? Vaynaḳ bezi elmoġoz tadon".
P'et'eren Şot'o pine: "Ay Q'ončux, həysə het'aynak' Vi bač'anexun eyes tez bakon? Vaynak' bezi elmoğoz tadon".

Verse: 38

Isusen šoṭo pine: "Zaynaḳ vi elmoġon tadon? Serina, serinaz va nex: dadalen elḳamin hun Zaxun xib käräm danmišakalnu".
İsusen şot'o pine: "Zaynak' vi elmoğon tadon? Serina, serinaz va nex: dadalen elk'amin hun Zaxun xib kərəm danmişakalnu".

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.