; Luḳ. 6:1-5)
; Luk'. 6:1-5)
Sa ġi Isus Šamaṭ ġine taxəli äkini aranexune č̣ovaksay. Iz šagirdxo busaṭuniy, sünbülxo čuki uksaṭun burqi. *
Fariseyxon moṭo aḳi Šoṭo piṭun: "Be͑ġa, Vi šagirdxon Šamaṭ ġine q̇adaġan bakala äšurxoṭun biq̇sa".
Isusen šoṭoġo pine: "Daviden q̇a iz ṭo͑ġo͑l bakalṭoġon busa bakaṭan ḳäbsuna tenan ḳalpe ki?
Šo afərəbsuni čadərane baci; iču q̇a iz ṭo͑ġo͑l bakalṭoġo tää, täkč̣ä be͑yinśxo uksuna iǯaza tadeġala Buxaʒ́uġo häsrbaki śumurxoṭun käyi. *
Yoxsa Moiseyi ḳanuna tenan ḳalpe ki, be͑yinśxon xrama Šamaṭ ġina pozmišṭunbsa, ama mo taxsər tene hesabbaksa?
Vä͑x nexzu: xramaxun üsṭün Bakalone memiya.
Ägär vä͑n "Zu bütümṭin sun-sunaynaḳ üḳ boḳospsun aḳesṭunaz čuresa, q̇urban ešṭuna tää" * äyiti mäninä avabakinaniy, taxsərsuzṭoġoynaḳ pis q̇ärar tenan č̣evḳoy.
Axər Amdari Ġar Šamaṭ ġineyal q̇onʒ́uxe".
; Luḳ. 6:6-11)
; Luk'. 6:6-11)
Isus ṭeṭiin ǯöybaki sinagogane \ baci.
Ṭeṭiya kul ṗaraličbaki sa amdare buy. Isusaxun xavarṭun haq̇i: "Šamaṭ ġine q̇olaybsuna iǯaza bune?" Ama šoṭoġon Isusa taxsərlayinšbseynaḳ sa määnäṭun qä͑vesay.
Isusen šoṭoġo ǯoġabe tadi: "Ef arane ṭetär sa amdar bä͑ġä͑neġon ki, iz bakalo täk sa eġel Šamaṭ ġine kura bafṭane, šoṭo nu č̣evḳane? *
Ama amdar eġelaxun heq̇ädär däyärlune! Metärluġen, Šamaṭ ġine xeyir tadala äš biq̇suna iǯaza bune".
Oša Isusen ṭe amdara pine: "Vi kula boxoda!" Šoṭin iz kula boxonedi, kulal q̇olayebaki.
Fariseyxo isä č̣eri Isusa hetär äfčibsuni barada fikirbsaṭun burqi.
Isusen moṭo avabaki ṭeṭiin č̣eri taneci. Šoṭay bać̣anexun gele amdare taci. Isusen šoṭoġo bitova q̇olayebi,
ama šoṭoġo q̇adaġanebi ki, Iz šu baksuna šuḳḳala nu uḳaṭun.
Mo Isaya xavarečalen piyorox bex ṗaṗseynaḳe baki:
"Mone Bez č̣äḳṗi Q̣ulluġbal,
Koṭin nä höǯät tenebal, nä šivan tenebal.
Ćaxćuxeci ge͑śal čukinut,
Millätxo Koṭo umud bakalṭun". *
; Luḳ. 6:43-45; 11:14-23)
; Luk'. 6:43-45; 11:14-23)
Oša Isusi ṭo͑ġo͑l ičusṭa murdar uruf bakala sa amdarṭun ečeri. Šo ham ḳać̣iney, ham lal. Isusen šoṭo q̇olayebi. Šoṭinal äyitṗsa saal aksane burqi.
Bütüm ǯamaat "Bärkä Davidi näsiläxun eġala bakalo mova?" uḳa mat manṭundi.
Fariseyxon moṭo ibaki piṭun: "Me amdaren murdar urufxoy kalo Baal-Zevuli kömäysuz murdar urufxo č̣evḳes tene bakoy". *
Fariseyxoy ḳä fikirbsuna avabakala Isusen šoṭoġo pine: "P̣ä͑ gala ǯöybaki sun-sunaxun nu yaq̇axtaġala nä padčaġluġ, nä šähär, nä ḳož tene portbo.
Ägär Šeytanen Šeytana č̣evḳayin, ič iz äleyinäne taysa. Me väzyätṭä šoṭay padčaġluġen hetärä portṗon?
Ägär Zu murdar urufxo Baal-Zevuli zorenez č̣evḳsasa, ṗoy ef amdarxon murdar urufxo ši zorenṭun č̣evksa? Moṭo göräl šorox ef divanbalxo bakalṭun.
Ama Zu murdar urufxo Buxaʒ́uġoy Urufenez č̣evḳsasa, mo šo upsune ki, Buxaʒ́uġoy padčaġluġ ef aranene.
Axər šunesa zorba amdari ḳoya baci süfṭä šoṭay kul-tura ġaćṗinut šoṭay mala fu͑q̇ṗes baneko? Gäräy süfṭä ṭe amdari kul-tura ġaćḳane, oša iz ḳoža fu͑q̇ḳane.
Zaxun sagala nu bakalo Bez äleyinäne, Zaxun sagala nu girbalṭin carene. *
Moṭaynaḳal vä͑x nexzu: här sa günax, saal här sa ǯürä amdarxoy pisä äyitpsunal baġəšlayinšakale, ama Urufi äleyinä äyitpsun tene baġəšlayinšakal.
Šiin Amdari Ġare äleyinä äyitḳayin, baġəšlayinšakale, ama šiin ω͑vel Urufi äleyinä äyitḳayin, nä me dööräsṭä tene baġəšlayinšakal, nääl ošin dööräsṭä. *
Ägär ef xod šaaṭ bakayin, iz meyväl šaaṭ bakale. Ägär xod pis bakayin, iz meyväl pis bakale; šoṭaynaḳ ki, xod iz barene čalxesa. *
Ay gürzin näsil, vä͑n pis baksunen, hetärnan šaaṭ šeymux exlätṗes bakon? Šoṭaynaḳ ki, üḳe buybakiṭoġoxune źomon äyitḳon. *
Šaaṭ amdaren iz šaaṭ xäzininäxun šaaṭ šeymuxe č̣evksa, pis amdaren isä iz pis xäzininäxun pis šeymuxe č̣evksa.
Zu vä͑x nexzu: amdarxon \ ičoġoy uḳala här amc̣i äyitä görä Axərənǯi ġine ǯoġab tadalṭun.
Šoṭaynaḳ ki, vi äyitmoġo görä haq̇q̇ q̇azayinšalnu, vi äyitmoġo göräl vä͑ynaḳ q̇ärar č̣evḳalṭun"
; Mrḳ. 8:11-12; Luḳ. 11:24-26, 29-32)
; Mrk'. 8:11-12; Luk'. 11:24-26, 29-32)
Ṭe vädä bäzi ḳanun zombalxon saal fariseyxon Isusa piṭun: "Määlim, Vaxun sa möǯüzälü niśan aksunyan čuresa". *
Isusen šoṭoġo ǯoġabe tadi: "Pis saal Buxaʒ́uġoy yaq̇axun č̣eri näsilen sa möǯüzälü niśane qä͑vesa. Ama šoṭoġo Iona xavarečali möǯüzälü niśanaxun bašq̇a sal sa möǯüzälü niśan tene tadeġal.
Hetär ki Ionane xib ġi-xib üše kala čälin tapane mande, haṭetäräl Amdari Ġar xib ġi-xib üše oćali boš mandale. *
Ninevin amdarxon Axərənǯi ġine me näsili amdarxoxun sagala be͑yinbaki šoṭoġoy günaxa ćoyel č̣evḳalṭun. Axər šoṭoġon Ionay karooza görä toobabeṭuniy. Ama memiya Ionaxun üsṭün Bakalono. *
Güney täräfi čuux-padčaġen * Axərənǯi ġine vä͑xun \ sagala be͑yinbaki šoṭo divanbale. Axər čuux-padčaġ Solomoni kamallu äyitmoġo u͑mu͑xlaxseynaḳ dünyäni ṭə͑yä͑mi ṭo͑o͑xune harey. Ama memiya Solomonaxun üsṭün Bakalono.
Murdar uruf amdaraxun č̣eriṭuxun oša xesuz ganxone tarane, ičeynaḳ mandala gane qä͑vesa, ama tene bä͑ġä͑bsa.
Ṭe vädä šoṭin nexe: "Barta bez süfṭin ḳoya qaybakaz". Ḳoya qaybakaṭan šoṭo amc̣i, tämiz, śareci-śamecine aksa.
Ṭe vädä šoṭin taci ičuxun samalal betär vu͑ġ dänä q̇eräz murdar urufe ešṭa. Šoroxal baci ṭeṭiya manṭunsṭa. Ošal me amdari väzyät süfṭinṭuxun samalal pise baksa. Me pis näsiliyal bel metär äš eġale".
; Luḳ. 8:19-21)
; Luk'. 8:19-21)
Isusen ǯamaataxun exlätṗaṭan, Iz Nana saal Iz vičimux čölin täräf čurpeṭuniy. Šoṭoġon Ičuxun exlätpsunṭun čuresay.
Sa amdaren Isusa pine: "Mone, Vi Nana q̇a vičimux č̣öš čurpeṭun, šoṭoġon Vaxun exlätpsunṭun čuresa".
Isusen me äyitmoġo uḳalṭu ǯoġabe tadi: "Bez nana saal Bez vičimux šuva?"
Oša Iz kula Iz šagirdxoy täräf boxodi pine: "Bez nana saal Bez vičimux moroxe.
Šoṭaynaḳ ki, šiin göynul bakala Bez Bavay uḳalṭu bex ṗaṗesepsasa, Bez viči, Bez xunči saal Bez nana šone".
