; Luḳ. 8:4-15)
; Luk'. 8:4-15)
Ṭe ġi Isus ḳoyaxun č̣eri, taci göle ṭo͑ġo͑l areci.
Iz härrämine gele amdar giresuna görä mäǯburebaki ki, lodḳina arcane, ǯamaat isä q̇ariluġane čurpi. *
Isusen šoṭoġoynaḳ gele šeya mäsäloġone exlätpsay. "Mone, sa äkinči cil carpsane č̣eysa.
Carḳala vädine cilurxoy bäziyorox yaq̇e ṭo͑ġo͑lṭun bisṭa, q̇ušurxonal hari šoṭoġo ṭuḳṭi uṭunksa.
Ṭə͑yä͑miyorox ḳul mal bakala źe͑luġ ganxonṭun bisṭa. Ičoġoy ḳul bä͑ġä͑loy nu baksuna görä usum göyünṭunbaksa,
ama be͑ġ č̣eri šoṭoġo boḳosebsa, sünbülxoval ičoġoy tum nu baksuna görä q̇ariṭunbaksa.
Ṭə͑yä͑miyorox cacurxoy araneṭun bisṭa. Cacurxo kalabaki šoṭoġo äfčiṭunbsa.
Ṭə͑yämiyorox isä bäräkätlu oćala biti sabać, altməš, nääl ki otuz q̇at gele mähsulṭun tasṭa.
U͑mu͑x bakalṭin ibakeq̇an!"
Šagirdxo Isusa ə͑śabaki xavarṭun haq̇i: "Heṭaynaḳ šoṭoġoynaḳ mäsäloġonen exlätpsa?"
Isusen šoṭoġo ǯoġabe tadi: "Šoṭaynaḳ ki, Göye padčaġluġi sirurxo avabaksun vä͑xe tadece, ama šoṭoġo tene \ tadece.
Šii bunesa, šoṭo Buxaʒ́uġon samalal gele tadale, šoval bolluġi boš bakale, ama šii tenosa, iz bakalṭuval iz kiyexun haq̇ale. *
Zu šoṭaynaḳez šoṭoġoxun mäsäloġon exlätpsa ki, "šoṭoġon be͑ṭunġsa, ama teṭun aksa; u͑mu͑xṭunlaxsa, ama teṭun ibaksa hamal teṭun q̇amišaksa".
Isaya xavarečalen šoṭoġoy barada pi me äyitmux bexe ṗaṗi:
Šoṭaynaḳ ki, me azuḳi üḳ kütläyinšebaki,
Ama ef pulmux bäxṭäväre, šoṭaynaḳ ki, aṭunksa, ef u͑mu͑xxoval bäxṭäväre, šoṭaynaḳ ki, iṭunbaksa!
Vä͑x düzinäz nex: gele xavarečalxon q̇a düzgün amdarxon ef aḳiṭoġo aksun čurṭunci, ama teṭun aḳi, ef ibakiṭoġoval ibaksun čurṭunci, ama \ teṭun ibaki. *
Vä͑n isä äkinčin barada mäsälin mäninä u͑mu͑xlaxanan:
amdaren Göye padčaġluġaxun bakala äyitä u͑mu͑xlaxi nu q̇amišakaṭan, šär bakalṭin hari šoṭay üḳe boš careci cilä exṭi tanešṭa. Me amdar yaq̇e ṭo͑ġo͑l careci ciläne ošq̇ar.
Źeluġ ganxo careciyo isä ṭe amdare ki, äyitä ibaki haṭe saad mu͑qluġen q̇abulebsa.
Ama šoṭay tum tene bu, koṭo göräl sa heq̇ädär vaxṭ ve͑nebaksa, äyitä görä isä äzyätä saal čätinluġa bafṭaṭan haṭe saad qošebaksa.
Cacurxoy arane careciyo ṭe amdare ki, äyitä inebaksa, ama me dööri narahatčiluġxon saal var-dövlätä fereṭbaksunen äyitä q̇ä͑q̇ä͑nne, šoval barsuze mansṭa.
Bar tadala oćala careciyo isä äyitä ibakala, q̇amišakala amdare. Šoṭin bar ečeri sabać, altməš, nääl otuz q̇at gele mähsule tasṭa".
Isusen šoṭoġoynaḳ sa mäsäläl exlätebi: "Göye padčaġluġ iz q̇oruġa šaaṭ cil carpi sa amdarane ošq̇ar.
Üše, bito basḳi vädine šoṭay düšmänen hari arumi arane il carpi tanesa.
Arum kalabaki bar tadaṭan ilal aḳesa.
Q̣oruġi q̇onʒ́uġoy ḳulurxo hari šoṭo nexṭun: "Aġa, hun \ vi q̇oruġa č̣äḳeci cil ten carpey ki? P̣oy me il mayina ämälä hari?"
Šoṭin ḳulurxo ǯoġabe tadi: "Moṭo düšmänenebe". Ḳulurxon šoṭo piṭun: "Čurensa ki, taci šoṭoġo č̣evḳayan?"
Šoṭin pine: "Tää, šoṭaynaḳ ki, ila č̣evḳaṭan šoṭoġoxun sagala arumal čukalnan.
Barta exal ciriḳ ṗo͑ġä͑l sagala kalabakeq̇aṭun. Exe vädine isä zu exṗalxo uḳoz: "Süfṭä ila topbanan, šoṭoġo ġaćṗi boḳosṗanan, aruma isä ambarxo tašanan."
; Luḳ. 13:18-21)
; Luk'. 13:18-21)
Isusen q̇eräz sa mäsäläl šoṭoġo exlätebi: "Göye padčaġluġ iz q̇oruġa sa dänä xardali cil biṭi sa amdaral ošq̇are.
Šo bütüm cilurxoxun än mic̣iḳone, kalabakaṭan isä bütüm bosṭani bitḳiyoxun alloy, lap xode boydane baksa. Q̣ušurxonal purpi hari šoṭay taymoġosṭa mesṭun biq̇sa.
Isusen šoṭoġo q̇eräz sa mäsäläl exlätebi: "Göye padčaġluġ metäre: sa čuġon ä͑yinä exṭi xib put xarinane gärbsa, boq̇oyal ayeci e͑qesa".
Isusen bütüm me šeymoġo amdarxoynaḳ mäsäloġone exlätpsay, šoṭoġo mäsälsuz sal sa šey tene exlätpsay ki,
xavarečalen pi me äyit bex ṗaṗane:
Oša Isus amdarxoxun ǯöybaki ḳoyane baci. Iz šagirdxo Iz ṭo͑ġo͑l hari piṭun: "Q̣oruġi ile mäsälinä yax q̇andəriša".
Isusen ǯoġab tadi pine: "Šaaṭ cilä carpiyo Amdari Ġare.
Q̣oruġ - dünyäne. Šaaṭ cil - padčaġluġi ġarmuxe. Il - šär bakalṭay amdarxone.
Ila carpi düšmän - iblise. Ex - dünyäni axəre, exṗalxo isä - angelxone.
Ila girbi aruġo boḳosṗalṭullariḳ dünyäni axərasṭal metär bakale.
Amdari Ġaren Iz angelxo yaq̇abale, šoṭoġonal pis yaq̇a zaṗḳalṭoġo q̇a ḳanunsuzluġ balṭoġo bitova Šoṭay padčaġluġaxun č̣evḳi
hämišä boḳala aruġo bosalṭun. Ṭeṭiya o͑no͑psun saal uluġoy ġərəč̣esṭun bakale.
Düzgün amdarxon isä ičoġoy Bavay padčaġluġa be͑ġ ḳinäḳ c̣aldalṭun. U͑mu͑x bakalṭin ibakeq̇an! \ Xäzinä saal mirvarin barada mäsäloox
Göye padčaġluġ q̇oruġa č̣aṗ sa xäzininäne ošq̇ar. Bä͑ġä͑bi amdaren šoṭo täzädän č̣aṗebsa, mu͑q-mu͑q taci iz bakala bitova toyesṭa, ṭe q̇oruġa haneq̇sa.
Göye padčaġluġ gözäl mirvari qä͑veġala sa haq̇i-toydalal ošq̇are.
Sa ġi šoṭin gele toyexlu sa mirvari bä͑ġä͑bi taci iz bakala bitova toydi šoṭo haneq̇sa.
Göye padčaġluġ ene heṭuva ošq̇ar? Čälibiq̇alxon dänizä tor bosi ǯürbäǯür čäliṭun biq̇sa.
Tor buybakaṭan šoṭo q̇ariluġa zapi, arci šaaṭṭoġo q̇avurxoṭun buybi, pisṭoġo isä ṭo͑o͑xṭun bosṭa.
Dünyäni axərasṭal metär bakale. Angelxon hari pisṭoġo düzgünṭoġoy aranexun ǯöybi
šoṭoġo hämišä boḳala aruġo bosalṭun. Ṭeṭiya o͑no͑psun saal uluġoy ġərəč̣esṭun bakale.
Vä͑n bitova q̇amišnanbaki?" - "Hoo, ay Q̣onʒ́ux" - šoṭoġon ǯoġabṭun tadi.
Isusen šoṭoġo pine: "Moṭo göräl, Göye padčaġluġi šagird bakala här ḳanun zombal iz xäzininäxun ham täzä, ham bisi šeymux č̣evḳala ḳožin q̇onʒ́uġone ošq̇ar".
; Luḳ. 4:16-30)
; Luk'. 4:16-30)
Isusen me mäsäloġo exlätṗiṭuxun oša ṭeṭiin taneci.
Iz doġma šähäre hari Šoṭin sinagoga zombsane burqi. Šoṭo u͑mu͑xlaxala ǯamaat määṭṭäl mandi piṭun: "Me amdarasṭa metär kamal, metär möǯüzoox yaratmišala zor mayina?
Mo usṭay ġar tene ki? Iz Nanay c̣i Mariya tene ki? Iaḳov, Iosif, Simon saal Iuda Iz vičimux teṭun ki?
Bütüm Iz xunčimux beš arane teṭun yäšäyinšbsa ki? P̣oy me amdarasṭa bütüm me šeymux mayina?"
Šoṭaynaḳal šoṭoġon Isusa q̇abul teṭunbi. Isusen šoṭoġo pine: "Xavarečal iz yurdaxun saal iz ḳožaxun bašq̇a här sa gala hörmätlüne". *
Šoṭoġosṭa ve͑luġ nu baksuna görä Isusen ṭeṭiya gele möǯüzoox tenebi.
