Me vädä Isusi härräminä hazarxon amdarxone gireci. Šorox ṭeq̇ädär geleṭuniy ki, sun-sunay loxolṭun laysay. Isusen süfṭä Iz šagirdxoxun exlätä burqi pine: "Fariseyxoy ä͑yinäl ma ve͑bakanan! Šoṭaynaḳ ki, šorox \ ṗäćolaṭun. *
Ṭetär č̣aṗ sa šey teno ki, äšḳärä nu č̣eġane, ṭetär č̣äṗḳin sa šeyal teno ki, nu avabakeġane. *
Moṭo göräl vä͑n bayinq̇una piṭu ġene išiġa ibakalṭun, ṭe bonin otaġa u͑mu͑ġoy tume pi här äyitäl u͑ġu͑lxun bayan bakale.
Ay Bez dosṭurxo, vä͑x nexzu: bädänä besṗi šoṭoxun oša q̇eräz hiḳḳal nu bes bakalṭoġoxun ma q̇ə͑banan.
Ama šuxun q̇ə͑bsun lazəm baksuna vä͑x uḳaz: amdara besṗiṭuxun oša, šoṭo ǯähännämä boses bakala Buxaʒ́uġoxun q̇ə͑banan! Hoo, vä͑x nexzu, Šoṭoxun q̇ə͑banan.
Qo čoval tene ki, ṗä͑ xuri tänginä toyeġalo? Ama šoṭoġoyal sayǯo Buxaʒ́uġoy eyexun tene č̣eysa.
Ef bel bakala popurxoval isä bo͑q̇ä͑lecene! Ma q̇ə͑banan, vä͑n bo͑q̇ä͑lpi čarḳes nu bakala čovalxoxun gele däyärlunan!
Zu vä͑x moṭoz nex: šiin Za amdarxoy be͑ś čalxayin, Amdari Ġarenal šoṭo Buxaʒ́uġoy angelxoy be͑ś tämiz üḳen čalxale.
Ama šiin Za amdarxoy be͑ś nu q̇abulbayin, šoval Buxaʒ́uġoy angelxoy be͑ś q̇abul tene bakal.
Amdari Ġare äleyinä ḳänesa uḳala amdar baġəšlayinšakale, ama ω͑vel Urufi äleyinä uḳalo tene baġəšlayinšakal. *
Vä͑x sinagogxo, kalaluġbalxoy be͑ś ečaṭan vä͑x hetär čarḳesṭuni, ḳä \ upsuni barada naraat ma bakanan.
ω͑vel Urufen vä͑x ṭe dayġinasṭa ḳä upsuna zombale". *
Amdarxoy bošṭan sunṭin Isusa pine: "Määlim, bez vičä upa ki, bavaxun mandi mirasa zaxun ǯöybeq̇an".
Isusen šoṭo metäre ǯoġab tadi: "Ay viči, Za šina ef loxol divanbal, nääl ki, mal ǯöybal laxe?"
Oša Isusen šoṭoġo pine: "Diggätlü bakanan, här ǯür tamaxkärluġaxun ä͑xil bakanan, šoṭaynaḳ ki, amdari šaaṭ yäšäyinšbsun dövläti geleluġaxun asulu tene".
Ṭe vädä Isusen šoṭoġo me mäsälinäne exlätṗi: "Sa varlu amdari oćalen bol mähsule tasṭa.
Me amdarenal iz üḳe boš fikirebsa: "Me mähsula bez laxala ga butezax. Isä ḳä baz?"
Oša pine: "Metär booz: bez bütüm ambarxo carḳoz. Oša samalal kalo biq̇i bez bütüm taxəla q̇a mala ṭiya baḳoz.
Oša isä bez elmux iräätluġa č̣eġale. Bez yäšäyinši axəral ciriḳ bäs bakala var-dövlätzax bu. Käyi-u͑ġi kef booz!"
Ama Buxaʒ́uġon šoṭo pine: "Ay axmaġ, me üše vi elmoġo vaxun haq̇alṭun. P̣oy vi girbiyo šu mandale?"
Hametär ičeynaḳ dövlät girbi, ama Buxaʒ́uġoy be͑ś dövlätlü nu bakala här sunṭay axər metär bakale".
; 25-34)
; 25-34)
Oša Isusen iz šagirdxo metäre pi: "Koṭaynaḳal Zu vä͑x nexzu: "Ḳä ukalyan?" pi, ef elmoġoy, "Ḳä laḳalyan?" pi, ef bädäni fikirä ma zapanan.
Elmux uksunaxun, bädän isä lapsunaxun vaǯibe.
Ġä͑ynoġo be͑ġanan: šoṭoġon nä biteṭunsṭa, nä exteṭunbsa, nä ambarxo teṭux bu, nä kururxo. Ama Buxaʒ́uġon šoṭoġo ukesesṭa. Vä͑n isä q̇ušurxoxun heq̇ädär däyärlunan!
Ef maṭine fikirbsunen iz ömürä malǯääl bakayin boxoy bes bakon?
Ägär vä͑n me mic̣iḳ šeya bes tenan baksasa, ene q̇eräz šeyurxoy fikirä zaṗsuni he määnä bu?
Isä vardurxoy hetär kalabaksuna be͑ġanan! Šoṭoġon nä zähmät teṭun zaṗe, nä ä͑lteṭunsṭa. Ama vä͑x nexzu, lap Solomonenal bütüm iz var-dövläti boš me vardurxoy sayǯäṭullariḳ tene lapey. *
Ay ve͑luġ mal bakalxo, Buxaʒ́uġon čöle ġe baki, äyč̣ä isä aruġo boseġala oya metär lapesesṭasa, yäni vä͑x tene lapesṭon ki?
Šoṭo göräl "ḳä ukalyan?", "ḳä u͑ġä͑lyan?" pi fikir ma banan, moṭaynaḳ naraat ma bakanan.
Šoṭaynaḳ ki, mo Buxaʒ́uġo nu čalxalṭoġoy äsäs fikire. Ef Bavan isä efi heṭu ehṭiyäǯ baksuna avane.
Vä͑n isä täk Buxaʒ́uġoy padčaġluġa \ qä͑veynan, ṭe vädä mandi šeymuxal vä͑x avuzin tadeġale.
Ma q̇ə͑ba, ay mic̣iḳ sürü! Šoṭaynaḳ ki, ef Bavan padčaġluġa vä͑x tasṭunane čureci.
Ef bakalṭu toydanan, käsibxo paybanan. Vä͑ynaḳ isä nu bisibakala kisoox, göynul nu čarḳala dövlät häzirbanan. Ṭeṭiya nä oġri tene eġon, nä šoṭo məġməġen tene ḳac̣ḳon.
Šoṭaynaḳ ki, ef dövlät mayanesa, ef üḳäl ṭeṭiya bakale".
; 24:42-51; Mrḳ. 13:32-36)
; 24:42-51; Mrk'. 13:32-36)
"Be͑ġanan ki, ef bə͑ġ hämišä ġać, čiraġxo isä bäč̣üḳṭi häzirq̇an baki.
Laśḳoyaxun qaybakala aġay yaq̇a be͑ġala, šoṭin ćomo ṭaṗsun q̇a qaypsuna häzir bakala nökär ḳinäḳ bakanan. *
He bäxṭäväre ṭe nökärxo ki, ičoġoy aġa qaybakaṭan šoṭoġo muġure aksa! Vä͑x düzinäz nex: ṭe vädä šoṭin ičine iz bə͑ġa ġaćṗi nökärxo sulfin bel arcesṭon, šoṭoġo q̇ulluġebon.
Aġan ičoġo lap üšenin yarine, nääl ki käykäymoġo hari muġur aḳala nökärxo he bäxṭävärṭun!
Avabakanan ki, ägär ḳožin q̇onʒ́uġon oġrin mani vädine eysuna avabakiniy, iz ḳož fu͑q̇teneġoy.
Hametär, vä͑nal häzir bakanan, šoṭaynaḳ ki, Amdari Ġar vä͑n nu yaq̇be͑ġala vädine eġale".
P̣eṭeren pine: "Ay Q̣onʒ́ux, me mäsälinä täk yaynaḳen exlätpsa, yoxsa bitoṭaynaḳ?"
Q̣onʒ́uġon ǯoġabe tadi: "Aġan iz nökärxoy loxol kalo laxi, šoṭoġo iz vädinesṭa śum tasṭuna tapšurbi exṭibärlu q̇a haq̇ullu nökär šuva ṗoy?
He bäxṭäväre ṭe nökär ki, iz aġan ḳoya qaybakaṭan iču äšlin bele aksa!
Vä͑x düzinäz nex, aġan me nökärä iz bito var dövläti loxol kalo laxale.
Ama ägär ṭe nökären iz üḳe boš "bez aġa č̣äyi eġale" pi, ṭə͑yä͑mi nökärxo q̇a čuux-nökärxo ṭaṗḳayin, käyi-u͑ġi finaġoyluġbayin,
ṭe nökäri aġa šoṭin nu yaq̇be͑ġala ġine, sal iz haq̇əle nu eġala vädinesṭa eġale. Hariyal šoṭo bə͑hi ǯaza tadale, ošal exṭibärsuzṭoġoxun sa biq̇ale.
Iz q̇onʒ́uġoy čureġalṭu avabaksun šoṭay čureġalṭu ämäl nu bala nökär gele ṭaṗeġale.
Aġay čureġalṭu nu avabaki ǯazina layiġ äš biq̇alo isä mal ṭaṗeġale! Šu gelene tadecesa, šoṭoxun geleyal haq̇eġale. Šu gele äše tapšurbakesa, šoṭoxun täläb bakaloval gele bakale.
Zu dünyäne arux ciṗsaz hare. Ḳä bakoy me arux bäč̣üḳeci boḳi bakiniy!
Ama Zu gele äzyät aḳi biyalazu. Za tapšurbaki äšläl bex ṗaṗesṗamin Zu čätinluġi boš bakalazu! *
Vä͑n fikirnanbsa ki, Zu oćali ćoyel šiṗluġ ešṭaz hare? Tää, \ vä͑x nexzu ki, Zu ǯöybaksun ešṭaz hare!
Šoṭaynaḳ ki, moṭoxun oša sa ḳoya qo tan yäšäyinšebsasa, šorox sun-sunaxun ǯöybaki xib tan ṗä͑ tani loxol, ṗä͑ tan xib tani loxol e͑qeġale.
Bava ġaraxun, ġar bavaxun, nana xuyäräxun, xuyär nanaxun, q̇aynako binaxun, bin q̇aynakoxun ǯöybakalṭun". *
Oša Isusen bütüm ǯamaata moṭoval pine: "Vä͑n be͑ġ batḳala täräfäxun eġala asoya aḳaṭan haṭe saad "aġala eġale" nexnan, düzäl č̣enesa.
Güney täräfäxun muše fupsuna aḳaṭan "gele gam bakale" nexnan, düzäl č̣enesa.
Ay ṗä͑ćolorox, oćali q̇a göye niśanxon ḳä upsuna q̇amišakes bananksa, ama häysäṭin vaxṭen ḳä upsuna q̇amišakes tenan baksa?
Vä͑ynaḳ heṭay düz baksuna heṭu görä q̇amišakes tenan baksa?
Axəri ägär hun va taxsərkär balṭuxun sagala divanbali ṭo͑ġo͑l taġayin, vaynaḳ šaaṭe bakon ki, šoṭoxun yaq̇aǯä barišakavax. Tenesa, šoṭin va divanbali ṭo͑ġo͑l xorḳale, divanbalen isä va zindani kalaṭay kiyel tadale. Šoṭinal va zindana bosale.
Vä͑x nexzu: ṭeṭiin axərənǯi köpiyal ciriḳ tadinuṭ ten č̣eġal". *
