; Luḳ. 4:16-30)
; Luk'. 4:16-30)
Isus ṭeṭiin č̣eri Iz doġma yurdnune hari. Iz šagirdxoval Ičuxuney.
Šamaṭ ġi eġaṭan Šoṭin sinagoga karoozbi zomebsay. Šoṭo u͑mu͑xlaxala amdarxoy geleṭin määṭṭäl mandi nexey: "Me amdarasṭa me šeyurxo mayina? Mo hetär haq̇əla koṭo tadece? Me ǯürä möǯüzoġo hetäre bsa?
Yäni mo haṭe iz nana Mariya, iz vičimuxal Iaḳov, Iosif, Ioan saal Simon bakala usṭa tene ki? Hälä iz xunčimuxal memiya, beši araneṭun yäšäyinšbsa!" Hametär šoṭoġon Isusa teṭun q̇abulbsay.
Ama Isusen šoṭoġo pine: "Xavarečal sayǯä iz yurdnu, q̇oomxoy arane saal ailin boš hörmätlü tene. \ Mandi här gala!" *
Metärluġen, Šoṭin ṭeṭiya sa hema azarin loxol Iz kula laxi q̇olaybsunaxun bašq̇a sal sa möǯüzä aḳesṭes tene baki.
Isus šoṭoġosṭa ve͑luġ nu baksuna aḳi määṭṭäle mansṭay.
; Luḳ. 9:1-6; 10:1-12)
; Luk'. 9:1-6; 10:1-12)
Isusen ṗac̣c̣e šagirdä Iz ṭo͑ġo͑l ḳalpi šoṭoġo ṗä͑ tan-ṗä͑ tan karoozbsane yaq̇abi. Šoṭoġo murdar urufxo č̣evksuni exṭiyäräl tanedi.
Šoṭoġo tapšurebi ki, yaq̇a čombaġaxun bašq̇a hiḳḳal - nä śum, nä toray, nääl tängä maq̇aṭun exṭi.
Ičoġoy turel toroḳala lapeq̇aṭun, ama badalbseynaḳ paltar maq̇aṭun exṭi.
Isusen šoṭoġo pine: "Maya sa ḳoya baġaynan, ṭe šähärexun č̣eġamin haṭe ḳoya mandanan.
Maya vä͑x nu q̇abulbi, vä͑x u͑mu͑xlaxsun nu čureġayṭun, ṭeṭiin č̣eġaṭan ef turin tozal caṗṭanan. Barta mo šoṭoġoynaḳ sa niśanq̇an baki!" *
Metärluġen, šagirdxo yaq̇aṭun bafṭi. Šoṭoġon karoozbi amdarxo toobabsunaṭun ḳaley,
murdar urufxoṭun č̣evksay, č̣äyin lä͑ä͑mdi gele azariġoṭun q̇olaybsay. *
; Luḳ. 9:7-9)
; Luk'. 9:7-9)
Hametär bütüm me äšurxo hari padčaġ Irodi u͑mu͑ġo ṗaneṗi, šoṭaynaḳ ki, źomo bakalṭin Isusaxune äyitey. Bäzi amdarxon nexṭuniy: "Mo Ḳunuḳbal Ioane ṗuri ganuxun be͑yinbake, šoṭo göräne ičusṭa me ǯürä zor bu".
Ṭə͑yäminṭoġon isä "mo Ilyane", bäziṭoġonal "ṭevaxṭin xavarečalxollariḳ sa xavarečale" nexṭuniy. *
Ama Iroden moṭo ibakaṭan pine: "Mo, zu iz bula boṭesṭi Ioane. Šo be͑yinebake!"
Me Iroden iz viči Filiṗi čuux Irodiya görä Ioana biq̇esṭi zindanane badesṭey. Šoṭin Irodiya ičeynaḳ čuuxe haq̇ey,
Ioanen isä šoṭo "vičey čuġo haq̇sun Buxaʒ́uġoy ḳanunaxun düz etenesa" peney.
Moṭoxun oša Irodiyan Ioani loxol kin efi šoṭo besṗesṭuni q̇ärarane hari. Ama iz kiyexun hiḳḳal aytenesay,
šoṭaynaḳ ki, Iroden Ioani düzgün saal ə͑vel sa amdar \ baksuna avaney, šoṭoxun qə͑bi šoṭo q̇orišebsay. Düze, Ioani exlätxoxun oša Irod ičul etenesay, ama ṗurumal šoṭay exlätxon iču zapeney.
Sa ġi Irodiyay kiyel šaaṭ fürsäte kofṭi. Iroden iz nanaxun baki ġine sarayi amdarxo, q̇ošuni kalaṭoġo saal Galileyin cilä amdarxo q̇onaxluġe tadi.
Q̣onaxluġi vädine Irodiyay xuyären bona baci äčinepi. Mo Irodi q̇a q̇onaġxoy xošel ṭeq̇ädäre hari ki, padčaġen xuyärä pine: "Vi üḳen balṭu zaxun čureki, zu va tadaz".
Oša elasṗi ṗurumal pine: "Zaxun ḳä čureġayin, lap bez padčaġluġi qə͑ṭuval čureġayin, va tadoz".
Xuyären isä č̣eri iz nanaxune xavar haq̇i: "Zu ḳä čureġaz?" Šoṭin ǯoġabe tadi: "Ḳunuḳbal Ioani bula".
Xuyärenal haṭe saad padčaġi ṭo͑ġo͑l ṭiṭeri pine: "Čurezsa ki, häysä sa sinin boš Ḳunuḳbal Ioani bula za tadan".
Padčaġ beyköfe baki, ama iz elasa q̇a q̇onaġxo görä xuyäri äyitä oq̇a saksun tene čureci.
Šoṭin haṭe saad iču q̇orišalṭoġoxun sunṭu yaq̇abi Ioani bula ešṭunane ämirbi. Ṭe amdarenal zindana taci Ioani bula ozanaxun duġi
šoṭo sa sinin boš xuyäreynaḳ enečeri. Xuyärenal šoṭo iz nanane tadi.
Ioani šagirdxon moṭo ibakaṭan hari šoṭay meyidä exṭi maġarinaṭun laxi.
; Luḳ. 9:10-17; Ioan. 6:1-14)
; Luk'. 9:10-17; İoan. 6:1-14)
Aṗosṭolxo Isusi ṭo͑ġo͑lṭun qaybaki. Šoṭoġon ičoġo tadi tapšuruġxo bex ṗaṗespsuni q̇a ǯamaata zombsuni barada Šoṭaynaḳ exlätṭunbi.
Isusen pine: "Ekinan isä šuḳḳal nu bakala sa gala taġen, ǯöyǯä samal dinǯäyinšäken". Axəri eġal-taġal gele baksunaxun sal śum ukala vaxṭ teṭun bä͑ġä͑bsay.
Šoroxal lodḳina laci ičan-ičoġoynaḳ šuḳḳal nu bakala sa galaṭun taci.
Ama taġaṭan ǯamaaten šoṭoġo aneḳi, geleṭinal čalexi. Ṭe vädä bütüm šähärmoġoxun amdarxo turin axəšaki ṭe gala ičoġoxun be͑ś ṗaṭunṗi.
Isus q̇ariluġa č̣eri kala sa top amdarxo aḳaṭan šoṭoġoynaḳ Iz üḳe boḳi, šoṭaynaḳ ki, čobansuz eġelxo ḳinäḳṭuniy. Isusenal šoṭoġo gele šeymoġoy barada zombsane burqi. *
Biyänebaksay. Šagirdxon hari Isusa piṭun: "Mo čöle, hamal ene č̣äyine.
Ǯamaata tärba, barta taci me härrämine bakala ayizmoġoxun, ganxoxun ičoġoynaḳ sa šey haq̇i käyeq̇aṭun".
Ama Isusen šoṭoġo pine: "Šoṭoġo ukun vä͑n tadanan". Šagirdxon piṭun: "Bärkä taci ṗä͑bać \ dinaren * śum haq̇ayan ki, moṭoġoyan ukesṭa?"
Ama Isusen šoṭoġo pine: "Takinan, be͑ġanan be͑yn hema śumvä͑x bu?" Šoṭoġonal be͑ġi piṭun: "Qo śum saal ṗä͑ čäliyäx bu".
Isusen šoṭoġo ämirebi ki, amdarxo däsṭä-däsṭä göyün oye loxol arcevḳeq̇aṭun.
Amdarxo bać-bać, älli-älli arṭunci.
Isusen qo śuma q̇a ṗä͑ čälinä exṭi göynul be͑ġsun šükürbi afərənepi. Oša śuma ǯöybi Iz šagirdxone tadi ki, ǯamaata paybeq̇aṭun. P̣ä͑ čälinäl bitoṭaynaḳ ǯöyebi.
Bitoṭin käyi boṭunši,
hälä avuzin mandi śume saal čälin ḳoṭorxoxun ṗac̣c̣e zänbiläl buyṭunbi.
Šum käyiṭoġoxun sayǯä išq̇arxoy say isä qo hazar taney.
; Ioan. 6:15-21)
; İoan. 6:15-21)
Moṭoxun haṭe saad oša Isusen amdarxo ḳoya yaq̇abadaṭan, Iz šagirdxoval mäǯburebi ki, lodḳina laci Ičuxun be͑ś ṭe täräf - Beṭsayda č̣ovakaṭun.
Ič isä ǯamaata yaq̇abadiṭuxun oša afərəpseynaḳ buruġone laci.
Üše lodḳa göle bə͑yexey, Isus isä q̇ariluġa täk čurpeney.
Iz šagirdxon zorinḳäṭun avar zaṗey, šoṭaynaḳ ki, mušen ičoġoy ćoyele fuyey. Moṭo aḳaṭan, üšeni biṗimǯi saadasṭa * \ u͑qä͑ray arane. \ Isus göle ćoyelxun šoṭoġoy ṭo͑ġo͑le taci, šoṭoġoxun č̣ovaksune čureci.
Ama šagirdxon Isusi göle ćoyelxun tarapsuna aḳaṭan Šoṭo sa aḳesun avabaki harayṭunpi,
Šoṭo aḳi ičoġo q̇ə͑yen haq̇eney. Isusen haṭe saad šoṭoġoxun äyitṗi pine: "Üḳlü bakanan, Zuzu, ma q̇ə͑banan!"
Oša šoṭoġoy ṭo͑ġo͑l lodḳinane laci, mušal šiṗe baki. Šorox lap määṭṭäl manṭundi.
Axəri šoṭoġon ṭema amdara uḳesṭuni möǯüzinäl teṭun q̇amišakey, ičoġoy pulmux hälä ḳać̣iney.
)
)
Isus q̇a Iz šagirdxo gölä č̣ovaki Ginesaraṭun hari. Q̣ariluġa č̣eri lodḳina ġaćṭunpi.
Šorox lodḳinaxun č̣eġala ḳinäḳ ǯamaaten Isusa čalexi.
Ṭe pervare bakala amdarxon Isusi maya baksuna ibakaṭan ičoġoy azariġo nasilḳin boš Šoṭay ṭo͑ġo͑l ešṭaṭun burqi.
Isusi taġala här gala - ayizmoġo, šähärmoġo, bölgöġo azariġo ečeri meydana laṭunxsay ki, Šoṭay paltari č̣oṭaq̇a bakayin lafteq̇aṭun. Šoṭo lafṭalorox bitoval q̇olayebaksay.
