TITUS Texts: Biblia Udica, Versio Nizhensis: Novum Testamentum

TITUS
Biblia Udica, Versio Nizhensis: Novum Testamentum
Part No. 22

Chapter: 22

Laśḳoyi barada mäsälä
Lašk'oyi barada məsələ

(Luḳ. 14:15-24

)
(Luk'. 14:15-24

)

Verse: 1

Isusen šoṭoġo sa mäsäläl exlätebi:
İsusen şot'oğo sa məsələl exlətebi:

Verse: 2

"Göye padčaġluġ iz ġara laśḳoybala sa padčaġane ošq̇ar.
"Göye padçağluğ iz ğara lašk'oybala sa padçağane oşq'ar.

Verse: 3

Šoṭin laśḳoye dävätbaki amdarxo ḳalpseynaḳ iz ḳulurxone yaq̇absa. Ama šorox eysun teṭun čureci.
Şot'in lašk'oye dəvətbaki amdarxo k'alpseynak' iz k'ulurxone yaq'absa. Ama şorox eysun tet'un çureśi.

Verse: 4

Q̣eräz ḳulurxoval yaq̇abi šoṭoġo nexe: "Dävätbakiṭoġo upanan ki, zu bez häzirluġa be͑zġi, bez öküzxo saal q̇eräz ukesṭi heyvanxo śamecene, här šey häzire, laśḳoye ekinan!"
Q'erəz k'ulurxoval yaq'abi şot'oğo nexe: "Dəvətbakit'oğo upanan ki, zu bez həzirluğa bězği, bez öküzxo saal q'erəz ukest'i heyvanxo šameśene, hər şey həzire, lašk'oye ekinan!"

Verse: 5

Ama ḳaleciṭoġon ičoġoy nu saymišbsuna aḳesṭi soġo iz q̇oruġa, ṭe soġo iz dükänene taci.
Ama k'aleśit'oğon içoğoy nu saymişbsuna ak'est'i soğo iz q'oruğa, t'e soğo iz dükənene taśi.

Verse: 6

Ṭə͑yämiṭoġon isä šoṭay ḳulurxo biq̇i inǯitmiši oša besṭunbsa.
T'ı̌yəmit'oğon isə şot'ay k'ulurxo biq'i incitmişi oşa best'unbsa.

Verse: 7

Padčaġen moṭo avabaki äǯuġläyinšebaksa. Iz q̇ošuna yaq̇abi ṭe amdarbesṗalxo äfčinebsa, šoṭoġoy šähärä isä boḳosebsa.
Padçağen mot'o avabaki əcuğləyinşebaksa. İz q'oşuna yaq'abi t'e amdarbesp'alxo əfçinebsa, şot'oğoy şəhərə isə bok'osebsa.

Verse: 8

Oša iz ḳulurxo nexe: "Laśḳoyeynaḳ här šey häzire, ama ḳaleciyorox moṭo layiġ teṭunbaki.
Oşa iz k'ulurxo nexe: "Lašk'oyeynak' hər şey həzire, ama k'aleśiyorox mot'o layiğ tet'unbaki.

Verse: 9

Isä yaq̇ ǯöybakala ganxo takinan, šu aḳaynan laśḳoye ḳalpanan".
İsə yaq' cöybakala ganxo takinan, şu ak'aynan lašk'oye k'alpanan".

Verse: 10

Ṭe ḳulurxoval yaq̇moġoṭun č̣eysa. Pis-šaaṭ šu aṭunksa, bitova ḳalpi topṭunbsa. Laśḳoyi mäǯlis q̇onaġxon buyebaksa.
T'e k'ulurxoval yaq'moğot'un c'eysa. Pis-şaat' şu at'unksa, bitova k'alpi topt'unbsa. Lašk'oyi məclis q'onağxon buyebaksa.

Verse: 11

Padčaġ q̇onaġxo aksa baġaṭan, ṭeṭiya laśḳoyi paltar nu lapi sa amdarane aksa,
Padçağ q'onağxo aksa bağat'an, t'et'iya lašk'oyi paltar nu lapi sa amdarane aksa,

Verse: 12

šoṭo nexe: "Bez dosṭ! Hun laśḳoyi paltar lapinuṭ memiya hetären baci?" Šo isä šiṗ čurene.
şot'o nexe: "Bez dost'! Hun lašk'oyi paltar lapinut' memiya hetəren baśi?" Şo isə şip' çurene.

Verse: 13

Ṭe vädä padčaġen iz q̇ulluġčiġo nexe: "Koṭay kulmoġo, turmoġo ġaćṗi bayinq̇luġ čölö bosanan! Ṭeṭiya o͑no͑psun saal uluxxoy ġərəč̣esṭun bakale". ^*
T'e vədə padçağen iz q'ulluğçiğo nexe: "Kot'ay kulmoğo, turmoğo ğaç̌p'i bayinq'luğ çölö bosanan! T'et'iya ǒnǒpsun saal uluxxoy ğırıc'est'un bakale". ^*

Verse: 14

Šoṭaynaḳ ki, ḳaleciyorox gele, č̣äḳeciyorox isä male".
Şot'aynak' ki, k'aleśiyorox gele, c'ək'eśiyorox isə male".

Imṗeraṭori haq̇q̇a imṗeraṭora, Buxaʒ́uġoy haq̇q̇a Buxaʒ́uġo tasṭun
İmp'erat'ori haq'q'a imp'erat'ora, Buxačuğoy haq'q'a Buxačuğo tast'un

(Mrḳ. 12:13-17

; Luḳ. 20:20-26

)
(Mrk'. 12:13-17

; Luk'. 20:20-26

)

Verse: 15

Fariseyxon taci maslaatṭunbi ki, Isusa äyiti loxol hetärq̇aṭun biq̇i.
Fariseyxon taśi maslaatt'unbi ki, İsusa əyiti loxol hetərq'at'un biq'i.

Verse: 16

Šoṭoġon Irodi täräfṭärxoxun sagala ičoġoy šagirdxo Isusi ṭo͑ġo͑lṭun yaq̇abi ki, xavar haq̇aṭun: "Määlim, yan avayan ki, Hun exṭibärlu amdarnu, Buxaʒ́uġoy yaq̇a düzen zombsa, šuḳḳaleynaḳal täräfkäšluġ tenbsa. Šoṭaynaḳ ki, amdarxoy arane färg ten laxsa.
Şot'oğon İrodi tərəft'ərxoxun sagala içoğoy şagirdxo İsusi t'ǒğǒlt'un yaq'abi ki, xavar haq'at'un: "Məəlim, yan avayan ki, Hun ext'ibərlu amdarnu, Buxačuğoy yaq'a düzen zombsa, şuk'k'aleynak'al tərəfkəşluğ tenbsa. Şot'aynak' ki, amdarxoy arane fərg ten laxsa.

Verse: 17

Isä yax upa be͑yn, Vi zänden yaynaḳ imṗeraṭora nalog tasṭuna iǯaza bune, yoxsa tää?"
İsə yax upa běyn, Vi zənden yaynak' imp'erat'ora nalog tast'una icaza bune, yoxsa təə?"

Verse: 18

Ama Isusen šoṭoġoy pis niyätä avabaki pine: "Ay ṗä͑ćolorox, Zaynaḳ tälänan laxsa?
Ama İsusen şot'oğoy pis niyətə avabaki pine: "Ay p'ə̌ç̌olorox, Zaynak' tələnan laxsa?

Verse: 19

Ef nalog ḳinäḳ tadala tänginä Za aḳesṭanan". Šoṭoġonal Šoṭaynaḳ sa dinarṭun ečeri.
Ef nalog k'inək' tadala tənginə Za ak'est'anan". Şot'oğonal Şot'aynak' sa dinart'un eçeri.

Verse: 20

Isusen šoṭoġoxun xavare haq̇i: "Tängin loxol bakala me šikil saal c̣i šiya?"
İsusen şot'oğoxun xavare haq'i: "Təngin loxol bakala me şikil saal s'i şiya?"

Verse: 21

Šoṭoġon ǯoġabṭun tadi: "Imṗeraṭori". Ṭe vädä Isusen šoṭoġo pine: "Ketäre isä, imṗeraṭori haq̇q̇a imṗeraṭora, Buxaʒ́uġoy haq̇q̇a Buxaʒ́uġo tadanan".
Şot'oğon coğabt'un tadi: "İmp'erat'ori". T'e vədə İsusen şot'oğo pine: "Ketəre isə, imp'erat'ori haq'q'a imp'erat'ora, Buxačuğoy haq'q'a Buxačuğo tadanan".

Verse: 22

Moṭo ibaki šorox määṭṭälṭun mandi, Isusa barti taṭunci.
Mot'o ibaki şorox məət't'əlt'un mandi, İsusa barti tat'unśi.

Be͑yinbaksuni barada sual
Běyinbaksuni barada sual

(Mrḳ. 12:18-27

; Luḳ. 20:27-40

)
(Mrk'. 12:18-27

; Luk'. 20:27-40

)

Verse: 23

Haṭe ġi Isusi ṭo͑ġo͑l saduḳeyxone hari. Šoṭoġon nexṭuniy ki, be͑yinbaksun butene, šoṭaynaḳal Isusaxun xavarṭun haq̇i: ^*
Hat'e ği İsusi t'ǒğǒl saduk'eyxone hari. Şot'oğon next'uniy ki, běyinbaksun butene, şot'aynak'al İsusaxun xavart'un haq'i: ^*

Verse: 24

"Määlim, Moiseyen metäre pe: "Ägär sa amdar iz äyel bakinuṭ biyayin, iz vičen šoṭay süpür mandi čuġo haq̇i ṗuri vičey näsilä davambeq̇an". ^*
"Məəlim, Moiseyen metəre pe: "Əgər sa amdar iz əyel bakinut' biyayin, iz viçen şot'ay süpür mandi çuğo haq'i p'uri viçey nəsilə davambeq'an". ^*

Verse: 25

Beš arane vu͑ġ vičine buy. Samǯiṭin sa čuuxe haq̇i, ama ičoġoy äyel bakinuṭ ṗure. Iz äyel nu baksuna görä čuġo iz vičene haq̇i.
Beş arane vǔğ viçine buy. Samcit'in sa çuuxe haq'i, ama içoğoy əyel bakinut' p'ure. İz əyel nu baksuna görə çuğo iz viçene haq'i.

Verse: 26

Hametäräl ṗä͑mǯiyo, xibimǯiyo, lap vu͑ġu͑mǯiṭul ciriḳ bütüm ṗurṭun.
Hametərəl p'ə̌mciyo, xibimciyo, lap vǔğǔmcit'ul śirik' bütüm p'urt'un.

Verse: 27

Bitoṭuxun oša me čuuxal ṗure.
Bitot'uxun oşa me çuuxal p'ure.

Verse: 28

P̣uriyorox be͑yinbakaṭan me čuux ṭe vu͑ġ vičey maṭay čuux bakale? Šoṭaynaḳ ki, bitoṭin me čuġo haq̇eney".
P'uriyorox běyinbakat'an me çuux t'e vǔğ viçey mat'ay çuux bakale? Şot'aynak' ki, bitot'in me çuğo haq'eney".

Verse: 29

Isusen šoṭoġo ǯoġabe tadi: "Vä͑n ω͑vel Camurxo saal Buxaʒ́uġoy zora nu avabaksuna göränän särfbaksa.
İsusen şot'oğo coğabe tadi: "Və̌n Ǐvel Śamurxo saal Buxačuğoy zora nu avabaksuna görənən sərfbaksa.

Verse: 30

Šoṭaynaḳ ki, ṗuriyorox be͑yinbakaṭan insanxon nä čuux teṭun haq̇sa, nä išq̇ara teṭun taysa. Šorox göye angelxollariḳṭun baksa.
Şot'aynak' ki, p'uriyorox běyinbakat'an insanxon nə çuux tet'un haq'sa, nə işq'ara tet'un taysa. Şorox göye angelxollarik't'un baksa.

Verse: 31

P̣uriṭoġoy be͑yinbaksuni barada isä Buxaʒ́uġoy vä͑x piṭu tenan ḳalpe ki?
P'urit'oğoy běyinbaksuni barada isə Buxačuğoy və̌x pit'u tenan k'alpe ki?

Verse: 32

Šoṭin pene: "Zu Avrahami Buxaʒ́ux, Isaaḳi Buxaʒ́ux saal Iaḳovi Buxaʒ́uxzu". Buxaʒ́ux ṗuriṭoġoy tä, dirisṭṭoġoy Buxaʒ́uxe". ^*
Şot'in pene: "Zu Avrahami Buxačux, İsaak'i Buxačux saal İak'ovi Buxačuxzu". Buxačux p'urit'oğoy tə, dirist't'oğoy Buxačuxe". ^*

Verse: 33

Moṭoġo \ ibakala ǯamaaten Šoṭay zombsuna määṭṭäle mansṭay
Mot'oğo \ ibakala camaaten Şot'ay zombsuna məət't'əle manst'ay

Buxaʒ́uġoy än kala ämir
Buxačuğoy ən kala əmir

(Mrḳ. 12:28-34

; Luḳ. 10:25-28

)
(Mrk'. 12:28-34

; Luk'. 10:25-28

)

Verse: 34

Fariseyxon Isusi saduḳeyxoy säsä bosṭuna aḳaṭan sagala girṭunci.
Fariseyxon İsusi saduk'eyxoy səsə bost'una ak'at'an sagala girt'unśi.

Verse: 35

Šoṭoġoy aranexun sa ḳanun zombalen Isusa äyiti loxol biq̇suni mäksäden Šoṭoxun xavare haq̇i:
Şot'oğoy aranexun sa k'anun zombalen İsusa əyiti loxol biq'suni məksəden Şot'oxun xavare haq'i:

Verse: 36

"Määlim, Moiseyi ḳanunasṭa än kala ämir manuva?"
"Məəlim, Moiseyi k'anunast'a ən kala əmir manuva?"

Verse: 37

Isusen šoṭo pine: "Q̣onʒ́uġo, vi Buxaʒ́uġo bütüm vi elmoġon, bütüm vi üḳen saal bütüm vi fikiren čureki". ^*
İsusen şot'o pine: "Q'ončuğo, vi Buxačuğo bütüm vi elmoğon, bütüm vi ük'en saal bütüm vi fikiren çureki". ^*

Verse: 38

Mo samǯi hamal än kala ämire.
Mo samci hamal ən kala əmire.

Verse: 39

Samǯiṭullariḳ vaǯib ṗä͑mǯiyo mone: "Vi ə͑śaṭu hun va čureġalṭullariḳ čureki". ^*
Samcit'ullarik' vacib p'ə̌mciyo mone: "Vi ı̌šat'u hun va çureğalt'ullarik' çureki". ^*

Verse: 40

Moiseyi bütüm ḳanun saal Xavarečalxoy äyitmux me ṗä͑ ämiräne ṭayaġbaksa".
Moiseyi bütüm k'anun saal Xavareçalxoy əyitmux me p'ə̌ əmirəne t'ayağbaksa".

Xrisṭos ši Ġara?
Xrist'os şi Ğara?

(Mrḳ. 12:35-37

; Luḳ. 20:41-44

)
(Mrk'. 12:35-37

; Luk'. 20:41-44

)

Verse: 41

Fariseyxo hälä Isusi härrämineṭuniy. Šoṭin xavare haq̇i:
Fariseyxo hələ İsusi hərrəminet'uniy. Şot'in xavare haq'i:

Verse: 42

"Xrisṭosi barada ḳänan fikirbsa? Šo ši Ġara?" Šoṭoġonal Isusa "Davidi Ġar" piṭun.
"Xrist'osi barada k'ənan fikirbsa? Şo şi Ğara?" Şot'oğonal İsusa "Davidi Ğar" pit'un.

Verse: 43

Isusen šoṭoġo pine: "Ketäre isä, Davida Urufen äyitṗesṭaṭan Šoṭo "Q̣onʒ́ux" heṭaynaḳe ḳale?
İsusen şot'oğo pine: "Ketəre isə, Davida Urufen əyitp'est'at'an Şot'o "Q'ončux" het'aynak'e k'ale?

Verse: 44

"Q̣onʒ́uġon bez Q̣onʒ́uġo pine:
   "Q'ončuğon bez Q'ončuğo pine:
    Zu Vi düšmänxo Vi turin oq̇a sakamin
    Zu Vi düşmənxo Vi turin oq'a sakamin
    Bez yön täräf arca." ^*
    Bez yön tərəf arśa." ^*

Verse: 45

Ägär Daviden Šoṭo "Q̣onʒ́ux" pi ḳalenesa, Šo hetärä Davidi ġar bakes bako?"
Əgər Daviden Şot'o "Q'ončux" pi k'alenesa, Şo hetərə Davidi ğar bakes bako?"

Verse: 46

Me äyitin be͑ś Isusa šuḳḳalen sa äyit pes tene baki. Ṭe ġinaxun oša ene šuḳḳalen Šoṭoxun sa šey xavar haq̇suna üḳ tenebi.
Me əyitin běš İsusa şuk'k'alen sa əyit pes tene baki. T'e ğinaxun oşa ene şuk'k'alen Şot'oxun sa şey xavar haq'suna ük' tenebi.

This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.