*Fariseyxon Isusi Ioanaxun gele šagird girbsuni saal šoṭoġo xena badi *ḳunuḳbsuni barada iṭunbaki.
(Isusen Ičin tää, Iz šagirdxonṭun *ḳunuḳbsay).
Isusen moṭo avabakala ḳinäḳ Iudeyinaxun č̣eri Galileyinane qaybaki.
Šo Samarinaxun č̣ovakalaney.
Isus Iaḳoven iz ġar Iosifa tadi oćala ə͑śa bakala Samariin Sixar c̣iyen šähärene hari. *
Iaḳovi xene käriz ṭeṭiyaney. Yaq̇en Isusa mandaḳbsuna görä Šo ṭe xene kärizi ṭo͑ġo͑l čurepi. U͑qu͑mǯi saadey. *
Samariyalu sa čuux kärizäxun xe č̣evḳsane hari. Isusen šoṭo pine: "Za u͑ġseynaḳ xe tandon?"
(Iz šagirdxo ukun haq̇seynaḳ šähäreṭun tacey.)
*Samariyalu čuġon Šoṭo pine: "Hun sa iudeynu, zu isä sa *samariyalu čuux. Hun hetären zaxun xe čureces bakon?" (Iudeyxon *samariyaluġoy äšṗesṭala q̇ava äšṗesteṭunsṭay.) *
Isusen šoṭo ǯoġabe tadi: "Ägär hun Buxaʒ́uġon tadi paya saal vaxun xe čureġalo Šu baksuna avabakayin, hunen Šoṭoxun xe čureġon, Šoṭinal va yäšäyinšesṭala xene tadon". *
Čuġon Šoṭo pine: "Bezi *aġa, xe č̣evkseynaḳ sa q̇av tevax bu, kärizäl bä͑ġä͑loye. P̣oy ṭe yäšäyinšesṭala xena mayin č̣evḳalnu?
Me kärizä yax beš bava Iaḳovene tade. Koṭoxun ičin, iz ġarmoġon, iz beliġon xeṭun u͑ġe͑. Hun šoṭoxunal üsṭünnu ki?"
Isusen šoṭo ǯoġabe tadi: "Me xenaxun u͑ġä͑lo saal xeneza bakale,
ama Zu tadala xenaxun šiin u͑ġä͑yin, sal sa vädä xeneza tene bakal. Zu tadala xe šoṭay boš hämišäluġ yäšäyinšesṭala sa xene orayin bakale".
Čuġon Šoṭo pine: "Bezi *aġa, ṭe xenaxun za tada ki, zu sal sa vädä xeneza ma bakaz, saal xe č̣evkseynaḳ memiya ma eġaz".
Isusen čuġo pine: "Taki vi išq̇ara ḳalpa qaybaka miya".
Čuġon Šoṭo "Bezi išq̇ar butene" pine. Isusen šoṭo pine: "Vi išq̇ar nu baksuna düzen pi,
šoṭaynaḳ ki, vi qo išq̇are bake, häysä vaxun yäšäyinšaloval vi išq̇ar tene, hun koṭo düzen pi".
Čuġon metäre pi: "Bezi *aġa, azaksa ki, Hun *xavarečalnu.
Beši bavoġon-kalboġon me buruġoṭun *bul ḳoc̣bsay, ama vä͑n iudeyxon nexnan ki, *bul ḳoc̣bseynaḳ sa ga bunesa, šoval Yerusalime".
Isusen šoṭo pine: "Za ve͑baka, ṭetär sa vädäne eysa ki, Bava nä me buruġo, nääl Yerusalima *bul ḳoc̣bsun tene lazəm bakal.
Vä͑n tenan ava heṭunan *bul ḳoc̣bsa, yan isä avayan heṭuyan *bul ḳoc̣bsa, \ šoṭaynaḳ ki, čarḳesun iudeyxoxune.
Ama ṭe vädä enesa, šo ene harene ki, hägigi *bul ḳoc̣balxon Bava urufen saal üḳen *bul ḳoc̣balṭun. Axəri Bavanal Ičeynaḳ metär *bul ḳoc̣balxone qä͑vesa.
Buxaʒ́ux Ič Urufe, Iču *bul ḳoc̣balxonal urufen q̇a üḳen *bul ḳoc̣balaṭun".
Čuġon Šoṭo pine: "Avazu ki, "Xrisṭos" uḳala č̣äḳeci * sa Tan eġale. Šo eġaṭan yax här šeya avabakesṭale".
Isusen šoṭo pine: "Vaxun äyitḳalo Šone, Zu Šozu".
Me arane Isusi šagirdxo harṭun, Šoṭay sa čuġoxun exlätpsuna aḳi määṭṭälṭun mandi, ama šuḳḳalen "ḳän čuresay?" nääl "heṭaynaḳen ke čuġoxun exlätpsa?" pi tene xavar haq̇i.
Čuġon isä xene gamata oq̇a laxi šähärene qaybaki. Šoṭin amdarxo pine:
"Ekinan, zu biq̇i äšurxo bitova za exlätṗi Amdara aḳanan. Bärkä beši yaq̇ be͑ġala Xrisṭos Šone?"
Amdarxoval šähärexun č̣eri Isusi ṭo͑ġo͑lṭun hari.
Me arane šagirdxon Šoṭo xoyinśṭunbsay: "Ravvi, sa šey uka".
Ama Isusen šoṭoġo pine: "Zasṭa ṭetär sa ukune bu ki, vä͑n šoṭoxun xavarsuznan".
Ṭe vädä šagirdxon "bärkä šinesa Koṭaynaḳ ukun ečerene?" pi sun-sunaxun xavarṭun haq̇i.
Isusen šoṭoġo pine: "Za Yaq̇abiṭay čureġalṭu ämälbsun, Šoṭay äšlä tamambsun Zaynaḳ ukun ḳinäḳe.
Vä͑n "exeynaḳ hälä biṗ xaše mande" tenan nex? Zu isä vä͑x nexzu ki, ef pulmoġo qaypi q̇oruġa be͑ġanan: äkin ene neśum bakene, exṗala vädäne. *
Mone, exṗalen iz zähmäti haq̇q̇al exesṭa, hämišäluġ yäšäyinšeynaḳ mähsulal topebsa. Hametär, ham biṭalo, ham exṗalo sagala mu͑qṭunbaksa.
Metärluġen, "sunṭin bineṭon, ṭe sunṭin exebon" äyit hari düze č̣eysa.
Zu vä͑x iz loxol vä͑n zähmät nu zapi sa mähsula exbsaz yaq̇abe. Q̣eräzṭoġonṭun zähmät zapi, vä͑n isä šoṭoġoy zähmäti baranan šärik baki".
Ṭe šähärexun bakala *samariyaluġoxun gelo "bezi biq̇i bütüm äšurxo za exlätebi" pi šahidluġbala čuġoy äyitä görä Isusa ve͑ne baki.
Šoṭaynaḳal *samariyaluyox Isusi ṭo͑ġo͑l hari Šoṭo xoyinśṭunbi ki, ičoġoy ṭo͑ġo͑lq̇an mandi. Isusal ṗä͑ ġi ṭeṭiyane mandi.
Isusen Ičin šoṭoġoxun exlätpsuna görä lap gele amdare Šoṭo ve͑ baki.
Šoṭoġon čuġo nexṭuniy: "Ene täk vi äyiten teyan ve͑ baksa, ene yanal beši u͑mu͑ġon ibaki avayanbaki ki, hägigiyal, dünyänä Čarḳesṭal Mone".
Isus ṗä͑ ġinaxun oša ṭeṭiin č̣eri Galileyin täräf yaq̇ane bafṭi.
Isusen Ičin sa vädä *xavarečali iz yurdnu hörmät nu baksuni barada peney. *
Ama Galileyina eġaṭan galileyaluġon Šoṭo šaaṭṭun q̇abulbi, šoṭaynaḳ ki, šoṭoġonal axsibayi vädine Yerusalima hari Šoṭin ṭeṭiya bi här šeya aḳeṭuniy. *
Hametär, Isus ṗurum moṭoxun be͑ś Izi xena fina taradi gala, Galileyin Gana ayizene hari. Me ayize padčaġeynaḳ äšṗala sa amdare buy. Šoṭay ġar Ḳefernauma azari basḳeney.
Me amdar Isusi Iudeyinaxun Galileyina eysuna ibakaṭan Šoṭay ṭo͑ġo͑le hari. Šoṭoxun xoyinśebi ki, hari iz ġara q̇olaybane, šoṭaynaḳ ki, iz ġar elmoġoy loxoley.
Isusen šoṭo pine: "Vä͑n müṭläḳ möǯüzälü niśanxo aḳinan buq̇on ki, vä͑sṭa ve͑luġ bakane!"
Padčaġeynaḳ äšṗala amdaren isä Isusa pine: "Bez *aġa, hälä ki bez ġar ṗuritene, taġen!"
Isusen šoṭo pine: "Taki ḳoya, vi ġar yäšäyinšale". Ṭe amdaral Isusi äyitä ve͑baki taneci.
Šo hälä ḳoya tene ṗaṗey, iz *ḳulurxon hari iču iz ġare q̇olaybaksunaṭun xavar tadi.
Šoṭin ḳulurxoxun iz ġare šaaṭ baksuni \ vaxṭane xavar haq̇i, šoṭoġonal piṭun: "Näyni vu͑ġu͑mǯi saadasṭane * iz q̇əzdərma ciri".
Bavanal q̇amiše baki ki, mo Isusen iču "vi ġar yäšäyinšale" pi vädinene bake. Hametär, šo ičal, dirisṭ iz külfätäl Isusa ve͑ṭun baki.
Mo Isusi Iudeyinaxun Galileyina hariṭuxun oša aḳesṭi ṗä͑mǯi möǯüzälü niśaney.
