Isusen šoṭoġo pine: "Vä͑x düzinäz nex: memiya bakalṭoġoy bäziṭoġon hälä ičoġoy ömürä axəra ṗaṗesṗinuṭ Buxaʒ́uġoy padčaġluġi eysuni zora aḳalṭun".
; Luḳ. 9:28-36)
; Luk'. 9:28-36)
U͑q ġi oša Isusen Ičuxun P̣eṭera, Iaḳova saal Ioana exṭi alloy sa buruġone laci. Šorox ṭeṭiya täkṭuniy. \ Bürdän šoṭoġoy piin be͑ś Isusi aḳesun badalebaki.
Šoṭay paltar c̣aldala, pula tašala mac̣i irängene baki. Oćali ćoyel sal sa paltar tämizbalen šoṭo metär mac̣ibes \ batenekoy.
Oša Ilya q̇a Moiseyal šoṭoġoynaḳ aḳṭunci. Šoṭoġon Isusaxun exlätṭunbsay.
P̣eṭeren Isusa pine: "Määlim! He šaaṭe ki, yan memiyayan. Eki xib dänä mandala ga biq̇en, soġo Vaynaḳ, soġo Moiseyeynaḳ, soġoval Ilyaynaḳ".
Šoṭin ičinal avateney ḳä uḳane, šoṭaynaḳ ki, ičoġo q̇ə͑yen haq̇eney.
Hame vädä sa asoyen ičoġoy loxol xožine saki. Asoyi bošṭan sa säse hari: "Mo Bez čureġala Ġare, Koṭo u͑mu͑xlaxanan!" *
Fərəṗi saal be͑ġaṭan isä ičoġoy ṭo͑ġo͑l Isusaxun bašq̇a ene šuḳḳal teṭun aḳi.
Buruġoxun ciġaṭan Isusen Iz šagirdxo tapšurebi ki, Amdari Ġar ṗuri ganuxun be͑yinbakamin ṭeṭiya aḳiṭoġo šuḳḳala nu uḳaṭun.
Šoṭoġonal moṭo ičoġoy üḳe boš eṭunfi, ama ičoġoy arane exlätṗaṭan "ṗuri ganuxun be͑yinbaksun" äyitin mäninä q̇amišaksunṭun čuresay.
Šoṭoxun isä xavarṭun haq̇i: "Ḳanun zombalxon heṭaynaḳṭun nex ki, süfṭä Ilya eġalane?" *
Isusen šoṭoġo metäre pi: "Düze, Ilya süfṭä hari här šeya häzirbalane. P̣oy Amdari Ġare ä͑mxun heṭaynaḳe camece ki, amdarxon Šoṭo teṭun q̇abulbal šoṭoġoy kiyexunal Šoṭin gele äzyät zaṗḳale?
Ama Zu vä͑x nexzu: Ilya ene hare. Iz ä͑mxun cameci \ ḳinäḳäl, ḳä čurṭuncisa šoṭay bel eṭunčeri"
; Luḳ. 9:37-43)
; Luk'. 9:37-43)
Šorox ičoġoxun nu taci šagirdxoy ṭo͑ġo͑l eġaṭan gele amdari topbaksuna saal sa hema ḳanun zombalxoy šagirdxoxun höǯätbsunaṭun aḳi.
Isusa aḳala ḳinäḳ amdarxo bütüm määṭṭäl manṭundi, Šoṭay be͑ś ṭiṭeri Šoṭo "xeyirq̇an baki" piṭun.
Isusen xavare haq̇i: "Šoṭoġoxun heṭay ä͑mxunnan höǯätbsay?"
Amdarxoy aranexun sunṭin Šoṭo ǯoġabe tadi: "Määlim! Zu vi ṭo͑ġo͑l lalluġi urufa biq̇eci bez ġaraz ečeri.
Urufen šoṭo maya biq̇ayin, oćalane saksa, ṭe vädäl äylin źomo kä͑funale baksa, šoṭin uluxxo ġərəč̣esesṭa, ošal iz bädän dirisṭ q̇arinebaksa. Vi šagirdxoxun xaišezbi ki, me urufa č̣evḳaṭun, ama teṭun baǯarbi".
Isusen isä šoṭoġo pine: "Ay nu ve͑bakala näsil! Hevaxṭal ciriḳ vä͑xun mandoz? Hevaxṭal ciriḳ vä͑x portṗoz? Äylä Bez ṭo͑ġo͑l ečanan!"
Äylä Šoṭay ṭo͑ġo͑lṭun ečeri. Urufenal Isusa aḳala ḳinäḳ äylä źəḳepi. Äyel oq̇a biti ṭəḳəreney, iz źomoxun kä͑fe barsṭay.
Isusen šoṭay bavaxun xavare haq̇i: "Me äyel hevaxṭinaxune metär baksa?" Äylin bavan pine: "Äyelluġaxun.
Me urufen bespseynaḳ koṭo sa hema käräm aruġo, xenane bose. Ama baǯarenbsasa, yax kömäyba, yax gorox eki!"
Isusen šoṭo pine: "Baǯarenbsasa" nexnu? Ve͑bakalṭaynaḳ här šey mümküne!"
Äylin bavan haṭe saad harayepi: "Ve͑zu! Ama kömäyba ki, bezi üḳe nuve͑luġeynaḳ ga maq̇an mandi!"
Isusen amdarxoy ṭiṭeri eysuna aḳaṭan murdar urufa q̇adaġanbi pine: "Ay lalluġi q̇a karluġi uruf, Zu va ämirezbsa, me äylin bošṭan č̣eki, eneyal ma baki!"
Urufen haraypi äylä osṭaar źəḳpsun č̣ere. Äyel meyid ḳinäḳ bineti, geleṭin pine: "Ko ṗurene!"
Ama Isusen äylin kiyexun biq̇i alanebi, šoval turele hayzeri.
Isus ḳoya baciṭuxun oša Iz šagirdxon ǯöyǯä Šoṭoxun xavarṭun haq̇i: "P̣oy heṭaynaḳ ṭe urufa yan č̣evḳes teyan baki?"
Isusen šoṭoġo ǯoġabe tadi: "Me ǯürä urufxo täkč̣ä afərənene * č̣evḳes baksa".
; Luḳ. 9:43-45)
; Luk'. 9:43-45)
Šorox ṭeṭiin č̣eri Galileyinaxunṭun č̣ovaksay. Isusen čurtenesay ki, šinesa moṭoxun xavar bakane,
šoṭaynaḳ ki, Iz šagirdxone zombsay. Šoṭoġo metäre nexey: "Amdari Ġara xäyanätbi amdarxoy kiyel tadalṭun, šoṭoġonal Šoṭo besṗalṭun. Puriṭuxun xib ġi oša isä \ Šo be͑yinbakale".
Šagirdxon me äyitä q̇amišteṭunbaki, ama Šoṭoxun xavar haq̇sunal q̇ə͑ṭunbsay
; Luḳ. 9:46-50; 17:1-2)
; Luk'. 9:46-50; 17:1-2)
Šorox Ḳefernaumaṭun hari. Ḳoya baġaṭan Isusen Iz šagirdxoxun xavare haq̇i: "Yaq̇ eġaṭan heṭay ä͑mxunnan höǯätbsay?"
Ama šuḳḳalen qaqtenepi, šoṭaynaḳ ki, yaq̇ eġaṭan ičoġoy arane ši än kalo baksuni ä͑mxunṭun höǯäṭbey. *
Isusen arci ṗac̣c̣e šagirdä Iz ṭo͑ġo͑l ḳalpi pine: "Ef bošṭan šu samǯiyo baksun čuresasa, bitoṭuxun axərənǯi, bitoṭayal q̇ulluġčiq̇an baki". *
Šoṭin sa mic̣iḳ äylä exṭi šagirdxoy aranene čurdesṭi, oša äylä Iz q̇užel exṭi šoṭoġo pine:
"Šiin Bez c̣iyen metär äyloġoxun sunṭu q̇abulbayin, šoṭin Za q̇abulbale. Za q̇abulbalṭin isä täk Za tää, Za Yaq̇abiṭuval q̇abulbale". *
Ioanen Šoṭo pine: "Määlim, yan Vi c̣iyen murdar urufa č̣evḳala sa amdaryan aḳi, ama beš bać̣anexun eġalṭoġoxun nu baksuna görä šoṭo q̇adaġanyanbi".
Isusen šoṭoġo \ pine: "Šoṭo galmadanan! Bez c̣iyen möǯüzä aḳesṭalo Bez äleyinä bakes batenekon.
Beš äleyinä nu bakalo isä beš täräfe. *
Šiin vä͑xun sunṭu Bez bać̣anexun eġalṭoġoxun baksuna görä sa ǯam xe tadayin, vä͑x düzinäz nex: äväzsuz tene mandal. *
Šinesa me xuriṭoġoxun, yäni Za ve͑bakalṭoġoxun sunṭu pis yaq̇a tašayin, šoṭaynaḳ iz ozane kala sa źomoḳožin źe͑ suruḳṗi iču dänizä bosṭun koṭoxun šaaṭe bakon.
Ägär vi kiine va pis yaq̇a tašṭasa, šoṭo boṭa. P̣ä͑ kulla baki, ama ǯähännämä, ṭe nu aćala aruġo bafsṭaxunsa, sa kulla mandi ǯännätä bafsṭun šaaṭe. *
Ägär vi turene va pis yaq̇a tašṭasa, šoṭo boṭa. P̣ä͑ turla baki ǯähännämä bosesaxunsa, axsaġ mandi ǯännätä bafsṭun šaaṭe.
Ägär vi pulene va pis yaq̇a tašṭasa, šoṭo č̣evḳa. P̣ä͑ pulla ǯähännämä baysunaxunsa, sa pulla Buxaʒ́uġoy \ padčaġluġa baysun šaaṭe. *
Axəri ǯähännämä bakalṭoġo ḳaramḳala meq tene bisa, ṭiyanin boḳala aruxal tene aśṭa. *
Qurbaniyo el bakala ḳinäḳ amdari tämizbaksunal šoṭay aruġoxun č̣ovaksune.
El šaaṭ šeye, ama ägär elen iz elaxoyluġa aćesṗayin, šoṭo heṭina ṭad tades bakon? Barta vä͑sṭa elq̇an baki. Ṭe vädä ef arane serluġal bakale". *
