Göye padčaġluġ savaxṭan üšenen hayzeri iz ṭulluġeynaḳ äšṗal biq̇seynaḳ č̣eġala mülke q̇onʒ́uġone ošq̇ar.
Šoṭin äšṗalxoxun ġina sa dinara * iräziläyinšäki šoṭoġo iz ṭulluġane yaq̇absa.
Xibimǯi saada ə͑śa * šo meydane č̣eri ṭeṭiya äšsuz čurpi amdarxone aksa.
Šoṭoġoval nexe: "Vä͑nal ṭulluġa takinan, ef haq̇q̇a tadoz".
Šoroxal taṭunsa. U͑qu͑mǯi saada ə͑śa * saal vuyumǯi saada ə͑śaal * šoṭin č̣eri hametärebi.
Sac̣c̣emǯi saada ə͑śa * šo ṗurumal meydane č̣eri ṭeṭiya čurpi amdarxo aḳi šoṭoġo nexe: "Heṭaynaḳnan dirisṭ ġi memiya äšsuz čure?"
Šoṭoġon ǯoġabṭun tadi: "Šoṭaynaḳ ki, šuḳḳalen yax äš tene tadi". Šoṭoġo "vä͑nal ṭulluġa takinan" nexe.
Biyäsin bakaṭan ṭulluġi q̇onʒ́uġon iz näzärätčinä nexe: "Äšṗalxo ḳalpa, axərənǯiṭoġoxun burqi samǯiṭoġol ciriḳ ičoġoy haq̇q̇a tada". *
Sac̣c̣emǯi saada ə͑śa äšlä hariṭoġon härṭin sa dinarṭun haq̇sa.
Samǯi hariṭoġon samal gele haq̇sunaṭun fikirbsay, ama šoṭoġonal härṭin sa dinarṭun haq̇sa.
Ičoġoy tänginä haq̇iṭuxun oša ḳožin q̇onʒ́uġo šikäätbi nexṭun:
"Me axərənǯi eġalṭoġon bito sa saadṭun äšṗi, hun isä šoṭoġo yaxun barabaren biq̇sa. Axər yan dirisṭ ġi ǯärdala be͑ġe oq̇ayan äšṗe".
Šoṭin isä šoṭoġoy sunṭu ǯoġab tadi nexe: "Bez dosṭ, zu va görä haq̇suzluġ tezbi, hun zaxun sa dinara iräziläyinštenbaki ki?
Vi haq̇q̇a exṭa taki! Axərənǯiṭuval va tadiṭay q̇ädär tasṭunez čuresa.
Bez tänginäxun bez čureġalṭubsuna exṭiyär tezax bu? Yoxsa hun bez kulqayluġa görä paxəlluġenbsa?"
Hametäräl, axərənǯiyorox samǯi, samǯiyorox isä axərənǯi bakalṭun". *
; Luḳ. 18:31-34)
; Luk'. 18:31-34)
Isus Yerusalima laġaṭan yaq̇a \ ṗac̣c̣e šagirdä ṭo͑o͑x ḳalpi ǯöyǯä šoṭoġo pine:
"Mone,Yerusalimayan laysa, Amdari Ġar samǯi be͑yinśxoy q̇a ḳanun zombalxoy kiyel tadeġale. Šoṭo bisuni q̇ärar tadalṭun,
laġa haq̇i tatarlayinši ošaal xače loxol ṭä͑q̇sṭeynaḳ Buxaʒ́uġo nu ve͑bakalxoy kiyel tadalṭun. Ama Šo xibimǯi ġine be͑yinbakale"
Ṭe vädä Zavday ġarmoġoy nana iz ġarmoġoxun sagala Isusa ə͑śalayinšaki Iz be͑ś čökṭi Šoṭoxun ḳänesa čureci.
Isusen čuġoxun xavare haq̇i: "Hun ḳän čuresa?" Čuġon Šoṭo pine: "Äyit tada ki, bez me ṗä͑ ġar Vi padčaġluġa soġo Vi yön täräf, ṭe soġo isä tärs täräf arcaṭun".
Isusen šoṭoġo pine: "Ef ḳä čuresuna sal vä͑nal tenan ava. Zu u͑ġä͑lä ǯama. * vä͑nal u͑ġe͑s bananko?" Šoṭoġon ǯoġabṭun tadi: "Bayanko".
Isusen šoṭoġo pine: "Hägigiyal, Bez u͑ġä͑lä ǯama u͑ġä͑lnan. Ama Bez yön täräf nääl tärs täräf arsṭuna iǯaza tasṭun Bez exṭiyärä tene. Bez Bavan ṭiyana šineynaḳ häzirbenesa, šoroxal arcalṭun".
Moṭo ibakala vic̣ šagirdi ṭe ṗä͑ vičey loxol äǯuġone biq̇i.
Isusen šagirdxo Iz ṭo͑ġo͑l ḳalpi pine: "Avanan ki, q̇eräz millätxoy kalaluġbalxon amdarxoxun ḳä čurṭunsasa bsaṭun, \ ičoġoy kömäyčiġonal šoṭoġoy loxol aġaluġṭunbsa.
Ef arane isä ketär maq̇an baki. Ef bošṭan kalo baksun čureġalo ef nökärq̇an baki.
Ef arane šu samǯi baksun čuresaisä, ṭə͑yä͑miṭoġoy q̇ulluġčiq̇an baki. *
Šoṭaynaḳ ki, Amdari Ġaral tene hare ki, Šoṭo q̇ulluġbaṭun, harene ki, Ičin q̇ulluġbane hamal geleṭoġoy elmoġo Iz elmoġoy toyen čarḳesṭane".
; Luḳ. 18:35-43)
; Luk'. 18:35-43)
Isus Iz šagirdxoxun sagala Yerixonaxun č̣eġaṭan kala sa top ǯamaat Šoṭay bać̣anexune taci.
Ṭeṭiya, yaq̇e ṭo͑ġo͑l arci ṗä͑ ḳać̣i amdaren Isusi ṭeṭiin č̣ovaksuna ibaki "Ay Q̣onʒ́ux, ay Davidi Ġar! Yax gorox eki!" uḳa harayṭunpi. *
Ǯamaaten šoṭoġo q̇adaġanbi ičoġoy säsä bosṭunṭun čureci, ama šoṭoġon "Ay Q̣onʒ́ux, ay Davidi Ġar! Yax gorox eki!" uḳa, samalal osṭaarṭun haraypi.
Isusen čurpi šoṭoġo Iz ṭo͑ġo͑l ḳalpi xavare haq̇i: "Ḳän čuresa vaynaḳ baz?"
Šoṭoġon piṭun: "Ay Q̣onʒ́ux, bez pulmoġon aḳeq̇an".
Isusi šoṭoġoynaḳ üḳe boḳi, Iz kula šoṭoġoy pulmoġoy loxole laxi. Haṭe \ saad šoṭoġoy pulmoġon aneḳi, šoroxal Isusi bać̣anexunṭun taci.
