; Luḳ. 5:17-26)
; Luk'. 5:17-26)
Isus lodḳina laci gölä č̣ovaki Iz yäšäyinšala šähärene * hari.
Sa hema tanen Šoṭay ṭo͑ġo͑l nasilḳin boš ṗaraličen duġi sa amdaraṭun ečeri. Isusen šoṭoġoy ve͑baksuna aḳi ṗaraličen duġi amdara pine: "Üḳlü baka, Bez ġar, vi günaxxo baġəšlayinšebaki".
Ṭe vädä ḳanun zombalxon ičoġoy üḳe boš fikirṭunbi: "Me amdaren \ Buxaʒ́uġoy äleyinäne äyite".
Šoṭoġoy fikirbalṭu avabakala Isusen pine: "Heṭaynaḳ ef üḳe boš pis šeyurxonan fikirbsa?
Manu gele hasanda? "Vi günaxxo baġəšlayinšebaki" upsun, yoxsa "Hayza, tarapa!" upsun?
Häysä vä͑n avabakalnan ki, Amdari Ġare oćali ćoye günaxxo baġəšlayinšala exṭiyär bune". Oša ṗaraličen duġiṭu pine: "Hayza, vi nasilḳina exṭa ḳoya taki!"
Azari hayzeri iz ḳoyane taci.
Amdarxon moṭo aḳi määṭṭälṭun mandi, amdarxo metär exṭiyär tadala Buxaʒ́uġo alxəšṭunbi
; Luḳ. 5:27-32)
; Luk'. 5:27-32)
Isusen Iz yaq̇a davambaṭan naloggirbala gala arci Maṭfey * c̣iyen sa amdara aḳi šoṭo pine: "Bez bać̣anexun eki". Šoval hayzeri Isusi bać̣anexun taneci.
Oša Isus šoṭay ḳoya śum ukaṭan gele naloggirbalxo q̇a q̇eräz günaxkärxoval hari Šoṭoxun saal Iz šagirdxoxun sagala arṭunci.
Fariseyxon moṭo aḳi Šoṭay šagirdxo piṭun: "Heṭaynaḳ ef Määlimen naloggirbalxoxun q̇a günaxkärxoxun sagalane ukun uksa?" *
Ama Isusen moṭo ibaki pine: "Azarsuzṭoġoy tää, azariṭoġoy \ doxṭura ehṭiyäǯebu.
Vä͑n süfṭä takinan, "Zu bütümṭin sun-sunaynaḳ üḳ boḳospsun aḳesṭunaz čuresa, q̇urban ešṭun tää" * äyiti mäninä zombakanan. Axər Zu düzgünṭoġo tää, günaxkärxoz ḳalpsa hare".
; Luḳ. 5:33-39)
; Luk'. 5:33-39)
Ṭe vädä Ioani šagirdxo Isusi ṭo͑ġo͑l hari piṭun: "Heṭaynaḳ yan saal fariseyxon ġurux eyanfsa, ama Vi šagirdxon ġurux teṭun efsa?"
Isusen šoṭoġo ǯoġabe tadi: "Laśḳoybakala bäy ičoġoy ṭo͑ġo͑l arci yoldašxon yas efes baṭunko? Ama bäyä ičoġoy aranexun tašala ġimxo eġale, ṭe vädäl ġurux efalṭun.
Šuḳḳalen bisi paltara täzä parčinaxun yamaluq̇ tene duġsa. Šoṭaynaḳ ki, täzä yamaluq̇ bisi paltaraxun čukeġo, zəġbaki ga samalal pise bakon.
Šuḳḳalenal täzä fina bisi tuluġxo tene baye. Tenesa tuluġxo ṭo͑pe͑ḳo, fi baredo, tuluġxoval xarabe bakon. Ama täzä fina täzä tuluġxoṭun baye, ṭe vädä tuluġxoval, fiyal šaaṭ manṭundo".
; Luḳ. 8:40-56)
; Luk'. 8:40-56)
Me šeymoġo šoṭoġo exlätṗaṭan, mone, sa kalaluġbale hari, Isusa bul ḳoc̣bi pine: "Bez xuyär tevärǯä ṗure, \ ama hari Vi kula iz loxol laxayin, yäšäyinšale".
Isus hayzeri Iz šagirdxoxun sagala šoṭay bać̣anexune taci.
Haṭe vädine ṗac̣c̣e usen ičuxun ṗi taysun bakala sa čuux Isusi bać̣anexun hari Šoṭay paltari ätäyä iz kula lafṭesedi.
Šoṭaynaḳ ki, ičin-ičeynaḳ nexey: "Ägär Iz paltara lafṭayiz, q̇olayezbakon".
Isusen fərəpi šoṭo aḳi pine: "Üḳlü baka, bez xuyär, vi ve͑baksunen va čarḳesedi". Čuux haṭe saad q̇olayebaki.
Isus kalaluġbali ḳoya eġaṭan ṭüṭṭäy farḳalxo saal o͑no͑ḳala amdarxo aḳi
pine: "Ä͑xil bakanan memiin, šoṭaynaḳ ki, xuyär tene ṗure, haṭetär basḳene". Šoṭoġon Isusi loxol axśumṭunpi.
Ama ǯamaat č̣öš č̣evḳeciṭuxun oša Isus bona baci xuyäri kula bineq̇i, xuyäräl turele hayzeri.
Me xavar ṭe oćali här täräf yäymišebaki.
Isusen Iz yaq̇a davambaṭan ṗä͑ ḳać̣i amdar Šoṭay bać̣anexun hari harayṭunpi: "Ay Davidi Ġar! Yax gorox eki!" *
Isus ḳoya baġaṭan ḳać̣iyox Šoṭay ṭo͑ġo͑lṭun hari. Isusen šoṭoġo pine: "Me äšlä biq̇suna Bez bašaraġ baksuna ve͑nanbaksa?" Ḳać̣i amdarxon Šoṭo piṭun: "Hoo, ay Q̣onʒ́ux".
Ṭe vädä Isusen Iz kula \ šoṭoġoy pula lafṭesṭi pine: "Vä͑ynaḳ ef ve͑baksuna göräq̇an baki".
Šoṭoġon aksaṭun burqi. Isusen "be͑ġanan, šuḳḳalen me barada maq̇an avabaki" pi, šoṭoġo möhḳäm tapšurebi.
Ama šoṭoġon č̣eri Šoṭay barada xavara ṭe oćali här täräfä yäymišṭunbi.
Šorox taciṭuxun oša ičusṭa murdar uruf bakala lal sa amdara Isusi ṭo͑ġo͑lṭun ečeri.
Murdar urufa č̣evḳiṭuxun oša lalen äyitpsane burqi. Amdarxon määṭṭäl mandi piṭun: "Israila sal sa vädä metär sa šey tene bakey".
Ama fariseyxon nexṭuniy: "Šoṭin murdar urufxoy kalaṭay zorene murdar urufxo č̣evksa". *
Isus bütüm šähärmoġo saal ayizmoġo tarapi-fərəpi šoṭoġoy sinagogxoy boš zomebsay, padčaġluġi Mu͑q Xavarane karoozbsay, här ǯürä azara, här ǯürä q̇ać̣ḳalṭoġo q̇olayebsay. *
Ǯamaata aḳaṭan šoṭoġoynaḳ Isusi üḳe boḳi, šoṭaynaḳ ki, čobansuz eġelxo ḳinäḳ zorsus saal čarasuzṭuniy. *
Ṭe vädä Isusen Iz šagirdxo pine: "Mähsul \ gelene, äšṗalxo isä male.
Moṭaynaḳal mähsuli Q̣onʒ́uġo xoyinśṗanan ki, Iz mähsula girbseynaḳ äšṗalxoq̇an yaq̇abi". *
